കോവിഡ് കാലത്ത് മറ്റൊരു കുതിരകച്ചവടത്തിനൊരുങ്ങി ബി.ജെ.പി; രാജസ്ഥാനില് കോണ്ഗ്രസ് സര്ക്കാരിനെ താഴെ ഇറക്കാന് നീക്കം; എം.എല്.എമാര്ക്ക് 15 കോടി വീതം വാഗ്ദാനം ചെയ്തെ അശോക് ഗെലോട്ട്
കോവിഡ് ലോക്ഡൗണിന് തൊട്ട് മുമ്പ് മധ്യപ്രദേശില് എം.എല്.എമാരെ ചാക്കിട്ടു പിടിച്ച ബി.ജെ.പി തന്ത്രം കോവിഡ് കാലത്തു തന്നെ വീണ്ടും പയറ്റുകയാണ്. ഇത്തവണ വേദി രാജസ്ഥാനാണെന്നു മാത്രം. കഴിഞ്ഞ മാസം രാജ്യസഭയിലേക്ക് ഒഴിവുന്ന സീറ്റിലേക്ക് തെരഞ്ഞെടുപ്പു നടന്ന സമയത്ത് ഇത്തരമൊരു ശ്രമം ബി.ജെ.പി നടത്തിയെങ്കിലും കോണ്ഗ്രസ് അതി ഫലപ്രദമായി നേരിട്ടിരുന്നു. ഇതിന് ഒരു മാസം പിന്നിടുന്നതിന് മുമ്പേ അടുത്ത കുതിരകച്ചവടത്തിന് ബി.ജെ.പി തയ്യാറെടുത്തത്. കോണ്ഗ്രസ് എംഎല്മാരെ കൂറുമാറ്റി, തന്റെ സര്ക്കാരിനെ അട്ടിമറിക്കാനായി ബിജെപി 15 കോടി രൂപ വീതം എംഎല്എമാര്ക്ക് വാഗ്ദാനം ചെയ്തതായി രാജസ്ഥാന് മുഖ്യമന്ത്രി അശോക് ഗെലോട്ട് ആരോപിച്ചു. മാരകമായ കൊറോണ വൈറസ് വ്യാപനം രാജ്യത്തെ വലയ്ക്കുമ്പോളും ബിജെപി രാഷ്ട്രീയ കുതിരക്കച്ചവടം നടത്തുകയാണെന്ന് ഗെലോട്ട് കുറ്റപ്പെടുത്തി. 15 കോടി രൂപ വരെ കൂറുമാറാനായി ബിജെപി എംഎല്എമാര്ക്ക് വാഗ്ദാനം ചെയ്യുന്നു. സംസ്ഥാന സര്ക്കാര് കോവിഡ് പ്രതിസന്ധിയെ നേരിടാന് ജനങ്ങള്ക്കായി രാപ്പകലില്ലാതെ പണിയെടുക്കുമ്പോളാണ് ബിജെപി ഇത്തരത്തിലുള്ള പ്രശ്നങ്ങള് സൃഷ്ടിക്കുന്നതെന്നും അദ്ദേഹം ആരോപിച്ചു.
കഴിഞ്ഞ വര്ഷം കര്ണാടകയിലും ഈ വര്ഷം മധ്യപ്രദേശിലും ബി.ജെ.പി, കോണ്ഗ്രസ് സര്ക്കാരുകളെ അട്ടിമറിച്ചത് ചൂണ്ടിക്കാട്ടിയ അശോക് ഗെലോട്ട്, പണവും മറ്റ് വാഗ്ദാനങ്ങളും എം.എല്.എമാര്ക്ക് ബി.ജെ.പി നല്കിക്കൊണ്ടിരിക്കുകയാണെന്നു പറഞ്ഞു. ഇത് നിരന്തരമായി സംഭവിച്ചുകൊണ്ടിരിക്കുന്നു. 2014ല് കേന്ദ്രത്തില് അധികാരം കിട്ടിയത് മുതല് അവര് വിവിധ സംസ്ഥാനങ്ങളില് ഇതാണ് ചെയ്തുകൊണ്ടിരിക്കുന്നത്. ഗോവയിലും മധ്യപ്രദേശിലും വടക്കുകിഴക്കന് സംസ്ഥാനങ്ങളിലുമൊക്കെ. നാണമില്ലാത്ത ബിജെപിക്കാര് രാജ്യസഭാ തിരഞ്ഞെടുപ്പില് ജയിക്കാന് ഗുജറാത്തില് ഏഴ് എംഎല്എമാരെ വാങ്ങി. രാജസ്ഥാനിലും അവര് ഇതിനാണ് ശ്രമിച്ചത്. എന്നാല് ഞങ്ങളവരെ തടഞ്ഞു. ഒരു പാഠം പഠിപ്പിച്ചു. അവര് കുറേക്കാലത്തേയ്ക്ക് മറക്കാന് സാധ്യതയില്ലാത്ത പാഠം. ജനങ്ങള് എല്ലാ കാണുന്നുണ്ട്. ബിജെപിയുടെ അഹങ്കാരം അടുത്ത തിരഞ്ഞെടുപ്പില് തീരും ഇന്ത്യയിലെ ജനങ്ങള് ബി.ജെ.പിയെ ഒരു പാഠം പഠിപ്പിക്കും ഗെലോട്ട് അഭിപ്രായപ്പെട്ടു.
ചീഫ് വിപ്പ് മഹേഷ് ജോഷി സ്പെഷല് ഓപ്പറേഷന്സ് ഗ്രൂപ്പിനും രാജസ്ഥാന് പോലീസിന്റെ ആന്റി കറപ്ഷന് ബ്യൂറോയ്ക്കും പരാതി നല്കിയിട്ടുണ്ട്. ബി.ജെ.പി വിരണ്ടിരിക്കുകയാണെന്ന് മഹേഷ് ജോഷി അഭിപ്രായപ്പെട്ടു. ജോഷിയും ഡെപ്യൂട്ടി ചീഫ് വിപ്പ് മഹേന്ദ്ര ചൗധരിയും കോണ്ഗ്രസ് എം.എല്.എമാരെ കൂറുമാറാന് കിട്ടില്ലെന്നും ബിജെപി പദ്ധതി വിജയിക്കില്ലെന്നും പറഞ്ഞ് പ്രസ്താവനയിറക്കിയിരുന്നു. 24 എംഎല്എമാരാണ് പ്രസ്താവനയില് ഒപ്പുവച്ചിരിക്കുന്നത്.
200 അംഗ നിയമസഭയില് 107 എംഎല്എമാരാണ് കോണ്ഗ്രസിനുള്ളത്. 12 സ്വതന്ത്ര എം.എല്.എമാരുടെ പിന്തുണയുമുണ്ട്. സി.പി.എമ്മിന്റേയും രാഷ്ട്രീയ ലോക് ദളിന്റേയും ഭാരതീയ ട്രൈബല് പാര്ട്ടിയുടേയും കൂടി അഞ്ച് എംഎല്എമാര്. രണ്ട് എംഎല്എമാരില് ഒരാളായ ബല്വാന് പൂനിയയെ സി.പി.എം അച്ചടക്ക ലംഘനത്തിന് ഒരു വര്ഷത്തേയ്ക്ക് സസ്പെന്ഡ് ചെയ്തിരിക്കുകയാണ്. രാജ്യസഭാ തിരഞ്ഞെടുപ്പില് ബി.ജെ.പിയുടെ സ്ഥാനാര്ത്ഥിക്ക് വിജയസാധ്യത ഇല്ലാതിരുന്നിട്ടും കോണ്ഗ്രസ് സ്ഥാനാര്ത്ഥിക്ക് വോട്ട് ചെയ്തതിനെ തുടര്ന്നാണ് സിപിഎം പൂനിയയ്ക്കെതിരെ നടപടി എടുത്തത്.
https://www.facebook.com/Malayalivartha