കൊവിഡ്-19നെതിരെ 100 ശതമാനം ഫലപ്രദമായ കണ്ടുപിടിച്ചു എന്ന വീരവാദവുമായി വന്ന ബാബാ രാംദേവിനെതിരെ രാജസ്ഥാൻ സർക്കാർ കേസെടുക്കുമെന്നു റിപ്പോർട്ട്

സർക്കാർ അനുമതിയില്ലാതെ മരുന്നു പരീക്ഷണം നടത്തിയത് നിയമലംഘനമാണെന്ന് ചൂണ്ടിക്കാട്ടിയാണ് രാജസ്ഥാൻ സർക്കാർ നിയമനടപടിയ്ക്ക് ഒരുങ്ങുന്നത്. കൊവിഡിനെതിരെ ഫലം ചെയ്യുമെന്ന് അവകാശപ്പെട്ട് ബാബാ രാംദേവിൻ്റെ പതഞ്ജലി കമ്പനി പുറത്തിറക്കിയ മരുന്ന് രോഗികളിൽ പരീക്ഷിച്ചിരുന്നെന്നു പറയുന്നതിൽ വിശ്വാസ്യത ഇല്ല എന്നും ആരോപണമുണ്ട്

ജയ്പൂരിലെ നാഷണൽ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസുമായി സഹകരിച്ചാണ് മരുന്ന് പുറത്തിറക്കിയത്. എന്നാൽ പതഞ്ജലി നടത്തിയത് മരുന്ന പരീക്ഷണമല്ലെന്നും തട്ടിപ്പാണെന്നുമാണ് രാജസ്ഥാൻ സർക്കാരിൻ്റെ ആരോപണം. മൂന്ന് ദിവസം കൊണ്ട് നിംസിൽ നിന്ന് പരീക്ഷണഫലം ലഭിക്കില്ലെന്നും രോഗലക്ഷണങ്ങൾ ഇല്ലാത്തവർക്കാണ് മരുന്ന് നൽകിയതെന്നും രാജസ്ഥാൻ സർക്കാർ വ്യക്തമാക്കി. പരിശോധനാഫലം നേരത്തെ തന്നെ നെഗറ്റീവായിരുന്നവരിലാണ് മരുന്നുകൾ പരീക്ഷണത്തിനായി നൽകിയതെന്നും ആരോപണം ഉയരുന്നുണ്ട്.

100 ശതമാനം ഫലപ്രദമായ മരുന്നാണെന്ന അവകാശവാദത്തോടെയാണ് കഴിഞ്ഞ ചൊവ്വാഴ്ച ബാബാ രാംദേവ് മൂന്ന് മരുന്നുകൾ പുറത്തിറക്കിയത്. കൊറോണിൽ, സ്വാസരി വടി എന്നീ മരുന്നുകളും അനു ഓയിൽ എന്ന എണ്ണയുമടങ്ങുന്ന കൊറോണ കിറ്റാണ് പതഞ്ജലി പുറത്തിറക്കിയത്. മരുന്ന് മനുഷ്യരിൽ പരീക്ഷണം വിജയകരമായി പൂർത്തിയാക്കി എന്നും രാംദേവ് പറഞ്ഞിരുന്നു.

എന്നാൽ മരുന്നിൻ്റെ ലൈസൻസ് അടക്കമുള്ള കാര്യങ്ങളിൽ സംശയങ്ങളുണ്ടെന്നാണ് സർക്കാർ ഏജൻസികൾ പറയുന്നത് . മരുന്നിൻ്റെ ഗവേഷണം സംബന്ധിച്ച വിവരങ്ങൾ തങ്ങൾക്ക് അറിയില്ലെന്ന് ആയുഷ് മന്ത്രാലയം പറഞ്ഞു . മരുന്നിൻറെ ചേരുവകളും ഗവേഷണ വിവരങ്ങളും അടക്കം വ്യക്തമാക്കാൻ ആയുഷ് മന്ത്രാലയം കമ്പനിയോട് ആവശ്യപ്പെട്ടിട്ടുണ്ട്. കൊവിഡ് മരുന്ന് എന്ന രീതിയിൽ പുതിയ ഉത്പന്നം പരസ്യം ചെയ്യുന്നതിനും വിലക്കുണ്ട്.എഎൻഐയുടെ അനുമതിയോടെയാണ് പതഞ്‌ജലി ബ്രാൻഡിൽ മരുന്ന് ഇറക്കിയിരിക്കുന്നത്

അതേസമയം, പുതിയ മരുന്നിൻ്റെ ലൈസൻസിനായി സമീപിക്കുമ്പോൾ കൊവിഡ് 19നുള്ള മരുന്നാണെന്നുള്ള കാര്യം കമ്പനി വ്യക്തമാക്കിയിരുന്നില്ലെന്നാണ് ഉത്തരാഖണ്ഡ് സർക്കാർ വൃത്തങ്ങളെ ഉദ്ധരിച്ചുള്ള എഎൻഐ റിപ്പോർട്ട്.