കൊവിഡ് 19 പ്രതിരോധത്തിനായുള്ള ഭാരത് ബയോടെക്കിന്റെ കോവാക്സിൻ ടിഎം(COVAXIN™️) മനുഷ്യരിൽ പരീക്ഷിക്കുന്നതിനുള്ള അനുമതി ഡിസിജിഐ നൽകിയതായി കമ്പനി അറിയിച്ചു. ഒന്നും രണ്ടും ഘട്ടങ്ങളിലായാണ് ഈ വാക്സിൻ മനുഷ്യരിൽ പരീക്ഷിക്കുക. ജൂലൈ മുതൽ തന്നെ വാക്സിൻ മനുഷ്യരിൽ പരീക്ഷിക്കുമെന്നാണ് റിപ്പോർട്ട്. ഇന്ത്യൻ കൌൺസിൽ ഫോർ മെഡിക്കൽ റിസർച്ച്, നാഷണൽ ഇൻസ്റ്റിറ്റ്യൂട്ട് ഓഫ് വൈറോളജി പൂനെ എന്നിവയുമായി സഹകരിച്ചാണ് ഭാരത് ബയോടെക്ക് വാക്സിൻ വികസിപ്പിച്ചെടുത്തത്.

അതേസമയം, ലോകത്തെ തന്നെ ഏറ്റവും വലിയ പ്ലാസ്മാ തെറാപ്പി ട്രയൽ മഹാരാഷ്ട്രയിൽ തുടങ്ങി. പ്രൊജക്ട് പ്ലാറ്റിന എന്ന പേരിൽ ഗുരുതരാവസ്ഥയിലുള്ള 500ലേറെ രോഗികൾക്കാണ് ബ്ലഡ് പ്ലാസ്മ നൽകുക. 17 മെഡിക്കൽ കോളേജുകളിലായാണ് ചികിത്സ. രണ്ട് ഡോസ് വീതം 200 മില്ലി പ്ലാസ്മ വീതമാണ് രോഗികൾക്ക് നൽകുക. പത്തിൽ ഒമ്പത് പേർക്ക് എന്ന തോതിൽ പ്ലാസ്മാ തെറാപ്പി വിജയകരമായ സാഹചര്യത്തിലാണ് ഗുരുതരാവസ്ഥയിലുള്ള രോഗികൾക്ക് പ്ലാസ്മ തെറാപ്പി നൽകാൻ തീരുമാനിച്ചത്. മുഖ്യമന്ത്രിയുടെ ദുരിതാശ്വാസ നിധിയിൽ നിന്ന് 17 കോടി രൂപ ഇതിനായി വകയിരുത്തിയിട്ടുണ്ട്.
അതിനിടെ
കോവിഡിനിടെ രോഗപ്രതിരോധ ശേഷി വർധിപ്പിക്കുന്ന ‘സന്ദേഷ്’ പുറത്തിറക്കാൻ ബംഗാൾ സർക്കാരിന്റെ തീരുമാനം. സുന്ദർബൻസിൽ നിന്നുള്ള തേൻ അടങ്ങിയിട്ടുള്ള ഈ മധുര പലഹാരം പ്രതിരോധ ശേഷി വർധിപ്പിക്കുമെങ്കിലും കോവിഡിനുള്ള മറുമരുന്ന് അല്ലെന്ന് അധികൃതർ വ്യക്തമാക്കി.പശുവിൻ പാലിൽ നിന്ന് ഉണ്ടാക്കുന്ന ചീസും സുന്ദർബൻസിൽ നിന്നുള്ള ശുദ്ധമായ തേനും ചേർത്ത് തയ്യാറാക്കുന്ന ഇതിൽ കൃത്രിമ സുഗന്ധങ്ങളൊന്നും ചേർക്കില്ലെന്ന് ബന്ധപ്പെട്ട ഉദ്യോഗസ്ഥൻ പറഞ്ഞു. രണ്ടു മാസത്തിനകം സന്ദേഷ് വിപണിയിലെത്തും. നഗരത്തിലും സമീപ ജില്ലകളിലും ലഭ്യമാകും.പലഹാരം നിർമ്മിക്കുന്നതിനുള്ള തേൻ പിർഖാലി, ജാർഖാലി, സുന്ദർബൻ തുടങ്ങിയ സ്ഥലങ്ങളിൽ നിന്ന് ശേഖരിക്കുമെന്നും അത് ശാസ്ത്രീയമായി സംഭരിക്കുമെന്നും മന്ത്രി മന്തുരം പഖിറ പറഞ്ഞു. കൊൽക്കത്തയിലെ പ്രശസ്തമായ ഈ മധുരപലഹാരത്തിൽ വിവിധ സസ്യങ്ങളും സുഗന്ധവ്യഞ്ജനങ്ങളായ മഞ്ഞൾ, തുളസി, കുങ്കുമം, ഏലം, ഹിമാലയൻ തേൻ എന്നിവയും അടങ്ങിയിട്ടുണ്ട്.