ചൈനയെന്ന കൊടുംഭീകരന്‍ തുറന്നുവിട്ട കൊടുംഭൂതം കൊറോണ വൈറസ് ഒരു വശത്ത് മറുവശത്ത് ചൈനീസ് താല്‍പര്യം സംരക്ഷണത്തിന് ഏതറ്റംവരെയും പോകുന്ന, ചൈനീസ് ദേശീയവികാരം ആളിക്കത്തിച്ച് നടക്കുന്ന ചൈനയുടെ ക്രൂരപടയാളികള്‍ മറുവശത്ത്. പക്ഷെ തീര്‍ത്തല്ലേ പറ്റൂ.

ചൈനീസ് ദേശീയവികാരം ആളിക്കത്തിച്ച ബ്ലോക് ബസ്റ്റര്‍ സിനിമ വൂള്‍ഫ് വാരിയേഴ്‌സിലെ രംഗം സിനിമാപ്രേക്ഷകരാരും മറക്കില്ല. ആയിരം കാതങ്ങള്‍ കടന്നു ചെന്നും ചൈനയുടെ ശത്രുക്കള്‍ക്ക് മറുപടി നല്‍കും എന്ന സന്ദേശം നല്‍കുന്ന സിനിമ. ചൈനീസ് താല്‍പര്യം സംരക്ഷണത്തിന് ഏതറ്റംവരെയും പോകുന്ന ഈ കഥാപാത്രങ്ങള്‍ സിനിമയിലല്ല ലോകത്തെ വെല്ലുവിളിച്ച് നമുക്കു ചുറ്റുമുണ്ട്, ഗാല്‍വാനില്‍ മാത്രമല്ല ദക്ഷിണ ചൈനക്കടല്‍ മുതല്‍ ഹോങ്കോങ് വരെ തീതുപ്പുന്ന ചൈനീസ് വ്യാളി. ഒരു മഹാവ്യാധിയോട് പോരാടുമ്പോളാണ് ചൈന നമ്മളോട് പോരിനു വന്നത്. ചൈന തന്നെ കുപ്പിയില്‍ നിന്ന് തുറന്നു വിട്ട കൊറോണഭൂതം, അമേരിക്കയടക്കം പറയുന്നത് അങ്ങനെയാണ് മനുഷ്യരാശിക്ക് വെല്ലുവിളിയാകുമ്പോള്‍ സകലമര്യാദകളും ലംഘിച്ച ഈ നടപടിക്ക് ചൈനയെന്ന രാജ്യം എന്തിന് ഇറങ്ങിത്തിരിച്ചു. നമുക്കറിയാം ജനാധിപത്യം തൊട്ടുതീണ്ടിയിട്ടില്ലാത്ത ചൈനയെന്ന ശത്രുരാഷ്ട്രം ഭരണകൂടം ഷി എന്ന ചോദ്യം ചെയ്യപ്പെടാത്ത സഖാവെന്ന് ഭാവിക്കുന്ന് ഏകാധിപതി ചൈനീസ് കമ്യൂണിസ്റ്റ് പാര്‍ട്ടി.

2018 ല്‍ ഷി ചിങ് പിങ്ങെന്ന നേതാവിന് കീഴില്‍ കമ്യൂണിസത്തില്‍നിന്ന് ഏകാധിപത്യത്തിലേക്കുള്ള ചൈനയുടെ മാറ്റം ലോകം ആശങ്കയോടെ കണ്ടു. ബെയ്ജിങ്ങിലെ ജനങ്ങളുടെ ഗ്രേറ്റ് ഹാളില്‍ 2017 ഒക്ടോബര്‍ 18ന് ചേര്‍ന്ന ചൈനീസ് കമ്യൂണിസ്റ്റ് പാര്‍ട്ടിയുടെ 19ാം ദേശീയ കോണ്‍ഗ്രസ് ആധുനിക ചൈനയില്‍ പുതിയൊരു അധ്യായത്തിന് തുടക്കമിട്ടു. മാവോയ്ക്ക് ശേഷം അനിഷേധ്യനായൊരു നേതാവിന്റെ ഉദയം അന്ന് ലോകം കണ്ടു. ഷി ചിങ് പിങ്. അന്ന് തുടങ്ങിയതാണ് ലോകത്തിന്റെ കാലക്കേട്. മാവോ സെദുങ്ങിനും ഡെങ് സിയാവോ പിങ്ങിനും ശേഷം പാര്‍ട്ടി ഭരണഘടനയില്‍ പേരു പരാമര്‍ശിക്കപ്പെട്ട മൂന്നാമത്തെ നേതാവായി ഷി.

ഏക പാര്‍ട്ടിയില്‍നിന്ന് ഏക നേതാവിലേക്ക് മാറുന്ന ചൈനയെയാണ് പിന്നീട് കണ്ടത്. ആജീവനാന്തം അധികാരത്തില്‍ തുടരാന്‍ ഷി ചിന്‍പിങ്ങിന് അനുമതി നല്‍കുന്ന ഭരണഘടനാ ഭേദഗതി പാര്‍ലമെന്റ് വന്‍ഭൂരിപക്ഷത്തോടെ അംഗീകരിച്ചതോടെ ഏകാധിപത്യത്തിലേക്കുള്ള ചൈനയുടെ പ്രയാണം പൂര്‍ണമായി. മാവോയുടെ കാലത്തെ അധികാര ദുര്‍വിനിയോഗവും സാംസ്‌കാരിക വിപ്ലവം ഉള്‍പ്പെടെയുള്ള ഏകാധിപത്യ നടപടികളും ടിയാനന്‍മെന്‍ കൂട്ടക്കൊലയും ജനം മറന്നു. മാധ്യമ സ്വാതന്ത്ര്യം ഉള്‍പ്പെടെയുള്ള ജനാധിപത്യാവകാശങ്ങള്‍ നിഷേധിക്കപ്പെട്ടു. കഴിയുന്ന ജനത ഷി ചിങ് പിങ്ങെന്ന ചക്രവര്‍ത്തിയുടെ ഭരണത്തെ കാര്യമായ ചെറുത്തുനില്‍പൊന്നുമില്ലാതെ സ്വീകരിച്ചു. ലോകത്ത് കരുത്തുറ്റ സാന്നിധ്യം. ലോകത്തെ വന്‍ശക്തിയായി, അമേരിക്കയെ മറികടക്കുന്ന ചൈന. അതാണ് ഷി ചിങ് പിങ്ങിന്റെ മഹത്തായ ചൈന എന്ന സ്വപ്‌നം.