കൊല്‍ക്കത്തയില്‍ ചാര്‍ട്ടേഡ് അക്കൗണ്ടന്റായ യുവാവ് ഇരട്ടക്കൊലപാതകം ചെയ്ത ശേഷം ആത്മഹത്യ ചെയ്തു.കൊല്‍ക്കത്തയില്‍ നിന്ന് വിമാനം പിടിച്ച് ബംഗളുരുവില്‍ എത്തി പിണങ്ങിക്കഴിഞ്ഞിരുന്ന ഭാര്യയെ കൊന്ന ശേഷം തിരികെ കൊല്‍ക്കത്തയില്‍ എത്തി ഭാര്യാ മാതാവിനെ വെടിവച്ച് കൊലപ്പെടുത്തിയ ശേഷം ആത്മഹത്യ ചെയ്യുകയായിരുന്നു. 

ചാര്‍ട്ടേഡ് അക്കൗണ്ടന്റുമാരായ അമിത് എന്ന യുവാവും ഭാര്യ ശില്‍പ്പി അഗര്‍വാളും വിവാഹമോചനത്തിന് ഹര്‍ജി നല്‍കിയിരുന്നു. ഇരുവരും കഴിഞ്ഞ രണ്ട് വര്‍ഷമായി വേര്‍പിരിഞ്ഞാണ് താമസിച്ചിരുന്നത്. ശില്‍പ്പി ബാംഗ്ലൂരിലും അമിത് കൊല്‍ക്കത്തയിലുമാണ് താമസിച്ചിരുന്നത്. ദമ്പതികള്‍ക്ക് പത്ത് വയസുള്ള ഒരു മകനുണ്ട്.

വിവാഹ മോചനത്തെ തുടര്‍ന്ന് സ്വത്തുക്കള്‍ വീതം വയ്ക്കുന്നതിലെ തര്‍ക്കമാണ് കൊലപാതകത്തിലേക്കും ആത്മഹത്യയിലേക്കും നയിച്ചതെന്നാണ് പ്രാഥമിക സൂചന. ബംഗളുരുവില്‍ എത്തി ഭാര്യയെ കൊലപ്പെടുത്തിയ ശേഷം മകനെക്കൂട്ടി കൊല്‍ക്കത്തയില്‍ എത്തിയ അമിത്, മകനെ തന്റെ സഹോദരനെ ഏല്‍പ്പിച്ച ശേഷം തിങ്കളാഴ്ച വൈകുന്നേരം അഞ്ചരയോടെയാണ് ഭാര്യയുടെ മാതാപിതാക്കള്‍ താമസിക്കുന്ന രാമകൃഷ്ണ സമാധി റോഡിലെ വസതിയില്‍ എത്തിയത്.

ശില്‍പ്പിയുടെ മാതാപിതാക്കളായ സുഭാസും ലളിതയും ഈ സമയം വീട്ടിലുണ്ടായിരുന്നു. തുടര്‍ന്ന് സ്വത്തുക്കളെച്ചൊല്ലി തര്‍ക്കമുണ്ടായതായി അയല്‍വാസികള്‍ മൊഴി നല്‍കിയിട്ടുണ്ട്. ശില്‍പ്പിയുടെ പിതാവ് സ്വത്ത് സംബന്ധിച്ച ചില രേഖകളില്‍ ഒപ്പുവയ്ക്കണമെന്ന് ആവശ്യപ്പെട്ടാണ് ഇയാള്‍ എത്തിയത്. തര്‍ക്കം കുറെ നേരം നീണ്ടുനിന്നു. പിന്നീട് ആറരയോടെ വെടിയൊച്ച കേട്ടതായും അയല്‍വാസികള്‍ മൊഴി നല്‍കിയിട്ടുണ്ട്. അമിത് വെടിയുതിര്‍ത്തതോടെ സുഭാസ് പുറത്തേക്ക് ഓടി അടുത്ത ഫ്ളാറ്റില്‍ അഭയം തേടി.

ഭാര്യയ്ക്ക് വെടിയേറ്റുവെന്ന് വ്യക്തമായതോടെ അമിത് രക്ഷപെടാതിരിക്കാന്‍ സുഭാസ് പുറത്ത് നിന്ന് വാതില്‍ പൂട്ടിയിരുന്നു. ഇതേതുടര്‍ന്ന് അമിത് സ്വയം വെടിയുതിര്‍ത്ത് ജീവനൊടുക്കുകയായിരുന്നു. അയല്‍വാസികള്‍ വിവരമറിയിച്ചതിനെ തുടര്‍ന്ന് പോലീസ് എത്തിയപ്പോഴേയ്ക്ക് ഇരുവരുടെയും മരണം സംഭവിച്ചിരുന്നു. ലളിതയുടെ മൃതദേഹം വെടിയേറ്റ നിലയില്‍ തറയിലും അമിതിന്റെ മൃതദേഹം കിടപ്പുമുറിയിലുമാണ് കണ്ടെത്തിയത്.