കോഡ് ഓണ് വേജസ് നിയമം കേന്ദ്രസര്ക്കാര് ഉടന് നടപ്പിലാക്കുമെന്നു സൂചന
നിലവിലുള്ള വിവിധ തൊഴില് നിയമങ്ങള് ഏകോപിപ്പിച്ചുകൊണ്ടുള്ള കോഡ് ഓണ് വേജസ് നിയമം കേന്ദ്രസര്ക്കാര് ഉടന് നടപ്പിലാക്കുമെന്നു സൂചന. സെപ്റ്റംബറോടെ നിയമം നടപ്പാക്കാനാണ് ആലോചിക്കുന്നത്.
കഴിഞ്ഞ ഏഴിലെ ഔദ്യോഗിക ഗസറ്റില് തൊഴിലാളികളുടെ വേതനം, ബോണസ്, മറ്റ് ആനുകൂല്യങ്ങള് എന്നിവ സംബന്ധിച്ച കരടുചട്ടങ്ങള് കേന്ദ്രസര്ക്കാര് പ്രസിദ്ധപ്പെടുത്തിയിട്ടുണ്ട്. കരടു ചട്ടങ്ങളില് 45 ദിവസം പൊതുജനാഭിപ്രായം രേഖപ്പെടുത്താം. അതിനുശേഷം ചട്ടങ്ങള് പ്രാബല്യത്തില് വരുത്തുമെന്നാണ് സൂചനകള്.
മിനിമം വേതന നിയമം, വേതനം നല്കല് നിയമം, ബോണസ് നല്കല് നിയമം, തുല്യവേതന നിയമം എന്നിവയ്ക്കു പകരമായാണ് കോഡ് ഓഫ് വേജസ് നിലവില് വരിക. രാജ്യത്ത് 50 കോടി തൊഴിലാളികള്ക്കു പുതിയ വേതന ചട്ടങ്ങളുടെ പ്രയോജനം ലഭിക്കും. കഴിഞ്ഞ വര്ഷം ഓഗസ്റ്റിലാണ് നിയമത്തിന് അംഗീകാരം ലഭിച്ചത്.
വേതനം നല്കുന്നതിലെ കാലതാമസവുമായി ബന്ധപ്പെട്ട പ്രശ്നങ്ങള് പരിഹരിക്കാനും വേതനത്തില് ലിംഗവിവേചനമില്ലെന്ന് ഉറപ്പാക്കാനുമുള്ള വ്യവസ്ഥകളും നിയമത്തിലുണ്ട്. മിനിമം വേതനം, സമയബന്ധിതമായി ശമ്പളം, തൊഴില്മേഖലയും വേതന പരിധിയും കണക്കിലെടുക്കാതെ എല്ലാ ജീവനക്കാര്ക്കും ഏകീകൃതമായി കുറഞ്ഞ വേതനം നല്കല് തുടങ്ങിയവ ചട്ടം വ്യവസ്ഥ ചെയ്യുന്നു.
ഭക്ഷണം, വസ്ത്രം, പാര്പ്പിടം, സര്ക്കാര് പരിഗണിക്കുന്ന മറ്റേതെങ്കിലും ഘടകങ്ങള് എന്നിവ ഉള്പ്പെടെയുള്ളവ പരിശോധിച്ച് അടിസ്ഥാന ജീവിതനിലവാരം കണക്കിലെടുക്കും. അടിസ്ഥാന ജീവിത സാഹചര്യങ്ങള് കണക്കാക്കിയാണ് കുറഞ്ഞ കൂലി കണക്കാക്കുന്നത്. ഇതനുസരിച്ചാവും ഏകീകൃത അടിസ്ഥാന വേതനം നിര്ണയിക്കുക.
https://www.facebook.com/Malayalivartha