ഹൈക്കോടതി നടപടിയില് ജുഡീഷ്യറിയുടെ അച്ചടക്കരാഹിത്യം ആരോപിച്ച് രാജസ്ഥാന് സ്പീക്കര് വീണ്ടും സുപ്രീം കോടതിയില്
രാജസ്ഥാന് സ്പീക്കര് വിമത എംഎല്എമാര്ക്കെതിരെയുള്ള നടപടി നിര്ത്തിവയ്ക്കാന് ആവശ്യപ്പെട്ട രാജസ്ഥാന് ഹൈക്കോടതി നടപടിക്കെതിരെ വീണ്ടും സുപ്രീം കോടതിയില്. ഹൈക്കോടതി ഉത്തരവ് സ്റ്റേ ചെയ്യണമെന്ന് ആവശ്യപ്പെട്ടുള്ള ഹര്ജിയില് ഹൈക്കോടതി ലക്ഷ്മണരേഖ കടന്നിരിക്കുകയാണെന്നും ജുഡീഷ്യറിയുടെ അച്ചടക്കരാഹിത്യമാണ് വെളിവായിരിക്കുന്നതെന്നും ആരോപണം ഉന്നയിക്കുന്നുണ്ട്.
വിമതര്ക്ക് കാരണം കാണിക്കല് നോട്ടിസ് നല്കിയ നടപടിയില് വിമതര് നല്കിയ ഹര്ജിയില് ഹൈക്കോടതി വിധി വന്നശേഷം പരിശോധിക്കാം എന്ന നിലപാടാണ് സുപ്രീം കോടതി സ്വീകരിച്ചിരുന്നത്. എന്നാല് അഭിപ്രായ സ്വാതന്ത്ര്യവുമായി ബന്ധപ്പെട്ടു വിമത എംഎല്എമാര് കൂറുമാറ്റ നിയമത്തിലെ വ്യവസ്ഥകള് തന്നെ ചോദ്യം ചെയ്തതോടെ കോടതി ഇക്കാര്യത്തില് വിശദമായ വാദം കേള്ക്കണമെന്ന നിലപാടും സ്വീകരിച്ചു.
സുപ്രീം കോടതിയിലെ കേസ് തീരുന്നതുവരെ വിധി പറയുന്നതു ഹൈക്കോടതി മാറ്റിവയ്ക്കുക കൂടി ചെയ്തതോടെ കേസിലെ കാലതാമസം ഒഴിവാക്കുന്നതു കൂടി ലക്ഷ്യമിട്ടു സ്പീക്കര് സുപ്രീം കോടതിയിലെ ഹര്ജി പിന്വലിക്കുകയായിരുന്നു. സ്പീക്കറുടെ നടപടിക്കെതിരെ വിമതര് നല്കിയ ഹര്ജിയില് ഹൈക്കോടതി വിധി ഇനിയുമുണ്ടായിട്ടില്ല.
ഇതേസമയം ബിജെപി എംഎല്എ മദന് ദിലാവര്, കോണ്ഗ്രസില് ലയിച്ച ബിഎസ്പി എംഎല്എമാരെ അയോഗ്യരാക്കണം എന്നാവശ്യപ്പെട്ടു നല്കിയ പരാതിയില് ഹൈക്കോടതി ഇന്നു വാദം കേള്ക്കും. ഇതേ വിഷയത്തില് ഇന്നലെ ബിഎസ്പിയും ഹൈക്കോടതിയില് ഹര്ജി നല്കി. ലയനം റദ്ദു ചെയ്യണമെന്നാവശ്യപ്പെട്ടു സ്പീക്കര്ക്കു പരാതി നല്കുമെന്നും ബിഎസ്പി സംസ്ഥാന പ്രസിഡന്റ് ഭഗവാന് സിങ് ബാബ പറഞ്ഞു. എന്നാല് എല്ലാ നടപടിക്രമങ്ങളും പാലിച്ചാണു തങ്ങള് കോണ്ഗ്രസില് ചേര്ന്നതെന്നും വിശ്വാസ വോട്ടെടുപ്പുണ്ടായാല് കോണ്ഗ്രസിനു തന്നെ വോട്ട് നല്കുമെന്നും ബിഎസ്പി വിട്ട യോഗേന്ദ്ര അവാന പറഞ്ഞു.
അഴിമതിക്കേസുകളില് നിന്നു രക്ഷപ്പെടാന് മായാവതിയും സഹോദരനും ബിജെപിക്കുവേണ്ടി കളിക്കുകയാണെന്നു കോണ്ഗ്രസ് നേതാവ് പി.എല്. പൂനിയയും പറഞ്ഞു. എംഎല്എമാര്ക്കു കൂറുമാറാന് പണം വാഗ്ദാനം ചെയ്ത കേസില് പ്രതി ചേര്ക്കപ്പെട്ട വിമത എംഎല്എ ഭന്വര്ലാല് ശര്മയും കേസ് റദ്ദാക്കണമെന്നാവശ്യപ്പെട്ടു ഹൈക്കോടതിയെ സമീപിച്ചു. കേസ് എന്ഐഎയെ ഏല്പിക്കണമെന്നും അദ്ദേഹം ആവശ്യപ്പെട്ടു.
https://www.facebook.com/Malayalivartha
