രാജ്യത്ത് ചൈന വിരുദ്ധ വികാരം ഉയരുമ്പോള്‍ ഹ്രസ്വ വിഡിയോ പ്ലാറ്റ്‌ഫോമായ മിട്രോണ്‍ ആപ്ലിക്കേഷന്‍ ജനപ്രീതി നേടുന്നു. ടിക് ടോക്കിന് 'ഇന്ത്യന്‍ ബദലായി' അവതരിപ്പിച്ച മിട്രോണ്‍ ആപ്ലിക്കേഷന്‍ ഗൂഗിള്‍ പ്ലേ സ്റ്റോറില്‍ ഒരു കോടി ഡൗണ്‍ലോഡുകള്‍ പിന്നിട്ടു. ലോഞ്ച് ചെയ്ത് രണ്ട് മാസത്തിനുള്ളിലാണ് 1 കോടി ഡൗണ്‍ലോഡ് നേട്ടം കൈവരിച്ചത്.

ആപ്ലിക്കേഷന്റെ സോഴ്സ് കോഡ് മുന്‍പ് ഒരു പാക്കിസ്ഥാന്‍ ഡെവലപ്പറില്‍ നിന്ന് വാങ്ങിയതാണെന്ന് ആരോപിക്കപ്പെട്ടിരുന്നു. എന്നാല്‍, ആപ്പിന്റെ സഹസ്ഥാപകരായ ശിവങ്ക് അഗര്‍വാള്‍, അനിഷ് ഖണ്ടേല്‍വാള്‍ എന്നിവര്‍ ചേര്‍ന്ന് ഇതിനെല്ലാം കൃത്യമായ മറുപടി നല്‍കിയിട്ടുണ്ട്. 5ല്‍ 4.5 എന്ന ശരാശരി റേറ്റിംഗുള്ള മിട്രോണിന് നിലവില്‍ കാര്യങ്ങളെല്ലാം അനുകൂലമാണ്.

പ്രധാനമന്ത്രി നരേന്ദ്ര മോദി 'വോക്കല്‍ ഫോര്‍ ലോക്കല്‍' എന്ന കാഴ്ചപ്പാട് പ്രഖ്യാപിച്ചതിന് ശേഷം മിട്രോണ്‍ പലരെയും ആകര്‍ഷിച്ചു തുടങ്ങി. ചൈന വിരുദ്ധ വികാരം രാജ്യത്ത് ഇപ്പോള്‍ നിലനില്‍ക്കുന്നതിനാല്‍ ടിക് ടോക്കിനെതിരെ പ്രതിരോധിക്കാന്‍ മിട്രോണ്‍ കൂടുതല്‍ ശ്രദ്ധ നേടുമെന്നാണ് കരുതുന്നത്.

1 കോടി ഡൗണ്‍ലോഡുകള്‍ കഴിഞ്ഞ വിവരം പ്രഖ്യാപിച്ച വാര്‍ത്താക്കുറിപ്പില്‍ മിട്രോണ്‍ സിഇഒ ശിവങ്ക് അഗര്‍വാള്‍ തന്നെ ആപ്ലിക്കേഷന്റെ പിന്നിലെ കാര്യങ്ങള്‍ വ്യക്തമാക്കിയിരുന്നു. ആപ്പിന് VocalForLocal ന്റെ ശക്തമായ ഒരു വികാരമുണ്ട്. ഞങ്ങളുടെ ഉപയോക്താക്കളോട് സംവേദനക്ഷമത പുലര്‍ത്തുകയും പ്രാദേശിക നിയമങ്ങള്‍ക്ക് അനുസൃതമായി പ്രവര്‍ത്തിക്കുകയും ചെയ്യുമ്പോള്‍ ഡിജിറ്റല്‍ ഇടപഴകലും വിനോദവും പുനര്‍നിര്‍മിക്കാന്‍ ഞങ്ങള്‍ അഭിമാനത്തോടെ മിട്രോണിനെ നിര്‍മിക്കുകയാണ് എന്നാണ് അഗര്‍വാള്‍ പറഞ്ഞത്.