ഇന്ത്യ 59 ചൈനീസ് ആപ്പുകള്‍ നിരോധിച്ചതിന് പിന്നാലെ ചൈനയ്‌ക്കെതിരെ നടപടിയുമായി യുഎസ്. യുഎസ് ടെലികോം കമ്പനികള്‍ക്കുള്ള ഉപകരണങ്ങള്‍ വിതരണം ചെയ്യുന്ന രണ്ട് ടെലികോം കമ്പനികള്‍ക്കെതിരെയാണ് നടപടി. ഇന്ത്യയില്‍ രാജ്യസുരക്ഷയ്ക്ക് ഭീഷണിയാണെന്ന് കാണിച്ച് ഇന്ത്യ 59 ചൈനീസ് ആപ്പുകള്‍ നിരോധിച്ചുകൊണ്ട് ഉത്തരവിറക്കിയതിന് പിന്നാലെയാണ് യുഎസിന്റെ ഭാഗത്തുനിന്നുള്ള നടപടി.

ടിക് ടോക്, ഹലോ, ഷെയര്‍ ഇറ്റ്, എക്‌സെന്‍ഡര്‍, യുസി ബ്രൌസര്‍, ഷവോമിയുടെ രണ്ട് ആപ്പുകള്‍ എന്നിവ ഉള്‍പ്പെടെ ഉള്‍പ്പെടെ 59 ചൈനീസ് ആപ്പുകള്‍ക്കാണ് ഇന്ത്യ നിരോധനം ഏര്‍പ്പെടുത്തിയത്. കിഴക്കന്‍ ലഡാക്കില്‍ ഇന്ത്യ- ചൈന സൈന്യങ്ങള്‍ തമ്മിലുണ്ടായ സംഘര്‍ഷത്തില്‍ 20 ഇന്ത്യന്‍ സൈനികര്‍ വീരമൃത്യു വരിത്ത് രണ്ട് ആഴ്ചയ്ക്ക് ശേഷമാണ് കേന്ദ്ര ആഭ്യന്തര മന്ത്രാലയത്തിന്റെ നടപടി.

ചൈനീസ് കമ്പനിയായ ഹുവാവേ ടെക്‌നോളജീസ് കോ, ഇസഡ്ടിഇ കോര്‍പ്പ് എന്നിവ രാജ്യത്തിന്റെ ഭീഷണിയുയര്‍ത്തുന്നുവെന്ന് ചൂണ്ടിക്കാണിച്ച് ഫെഡറല്‍ കമ്മ്യൂണിക്കേഷന്‍സ് കമ്മീഷന്‍ അമേരിക്കന്‍ കമ്പനികള്‍ക്ക് വിലക്കേര്‍പ്പെടുത്തി. 8.3 ബില്യണ്‍ ഡോളറിന്റെ ഉപകരണങ്ങള്‍ ഈ കമ്പനികളില്‍ നിന്ന് വാങ്ങുന്നതിനാണ് ഫെഡറല്‍ കമ്മ്യൂണിക്കേഷന്‍സ് കമ്മീഷന്‍ വിലക്കേര്‍പ്പെടുത്തിയിട്ടുള്ളത്. ടെലികോം രംഗത്തെ ഉപകരണങ്ങള്‍ക്കായി യുഎസിലെ രണ്ട് ചൈനീസ് കമ്പനികളെ നീക്കി പകരം പ്രാദേശിക തലത്തിലുള്ള കമ്പനികളെ വിന്യസിക്കുന്നതിനായി നേരത്തെ നവംബറില്‍ തന്നെ ഫെഡറല്‍ കമ്മ്യൂണിക്കേഷന്‍സ് കമ്മീഷന്‍ തന്നെ ആവശ്യപ്പെട്ടിരുന്നു.

നെറ്റ് വര്‍ക്ക് സംബന്ധിച്ച പ്രശ്‌നങ്ങള്‍ വഴി നിര്‍ണായക ആശയവിനിമയ സംവിധാനങ്ങളില്‍ വിട്ടുവീഴ്ച ചെയ്ത് ചൈനീസ് കമ്യൂണിസ്റ്റ് പാര്‍ട്ടിയ്ക്ക് ചൂഷണത്തിനായി നിന്നുകൊടുക്കാന്‍ ഞങ്ങള്‍ അനുവദിക്കില്ലെന്നാണ് എഫ്‌സിസി ചെയര്‍മാന്‍ അജിത് പൈ പ്രസ്താവനയില്‍ വ്യക്തമാക്കിയത്. രാജ്യ സുരക്ഷയ്ക്ക് ചൈനീസ് കമ്പനികള്‍ വിതരണം ചെയ്യുന്ന ഉപകരണങ്ങള്‍ ഭീഷണിയാണെന്നാണ് യുഎസ് ചൂണ്ടിക്കാണിക്കുന്നത്.
ഫെഡറല്‍ കമ്മ്യൂണിക്കേഷന്‍സ് കമ്മീഷന്റെ നടപടിയ്ക്ക് ശേഷം ഹുവാവേയില്‍ നിന്നും ഇസഡ്ടിഇയില്‍ നിന്നുമുള്ള പ്രതികരണങ്ങള്‍ ലഭ്യമല്ല. എന്നാല്‍ ഫെഡറല്‍ കമ്മ്യൂണിക്കേഷന്‍സ് കമ്മീഷന്റെ നീക്കത്തെ രൂക്ഷമായി വിമര്‍ശിച്ച് ഇരു കമ്പനികളും നേരത്തെ രംഗത്തെത്തിയിരുന്നു. യുഎസ് നെറ്റ് വര്‍ക്കുകളില്‍ വിശ്വസനീയമല്ലാത്ത ഉപകരണങ്ങള്‍ നിലവിലുണ്ടെന്നാണ് എഫ്‌സിസി കമ്മീഷണര്‍ ഗ്രോഫറി സ്റ്റാര്‍ക്‌സിന്റെ പ്രതികരണം. അതുകൊണ്ട് തന്നെ നിലവിലുള്ള ഉപകരങ്ങള്‍ മാറ്റി പുതിയ സ്ഥാപിക്കുന്നതിന് യുഎസ് കോണ്‍ഗ്രസ് ഇതിനായി ഫണ്ട് അനുവദിക്കണമെന്നും അദ്ദേഹം കൂട്ടിച്ചേര്‍ത്തു.
രാജ്യസുരക്ഷയ്ക്ക് ഭീഷണിയുണ്ടെന്ന് കാണിച്ച് 2019ലാണ് യുഎസ് ടെലികോം കമ്പനികള്‍ ചൈനീസ് കമ്പനികളില്‍ നിന്നുള്ള ടെലികമ്യൂണിക്കേഷന്‍ ഉപകരണങ്ങള്‍ വിലക്കിക്കൊണ്ട് ട്രംപ് ഒപ്പുവെച്ച എക്‌സിക്യൂട്ടീവ് ഉത്തരവ് പുറത്തിറങ്ങുന്നത്. ട്രംപ ഭരണകൂടം കഴിഞ്ഞ വര്‍ഷം തന്നെ ഹുവാവേയെ കരിമ്പട്ടികയില്‍ ഉള്‍പ്പെടുത്തുകയും ചെയ്തിരുന്നു. ഫെഡറല്‍ കമ്മ്യൂണിക്കേഷന്‍സ് കമ്മീഷന്‍സും ചൈനീസ് കമ്പനികള്‍ക്കെതിരെ ശക്തമായ നിലപാടാണ് സ്വീകരിക്കുന്നത്. യുഎസിലെ സര്‍ക്കാര്‍ നിയന്ത്രണത്തിലുള്ള മൂന്ന് ചൈനീസ് ടെലികോം കമ്പനികളുടെ പ്രവര്‍ത്തനങ്ങള്‍ നിര്‍ത്തലാക്കുകയാണെന്ന് കഴിഞ്ഞ ഏപ്രിലില്‍ എഫ്‌സിസി വ്യക്തമാക്കുകയും ചെയ്തിരുന്നു.
ചൈന ടെലികോം അമേരിക്കാസ്, ചൈന യൂണികോം അമേരിക്കാസ്, പസഫിക് നെറ്റ് വര്‍ക്ക് കോര്‍പ്പ്, ഇവയുടെ മുഴുവനും ഉടമസ്ഥാവകാശമുള്ള എല്‍സിസിയോട് എന്തുകൊണ്ടാണ് ഇവയ്ക്ക് നിരോധനം ഏര്‍പ്പെടുുത്താന്‍ വൈകുന്നതെന്നും ചോദിച്ചിരുന്നു. തുടര്‍ന്ന് യുഎസ് കമ്പനികളുമായി ചേര്‍ന്ന് പ്രവര്‍ത്തനം പുനരാരംഭിക്കാനും നിര്‍ദേശിച്ചിരുന്നു. ഫെഡറല്‍ കമ്മ്യൂണിക്കേഷന്‍സ് കമ്മീഷന്‍ ഈ കമ്പനികള്‍ക്ക് അനുമതി നല്‍കിയത് പത്ത് വര്‍ഷം മുമ്പാണ്. 2019 മെയ് മാസത്തില്‍ യുഎസ് സര്‍ക്കാരിന് കീഴില്‍ പ്രവര്‍ത്തിക്കുന്ന മറ്റൊരു ചൈനീസ് കമ്പനിക്കുമെതിരെ രംഗത്തെത്തിയിരുന്നു. ചൈന മൊബൈല്‍ ലിമിറ്റഡ് എന്നായിരുന്നു ഈ കമ്പനിയുടെ പേര്.

എന്തായാലും ആഗോളതലത്തില്‍ തന്നെ ചൈന ഒറ്റപെടുകയാണ് എന്നത് കൂടുതല്‍ വ്യക്തമാക്കുകയാണ്.ഏകാധിപത്യ ഭാവത്തിലേക്കുള്ള ചൈനയുടെ കടന്നുകയറ്റം ചൈനയ്ക്കുതന്നെ കൂടുതല്‍ പ്രതിരോധം സൃഷ്ടിക്കുമെന്നുറപ്പ് .