പ്രധാനമന്ത്രി നരേന്ദ്രമോദിക്കും സർക്കാരിനുമെതിരെ കടുത്ത വിമർശനവുമായി രാഹുൽ ഗാന്ധി. മോദി സര്‍ക്കാര്‍ കൊവിഡും പെട്രോള്‍- ഡീസല്‍ വിലവര്‍ദ്ധനയും അണ്‍ലോക്ക് ചെയ്തിരിക്കുകയാണെന്ന പരിഹാസവുമായി രംഗത്തെത്തിയിരിക്കുകയാണ് രാഹുല്‍ഗാന്ധി. ഇന്ന് രാജ്യത്തെ കൊവിഡ് കേസുകള്‍ 4.56 ലക്ഷം കടന്നിരുന്നു. കഴിഞ്ഞ രണ്ടാഴ്ചയിലധികമായി ഇന്ധന വിലയും വര്‍ദ്ധിച്ചുകൊണ്ടിരിക്കുകയാണ്. ഈ പശ്ചാത്തലത്തിലാണ് ട്വിറ്ററിലൂടെ രാഹുല്‍ഗാന്ധിയുടെ വിമര്‍ശനം.

നേരത്തെ കോണ്‍ഗ്രസിനും ഗാന്ധി കുടുംബത്തിനുമെതിരെ രൂക്ഷ വിമര്‍ശനവുമായി ബി.ജെ.പി അദ്ധ്യക്ഷന്‍ ജെ.പി നദ്ദ രംഗത്തെത്തിയിരുന്നു. തിരസ്‌കരിക്കപ്പെട്ട് പുറത്താക്കപ്പെട്ട ഒരു കുടുംബവാഴ്ച ഒരിക്കലും മുഴുവന്‍ പ്രതിപക്ഷത്തിനും തുല്യമല്ലെന്നായിരുന്നു നദ്ദ യുടെ വിമർശനം. ഒരു ഭരണത്തിന്റെ അബദ്ധം മൂലം നമുക്ക് നഷ്ടപ്പെട്ടത് ആയിരക്കണക്കിന് ചതുരശ്ര കിലോമീറ്ററോളം വരുന്ന നമ്മുടെ ഭൂമിയാണ്. ഇന്ത്യ അവരെ തിരസ്‌കരിച്ചതില്‍ അത്ഭുതപ്പെടാനില്ല. ഒരു കുടുംബത്തിന്റെ താത്പര്യം ഇന്ത്യയുടെ താത്പര്യമല്ലെന്നും അദ്ദേഹം പറഞ്ഞു.

''ചോദ്യങ്ങള്‍ ചോദിക്കുക എന്നുള്ളത് പ്രതിപക്ഷത്തിന്റെ അവകാശമാണ്. സര്‍വകക്ഷി യോഗത്തില്‍ ആരോഗ്യകരമായ ഒരു ചര്‍ച്ചയാണ് നടന്നത്. നിരവധി പ്രതിപക്ഷ നേതാക്കള്‍ തങ്ങളുടെ വിലയേറിയ നിര്‍ദേശങ്ങള്‍ മുന്നോട്ടുവച്ചിരുന്നു. അവര്‍ കേന്ദ്രത്തെ പിന്തുണയ്ക്കുകയും ചെയ്തു. ഒരു കുടുംബം മാത്രം അതില്‍ നിന്ന് വിട്ടുനിന്നു. അതാരാണെന്ന് ഊഹിക്കാമോ? ഒരു കുടുംബവും അവരുടെ സേവകരും തങ്ങളാണ് പ്രതിപക്ഷം എന്ന വലിയൊരു തെറ്റിദ്ധാരണയിലാണ്‌. അവരുടെ നേതാവ് അനാവശ്യമായി രോഷം കൊള്ളുകയും, അയാളുടെ സേവകര്‍ അത് പ്രചരിപ്പിക്കുകയും ചെയ്യുന്നു. ഏറ്റവും പുതിയത് അവര്‍ കേന്ദ്രത്തോട് ചോദ്യങ്ങള്‍ ചോദിച്ചുകൊണ്ടേയിരിക്കുകയാണ്.'' എന്നാണ് നദ്ദയുടെ ട്വീറ്റ്.