സംഘര്ഷത്തിന് അയവുവരുത്താന് ഉദ്യോഗസ്ഥ-നയതന്ത്രതല ചര്ച്ചകള് തുടരവേ അതിര്ത്തിയില് യുദ്ധസമാന ജാഗ്രതയുമായി ഇന്ത്യയും ചൈനയും
സംഘര്ഷത്തിന് അയവുവരുത്താന് ഉദ്യോഗസ്ഥ-നയതന്ത്ര തല ചര്ച്ചകള് തുടരുമ്പോഴും അതിര്ത്തിയില് യുദ്ധസമാന ജാഗ്രതയുമായി ഇന്ത്യയും ചൈനയും.
യഥാര്ഥ നിയന്ത്രണരേഖയിലുടനീളം കൂടുതല് സൈന്യത്തെ ചൈന വിന്യസിച്ചതിനുപിന്നാലെ വെള്ളിയാഴ്ച രാവിലെ ഇന്ത്യ ലഡാക്കില് കര, വ്യോമ സേനകളുടെ സംയുക്ത സേനാഭ്യാസം നടത്തി. അടിയന്തരഘട്ടത്തില് അതിര്ത്തി മേഖലകളില് അതിവേഗം സൈന്യത്തെ വിന്യസിക്കുന്നതിനുള്ള പരിശീലനത്തിന്റെ ഭാഗമായാണിത്. അപ്പാച്ചി ഹെലികോപ്റ്ററുകളും സുഖോയ് വിമാനങ്ങളും ടാങ്കുകളും പരിശീലനപരിപാടിയുടെ ഭാഗമായി അണിനിരത്തി. കരസേനയ്ക്കൊപ്പം ഇന്ഡോ-ടിബറ്റന് ബോര്ഡര് പോലീസിനെയും ഉള്പ്പെടുത്തി (ഐ.ടി.ബി.പി.) അതിര്ത്തിയില് ഇന്ത്യ സേനാവിന്യാസം ശക്തമാക്കിത്തുടങ്ങി.
ഇപ്പോഴത്തെ സ്ഥിതി ഇതുപോലെ തുടരുകയാണെങ്കില് അന്തരീക്ഷം കൂടുതല് വഷളാകുമെന്ന് വിദേശകാര്യ മന്ത്രാലയം വെള്ളിയാഴ്ച വ്യക്തമാക്കി. നയതന്ത്രചര്ച്ച തുടരുമ്പോഴും ഇരുവിഭാഗവും ഗല്വാന് താഴ്വര മേഖലയില് വന്തോതില് സൈന്യത്തെ വിന്യസിക്കുകയാണെന്ന് വിദേശകാര്യ വക്താവ് അനുരാഗ് ശ്രീവാസ്തവ പറഞ്ഞു. ഡെപ്സാങ് സമതലത്തില് ചൈന വന്പോര്മുഖം സജ്ജമാക്കിയതിന്റെ ഉപഗ്രഹ ദൃശ്യം പുറത്തുവന്നതോടെയാണ് ഇന്ത്യയും ശക്തമായ നടപടികളിലേക്കു നീങ്ങുന്നത്.
കിഴക്കന് ലഡാക്കിലെ രണ്ടുദിവസത്തെ സന്ദര്ശനത്തിനു ശേഷം ഡല്ഹിയിലെ സേനാ ആസ്ഥാനത്തു മടങ്ങിയെത്തിയ കരസേനാ മേധാവി ജനറല് എം.എം. നരവണെ പ്രതിരോധമന്ത്രി രാജ്നാഥ് സിങ്ങുമായി കൂടിക്കാഴ്ചയും നടത്തി. അതിര്ത്തിയിലെ സ്ഥിതിഗതികള് നരവണെ വിശദീകരിച്ചു. റഷ്യയിലെ വിജയദിന സൈനിക പരേഡില് പങ്കെടുത്ത് രാജ്നാഥ് സിങ് വ്യാഴാഴ്ചയാണ് മടങ്ങിയെത്തിയത്.
അതിര്ത്തിയില് ഗാല്വന് താഴ്വരയിലും ഹോട്സ്പ്രിങ്ങിനുംപുറമേ നിയന്ത്രണ രേഖയ്ക്കടുത്ത് കിടക്കുന്ന കൊയുള്, ഫുക്ചെ, മുര്ഗോ, ഡെപ്സാങ്, ദെംചുക്ക് എന്നിവിടങ്ങളിലും ചൈനീസ് സേന നിര്മാണ പ്രവര്ത്തനങ്ങള് നടത്തിയിട്ടുണ്ട്. ഇവിടെയെല്ലാം ഇന്ത്യ കൂടുതല് സൈനികരെയും യുദ്ധോപകരണങ്ങളും വിന്യസിച്ചുതുടങ്ങി.
അതിനിടെ, രാജ്യത്തിന്റെയും അതിര്ത്തിയുടെയും സമഗ്രതയും പരമാധികാരവും സംരക്ഷിക്കാന് സൈന്യം സമര്പ്പിതമാണെന്നും ഏതു വെല്ലുവിളിയും നേരിടാന് സജ്ജമാണെന്നും ഇന്ഡോ-ടിബറ്റന് ബോര്ഡര് പോലീസ് (ഐ.ടി.ബി.പി.) മേധാവി എസ്.എസ്. ദെസ്വാള് പറഞ്ഞു.
ഇന്ത്യ- ചൈന അതിര്ത്തിയിലെ പാന്ഗോങ് സോയില് വര്ധിച്ച് വരുന്ന ചൈനീസ് സൈനിക വിന്യാസം ഇന്ത്യയ്ക്ക് ആശങ്ക നല്കുന്നതാണെന്ന വിലയിരുത്തലുമായി കരസേനയിലെ ഉന്നത ഉദ്യോഗസ്ഥര്. ഇന്ത്യ- ചൈന സൈനിക വിന്യാസം വര്ധിച്ചതോടെ ഇരു സേനകളും പാന്ഗോങ് തടാകത്തിന് സമീപത്ത് മുഖാമുഖം നിലയുറപ്പിച്ചിരിക്കുകയാണ്.പ്ലാനറ്റ് ലാബില് നിന്ന് ലഭിച്ച ഹൈ റെസല്യൂഷന് ചിത്രങ്ങള് വ്യക്തമാക്കുന്നത് ചൈനീസ് സൈന്യം പാന്ഗോങ് സോ തടാകത്തിന് സമീപത്തെ നിര്ണായകമായ ഫിംഗര് 4 മേഖല കൈവശപ്പെടുത്തുമെന്നാണ്. മിലിറ്ററി സാറ്റലൈറ്റ് ഇമേജറി വിദഗ്ധനായ റിട്ട . കേണല് വിനായക് ഭട്ടാണ് ഇക്കാര്യം വിശദീകരിക്കുന്നത്. ചൈനീസ് നീക്കം ഇന്ത്യയുടെ സൈന്യത്തിന്റെ നീക്കങ്ങള് ലക്ഷ്യംവെച്ചുകൊണ്ടുള്ളതാണെന്നും അദ്ദേഹം പറയുന്നു.
ഷെല്ലിംഗിനിടെ ക്യാമ്പുകള്ക്ക് പ്രതിരോധം തീര്ക്കുന്നതിനായാണ് ക്യാമ്പുകള്ക്ക് ചുറ്റുമായും പ്രതിരോധങ്ങള് തീര്ത്തിട്ടുള്ളതെന്നാണ് കേണല് ഭട്ടിന്റെ നിരീക്ഷണം. പിങ്ക് നിറത്തിലുള്ള ടാര്പോളിന് ഷീറ്റുകള് കൊണ്ട് മൂടിയ നിലയിലാണ് ചൈനീസ് ടെന്റുകളുള്ളത്. ഇവയ്ക്ക് അപ്പുറത്തുള്ള ചൈന നിര്മിച്ചുയര്ത്തിയ വസ്തുക്കളും മറച്ച നിലയിലാണുള്ളത്. ചൈനീസ് ട്രാക്കുകളിലൂടയുള്ള വാഹന സഞ്ചാരങ്ങളും ദൃശ്യമാകുന്നുണ്ട്. ഫിംഗര് 4നോടും ഫിംഗര് 5 നോടും ചേര്ന്നുള്ള പ്രദേശമാണിത്.
https://www.facebook.com/Malayalivartha
