കൊവിഡ് ബാധിച്ച്‌ ഹൈദരാബാദിലെ സര്‍ക്കാര്‍ ആശുപത്രിയില്‍ മരിച്ച യുവാവിന്റെ അവസാന വീഡിയോ സന്ദേശം പുറത്തുവിട്ട് കുടുംബം. ശരിയായ ചികിത്സ കിട്ടാതെയാണ് രോഗി മരിച്ചതെന്ന് തെളിയിക്കുന്ന സന്ദേശമാണ് കുടുംബം പുറത്തുവിട്ടിരിക്കുന്നത്.

വീഡിയോ പുറത്തെത്തിയതിന് പിന്നാലെ യുവാവിന് മതിയായ ചികിത്സ ലഭിക്കാത്തതില്‍ പ്രതിഷേധം ഉയര്‍ന്നിട്ടുണ്ട്. മരണം മുന്നില്‍ കണ്ട യുവാവിന്റെ ദുരവസ്ഥ സാമൂഹികമാധ്യമങ്ങളില്‍ പ്രചരിക്കുകയാണ്. 'എനിക്ക് ശ്വസിക്കാനാകുന്നില്ല ഡാഡീ… മൂന്ന് മണിക്കൂറായി അവരെനിക്ക് ഓക്‌സിജന്‍ തരുന്നത് നിര്‍ത്തിയിട്ട്, ഞാന്‍ കുറേ പറഞ്ഞു നോക്കി, എന്റെ ഹൃദയം നിലച്ച പോലെ… ഞാന്‍ പോവുകയാണ്, എല്ലാവര്‍ക്കും ബൈ…'-

ഹൈദരാബാദിലെ സര്‍ക്കാര്‍ ആശുപത്രിയില്‍ ചികിത്സയിലായിരുന്ന യുവാവിന്റെ അവസാന വീഡിയോ സന്ദേശത്തില്‍ പറയുന്നതിങ്ങനെ. സന്ദേശയമയച്ച്‌ ഒരു മണിക്കൂറിന് ശേഷം യുവാവ് മരിച്ചതായി ആശുപത്രി അധികൃതര്‍ അറിയിക്കുകയും ചെയ്തു. കൊവിഡ്19 ബാധിച്ച ഈ മുപ്പത്തിനാലുകാരന് പത്ത് സ്വകാര്യ ആശുപത്രികളാണ് ഇതിനുമുമ്ബ് ചികിത്സ നിഷേധിച്ചത്. തുടര്‍ന്നാണ് സര്‍ക്കാര്‍ ആശുപത്രിയില്‍ പ്രവേശനം ലഭിച്ചത്.

പിന്നീട് ഇയാള്‍ മരിച്ചതിനു ശേഷമാണ് കൊവിഡ് പരിശോധന നടത്തിയതും ഫലം പോസിറ്റീവായതും. അതേസമയം, മകന്റെ അന്ത്യകര്‍മ്മങ്ങള്‍ കഴിഞ്ഞ് മടങ്ങിയെത്തിയ ശേഷമാണ് മകന്‍ അയച്ച വീഡിയോ കാണാനിടയാതെന്ന് അച്ഛന്‍ പറഞ്ഞു. മകന്‍ സഹായം ആവശ്യപ്പെട്ടെങ്കിലും അത് നല്‍കാന്‍ സാധിച്ചില്ലെന്നും ഈ അവസ്ഥ മറ്റൊരാള്‍ക്ക് ഉണ്ടാകരുതെന്നും അദ്ദേഹം പറഞ്ഞു.

മകന് എന്തു കൊണ്ടാണ് ഓക്‌സിജന്‍ നിഷേധിച്ചതെന്ന് അധികൃതര്‍ വ്യക്തമാക്കണമെന്നും അദ്ദേഹം കൂട്ടിച്ചേര്‍ത്തു. മറ്റേതെങ്കിലും രോഗിയുടെ ജീവന്‍ രക്ഷിക്കുന്നതിനായി തന്റെ മകന് ജീവന്‍രക്ഷാ ഉപകരണങ്ങളുടെ സഹായം നിഷേധിക്കപ്പെട്ടതാണോ എന്ന കാര്യം അന്വേഷിക്കണമെന്നും അദ്ദേഹം ആവശ്യപ്പെട്ടു. കൊവിഡാണ് യുവാവിന്റെ മരണകാരണമെന്ന് ആശുപത്രി അധികൃതര്‍ അറിയിച്ചു. മാതാപിതാക്കള്‍, ഭാര്യ, സഹോദരന്‍, ഭാര്യാസഹോദരന്‍ എന്നിവരുമായി യുവാവ് സമ്ബര്‍ക്കത്തിലേര്‍പ്പെട്ടിരുന്ന കാര്യം യുവാവിന്റെ മരണത്തോടൊപ്പം കുടുംബാംഗങ്ങളെ കൂടുതല്‍ ആശങ്കയിലാക്കിയിരിക്കുകയാണ്.

ഇവര്‍ക്ക് ഇതു വരെ കോവിഡ് പരിശോധന നടത്തിയിട്ടില്ല. ഒമ്ബതും പന്ത്രണ്ടും വയസുള്ള പേരക്കുട്ടികള്‍ വീട്ടിലുണ്ടെന്നും പരിശോധന നടത്താത്തതു കാരണം ആശങ്കയിലാണെന്നും കുട്ടികളെ അവരുടെ അച്ഛന്‍ മരിച്ച വിവരം അറിയിച്ചിട്ടില്ലെന്നും മുത്തച്ഛന്‍ അറിയിച്ചു.