കൊറോണ വൈറസ് ഭീതി പടരുന്നതിനിടെ അസുഖം ബാധിച്ചവരെ ചികിത്സിക്കുന്നതിനായി പത്തു ദിവസം കൊണ്ട് 1,000 കിടക്കകളുള്ള ആശുപത്രി നിര്‍മിച്ച ചൈനയുടെ റിക്കോര്‍ഡ് തകര്‍ത്ത് ഇന്ത്യ. ആയിരമല്ല, പതിനായിരത്തി ഇരുന്നൂറ് കിടക്കകളുള്ള ആശുപത്രിയാണ് ഇപ്പോള്‍ ഇന്ത്യ പണിതിരിക്കുന്നത്. ദില്ലി ഛത്തര്‍പൂര്‍ പ്രദേശത്ത് പ്രവര്‍ത്തനക്ഷമമാക്കിയ രാജ്യത്തെ 10200 കിടക്കകളുള്ള ഏറ്റവും വലിയ കൊവിഡ് ചികിത്സ കേന്ദ്രമായ ഈ ആശുപത്രിക്ക് സര്‍ദാര്‍ പട്ടേല്‍ കൊവിഡ് കെയര്‍ സെന്റര്‍ എന്നാണ് പേര് നല്‍കിയിക്കുന്നത്.

ഇന്ത്യയില്‍ കോവിഡ് രോഗികളുടെ എണ്ണം ഓരോ ദിവസവും പുതിയ റിക്കോര്‍ഡ് സൃഷ്ടിക്കുകയാണ്. ഈ സാഹചര്യത്തിവാണ് പുതിയ ആശുപത്രി പ്രവര്‍ത്തനം ആരംഭിക്കുന്നതെന്നത് ആശ്വാസകരമായ വാര്‍ത്തയാണ്. ഇന്നലെയാണ് സര്‍ദാര്‍ പട്ടേല്‍ കോവിഡ് കെയര്‍ സെന്റര്‍ പ്രവര്‍ത്തനം ആരംഭിച്ചത്. 10,000 കിടക്കകളില്‍ 2,000 എണ്ണം ലഭ്യമാണെന്ന് ദില്ലി സര്‍ക്കാര്‍ അറിയിച്ചു. ഡല്‍ഹിയിലെ ചട്ടര്‍പൂര്‍ പ്രദേശത്താണ് ബാക്കി 8000 കിടക്കളുള്ളത്. ഇത് ബുധനാഴ്ച മുതല്‍ ഉപയോഗിച്ചു തുടങ്ങും. ഇന്ത്യയുടെ ആഭ്യന്തരമന്ത്രി അമിത് ഷായും ദില്ലി മുഖ്യമന്ത്രി അരവിന്ദ് കെജ്‌രിവാളും ശനിയാഴ്ച കെയര്‍ സെന്റര്‍ സന്ദര്‍ശിച്ചിരുന്നു. അന്ന് ട്വിറ്ററില്‍ ലോകത്തിലെ ഏറ്റവും വലിയ ആശുപത്രികളിലൊന്നാണ് ഈ കേന്ദ്രമെന്ന് കെജ്‌രിവാള്‍ വിശേഷിപ്പിച്ചിരുന്നു. അതേസമയം, 10,000 കിടക്കകളുള്ള ഈ സൗകര്യം ദില്ലിയിലെ ജനങ്ങള്‍ക്ക് വലിയ ആശ്വാസം നല്‍കുമെന്ന് ആഭ്യന്തരമന്ത്രി ട്വീറ്റ് ചെയ്തിരുന്നു. ഇന്തോടിബറന്‍ ബോര്‍ഡര്‍ പോലീസ് ആശുപത്രിക്ക് വേണ്ട സുരക്ഷ ചുമതലകള്‍ വഹിക്കുമെന്നും അമിത്ഷാ അറിയിച്ചു.

രാജ്യത്ത് കൊവിഡ് രോഗികള്‍ എണ്ണം അഞ്ചര ലക്ഷത്തിലേക്ക് കടക്കുകയാണ്. രോഗികളുടെ എണ്ണം 5,48,318 ആയി. കൊവിഡ് മരണം 16,475 ആയി. 24 മണിക്കൂറിനിടെ 14,459 രോഗികളും 380 മരണവും രാജ്യത്ത് റിപ്പോര്‍ട്ട് ചെയ്യപ്പെട്ടു. രോഗികളുടെ എണ്ണത്തില്‍ രാജ്യത്ത് രണ്ടാം സ്ഥാനം ഡല്‍ഹിക്കാണ്. 159133 കേസുകളുള്ള മുംബൈമാത്രമാണ് ഡല്‍ഹിക്ക് മുന്നിലുള്ളത്.