രാജ്യത്ത് കൊവിഡ് രോഗമുക്തി നേടിയവരുടെ എണ്ണം അ‌ഞ്ച് ലക്ഷം കടന്നതായി കേന്ദ്ര ആരോഗ്യ മന്ത്രാലയത്തിന്റെ റിപ്പോർട്ട്. കേന്ദ്ര സംസ്ഥാന സര്‍ക്കാരുകള്‍ സ്വീകരിച്ച കൊവിഡ് പ്രതിരോധ നടപടികളാണ് ഇതിന് കാരണമായതെന്ന് മന്ത്രാലയം വ്യക്തമാക്കി. കഴിഞ്ഞ ദിവസം ഇന്ത്യയില്‍ കൊവിഡ് രോഗികളുടെ എണ്ണം എട്ട് ലക്ഷം കടന്നിരുന്നു. 22,123 പേര്‍ മരണപ്പെടുകയും ചെയ്തു.

നിരീക്ഷണ പ്രവര്‍ത്തനങ്ങള്‍, സമയബന്ധിതമായ രോഗനിര്‍ണയം, ക്ലിനിക്കല്‍ മാനേജ്മെന്റ്, എന്നിവയിലൂടെ 5,15,385 പേര്‍ക്കാണ് രാജ്യത്ത് ഇതുവരെ കൊവിഡ് രോഗം ഭേദമായത്. ഇതോടെ രോഗമുക്തി നേടുന്നവരുടെ ശതമാനം 62.78 ആയി ഉയര്‍ന്നു. കഴിഞ്ഞ 24 മണിക്കൂറിനുളളില്‍ 19,870 പേരാണ് രോഗം ഭേദമായി ആശുപത്രിവിട്ടതെന്നും കേന്ദ്ര ആരോഗ്യമന്ത്രാലയം അറിയിച്ചു. രാജ്യത്ത് നിലവില്‍ 2,83,407 ആക്ടീവ് കൊവിഡ് കേസുകളാണുളളത്.

ആര്‍.ടി -പി.സി.ആര്‍ പരിശോധനകള്‍ക്കൊപ്പം റാപ്പിഡ് ആന്റീജന്‍ ടെസ്റ്റ് ഉള്‍പ്പെടുത്തിയതോടു കൂടി രാജ്യത്ത് കൊവിഡ് ടെസ്റ്റുകള്‍ ഗണ്യമായി വര്‍ദ്ധിപ്പിച്ചുവെന്നും മന്ത്രാലയം അറിയിച്ചു.ഐ.സി.എം.ആറിന്റെ കണക്കുകള്‍ പ്രകാരം ഇന്ത്യയില്‍ ഇതുവരെ 1,13,07,002 കൊവിഡ് സാമ്ബിളുകള്‍ പരിശോധിച്ചിട്ടുണ്ട്. കഴിഞ്ഞ ദിവസം മാത്രം 2,82,511 സാമ്ബിളുകളാണ് പരിശോധിച്ചത്.