തമിഴ്‌നാട് മുന്‍മുഖ്യമന്ത്രി ജയലളിതയ്ക്ക് ആഭരണങ്ങളോടും വസ്ത്രങ്ങളോടും ഏറെ ഇഷ്ടമാണെന്ന എത്രയോ കഥകള്‍ ഉണ്ട്. പുസ്തകങ്ങളോടും അത്ര തന്നെ ഇഷ്ടമായിരുന്നെന്നു വെളിപ്പെടുത്തുന്ന കണക്കുകളാണിപ്പോള്‍ അവരുടെ വസതിയായിരുന്ന വേദനിലയം പറയുന്നത്.

ജയലളിതയുടെ പോയസ് ഗാര്‍ഡനിലെ വസതി സര്‍ക്കാര്‍ സ്മാരകമാക്കുന്നതിനു മുന്നോടിയായി, ഇവിടത്തെ 32,721 വസ്തുക്കളുടെ പട്ടിക തയാറാക്കിയപ്പോഴാണു പുസ്തകക്കണക്ക് പുറത്തറിഞ്ഞത്. 24,322 ചതുരശ്ര അടി വിസ്തീര്‍ണമുള്ള കെട്ടിടത്തിന്റെ വിലയായി 68 കോടി രൂപ കോടതിയില്‍ കെട്ടിവച്ചതിനു ശേഷമാണു സര്‍ക്കാര്‍ ഏറ്റെടുക്കല്‍ നടപടി ആരംഭിച്ചത്. ഇതിനെതിരെ ജയയുടെ സഹോദര പുത്രി ദീപ ജയകുമാര്‍ കോടതിയെ സമീപിക്കാനൊരുങ്ങുകയാണ്.

ദീപയും സഹോദരന്‍ ദീപക്കുമാണ് ജയയുടെ പിന്തുടര്‍ച്ചാവകാശികളെന്ന് മദ്രാസ് ഹൈക്കോടതി വിധിച്ചിരുന്നു. ജയയും തോഴി ശശികലയും ശശികലയുടെ ബന്ധുക്കളും ജോലിക്കാരുമായി ഒട്ടേറെപ്പേരാണു വേദനിലയത്തില്‍ താമസിച്ചിരുന്നത്. അനധികൃത സ്വത്തുകേസില്‍ ജയിലിലാണിപ്പോള്‍ ശശികല.

വേദനിലയത്തിലുള്ള മറ്റു വസ്തുക്കള്‍: സ്വര്‍ണം (14 ആഭരണങ്ങള്‍): 4 കിലോഗ്രാം, വെള്ളി (867 ആഭരണങ്ങള്‍): 601 കിലോ, ടിവി: 11 എണ്ണം, ഫ്രിജ്: 10 എണ്ണം, എസി: 38 എണ്ണം, ഫര്‍ണിച്ചര്‍: 556, അടുക്കള വസ്തുക്കള്‍: 6,514, പൂജാ വസ്തുക്കള്‍: 15,അടുക്കള റാക്കുകളും അടുക്കള ഫര്‍ണിച്ചറും: 12,വസ്ത്രം, ചെരിപ്പ്, കര്‍ട്ടന്‍, കിടക്ക വിരി: 10,438, ലാന്‍ഡ്, മൊബൈല്‍ ഫോണുകള്‍: 29, അടുക്കളയിലെ ഇലക്ട്രിക് സാധനങ്ങള്‍: 221, മറ്റ് ഇലക്ട്രിക് വസ്തുക്കള്‍: 251
,മെമന്റോ: 394, ലൈസന്‍സ്, കോടതി രേഖകള്‍, ഐടി സ്റ്റേറ്റ്‌മെന്റുകള്‍: 653, സ്റ്റേഷനറി സാധനങ്ങള്‍: 253, സ്യൂട്ട്‌കേസുകള്‍: 65, സൗന്ദര്യവര്‍ക വസ്തുക്കള്‍/മേക്കപ്പ്: 108, ക്ലോക്കുകള്‍: 6, ഫോട്ടോസ്റ്റാറ്റ്, പ്രിന്റര്‍ മെഷീന്‍: 1 വീതം