സ്‌കൂള്‍ വിദ്യാഭ്യാസവും ഉന്നതതല വിദ്യാഭ്യാസവും അടിമുടി അഴിച്ചുപണിയാന്‍ ലക്ഷ്യമിട്ട് പുതിയ വിദ്യാഭ്യാസ നയം രൂപീകരിച്ചിരിക്കുകയാണ് കേന്ദ്രസര്‍ക്കാര്‍ . അങ്കണവാടിമുതല്‍ കോളജ്തലംവരെ സമഗ്രമായി ഉടച്ചുവാര്‍ക്കുന്ന ദേശീയ വിദ്യാഭ്യാസ നയത്തിന് കേന്ദ്രമന്ത്രിസഭയുടെ അംഗീകാരം ലഭിച്ചിരിക്കുകയാണ് . സാങ്കേതിക വിദ്യയിലൂന്നിയുളള ദേശീയ വിദ്യാഭ്യാസ നയമാണ് ഇനി വരാന്‍ പോകുന്നത്. 2030 ഓടെ എല്ലാവര്‍ക്കും വിദ്യാഭ്യാസം എന്നതാണ് ലക്ഷ്യം. കടഞഛ മുന്‍ ചെയര്‍മാന്‍ ഡോ. കസ്തൂരിരംഗന്റെ നേതൃത്വത്തിലുള്ള സമിതി തയ്യാറാക്കിയ പുതിയ ദേശീയ വിദ്യാഭ്യാസ നയം 2019 മേയിലായിരുന്നു സര്‍ക്കാരിന് സമര്‍പ്പിച്ചത്. സര്‍ക്കാര്‍ വെബ്സൈറ്റില്‍ നേരത്തെ പ്രസിദ്ധീകരിച്ച കരട് നയത്തില്‍ പൊതുജനങ്ങളില്‍നിന്നും വിദ്യാഭ്യാസ വിദഗ്ധരില്‍നിന്നും സംസ്ഥാന സര്‍ക്കാരുകളില്‍നിന്നും നിര്‍ദേശങ്ങള്‍ സ്വീകരിച്ച ശേഷമാണ് വിദ്യാഭ്യാസ നയത്തിന് അന്തിമ രൂപം നല്‍കിയത്. നിലവില്‍ സ്‌കൂള്‍ പാഠ്യപദ്ധതിയുടെ ഭാഗമല്ലാത്ത മൂന്നു മുതല്‍ ആറു വയസ്സുവരെയുള്ള കുട്ടികളെക്കൂടി ഉള്‍പ്പെടുത്തിയാണ് പുതിയ നയം. ഇതോടെ, 10 + 2 ഘടന ഒഴിവാക്കി പകരം 5 + 3 + 3 + 4 എന്ന രീതിയിലാകും പാഠ്യപദ്ധതി. അഞ്ചാംക്ലാസ് വരെ മാതൃഭാഷയില്‍ അധ്യയനവും ആറാം ക്ലാസ് മുതല്‍ ഇന്റേണ്‍ഷിപ്പോടെ തൊഴിലധിഷ്ഠിത വിദ്യാഭ്യാസവും പുതിയ നയത്തിന്റെ പ്രത്യേകതയാണ്. 10, 12 ക്ലാസുകളില്‍ ബോര്‍ഡ് പരീക്ഷകള്‍ തുടരും.
1986-ലെ ദേശീയ വിദ്യാഭ്യാസനയം പൊളിച്ചെഴുതിക്കൊണ്ടാണ് ഡോ. കസ്തൂരിരംഗന്‍ അധ്യക്ഷനായ സമിതി പ്രീ സ്‌കൂള്‍ (അങ്കണവാടി) മുതല്‍ 12-ാം ക്ലാസ്വരെ സാര്‍വത്രികവിദ്യാഭ്യാസത്തിന് അവസരമൊരുക്കുന്ന നയം തയ്യാറാക്കിയത്. ഇതില്‍ 1992 ലായിരുന്നു ഒടുവില്‍ മാറ്റംവരുത്തിയത്. മാനവവിഭവശേഷി വികസന മന്ത്രാലയത്തിന്റെ പേര് വിദ്യാഭ്യാസ മന്ത്രാലയമെന്ന് മാറ്റാമെന്നും കാബിനെറ്റ് അംഗീകരിച്ചു. സ്‌കൂള്‍ വിദ്യാഭ്യാസത്തില്‍ സമഗ്രമായ മാറ്റം വരുത്താനുള്ള നിര്‍ദേശങ്ങളടങ്ങിയതാണ് പുതിയ വിദ്യാഭ്യാസ നയം. 3 വയസ്സുമുതല്‍ 18 വയസ് വരെ നിര്‍ബന്ധിത വിദ്യാഭ്യാസം ഉറപ്പാക്കും. ഘജ, ഡജ, ഹൈസ്‌കൂള്‍, ഹയര്‍ സെക്കന്‍ഡറി സമ്പ്രദായം ഇല്ലാതാക്കും.

അതോടുകൂടി

* പാഠ്യവിഷയം, പാഠ്യേതരവിഷയം, തൊഴിലധിഷ്ഠിത വിദ്യാഭ്യാസം എന്നിങ്ങനെ കര്‍ശന വേര്‍തിരിവുണ്ടാവില്ല. കായികം, യോഗ, നൃത്തം, സംഗീതം, ചിത്രകല, പെയിന്റിങ്, ശില്പനിര്‍മിതി, മരപ്പണി, പൂന്തോട്ടനിര്‍മാണം, ഇലക്ട്രിക് ജോലികള്‍ എന്നിവയെല്ലാം പാഠ്യപദ്ധതിയുടെ ഭാഗമാകും.

* ആര്‍ട്സ്, സയന്‍സ് വേര്‍തിരിവ് കുറച്ച് ഇഷ്ടമുള്ളത് തിരഞ്ഞെടുക്കാന്‍ അവസരമുണ്ടാകും പ്രത്യേകിച്ച് സെക്കന്‍ഡറി തലത്തില്‍.

* മൂന്ന്, അഞ്ച്, എട്ട് ക്ലാസുകളിലെ വിദ്യാര്‍ഥികള്‍ക്ക് അതത് അതോറിറ്റികളുടെ പരീക്ഷകള്‍ ഉണ്ടാകും

ആറാം ക്ലാസ് മുതല്‍ സ്‌കൂളുകളില്‍ തൊഴിലധിഷ്ഠിത വിദ്യാഭ്യാസം ആരംഭിക്കും ഒപ്പം ഇന്റേണ്‍ഷിപ്പും ഉള്‍പ്പെടുത്തും. സ്‌കൂള്‍ വിദ്യാഭ്യാസത്തിനായുള്ള പുതിയതും സമഗ്രവുമായ ദേശീയ പാഠ്യപദ്ധതി, എന്‍സിഎഫ്എസ്ഇ 2020-21 എന്‍സിഇആര്‍ടി വികസിപ്പിക്കും.

മൂന്നു വയസ്സുമുതല്‍ വിദ്യാഭ്യാസം തുടങ്ങുന്ന രീതിയിലാണ് പരിഷ്‌കരണം. മൂന്നു മുതല്‍ ആറു വയസ്സുവരെയുള്ള മൂന്നുവര്‍ഷം പ്രീ സ്‌കൂള്‍ കാലമാണ്. ഇതിനൊപ്പം ഒന്നാംക്ലാസും രണ്ടാംക്ലാസും ചേരുന്ന അഞ്ചു വര്‍ഷമാണ് ആദ്യഘട്ടം. മൂന്നു മുതല്‍ എട്ടു വയസ്സുവരെയുള്ള കുട്ടികള്‍ ഇതില്‍ ഉള്‍പ്പെടും. മൂന്നു മുതല്‍ അഞ്ചാം ക്ലാസ് വരെ (811 വയസ്സ്) രണ്ടാംഘട്ടം അഥവാ പ്രിപ്പറേറ്ററി സ്റ്റേജ്. അടുത്ത മിഡില്‍ സ്റ്റേജില്‍ ആറു മുതല്‍ എട്ടാം ക്ലാസ് വരെ (11 14വയസ്സ്) ഉണ്ടാകും. പിന്നീടുള്ള സെക്കന്‍ഡറി സ്റ്റേജില്‍ ഒമ്പതു മുതല്‍ 12-ാം ക്ലാസുവരെ (1418 വയസ്സ്) ഉള്‍പ്പെടുത്തും.
കോത്താരി കമ്മീഷന്റെ നിര്‍ദേശങ്ങള്‍ സ്വീകരിച്ച് 1968-ല്‍ രൂപം നല്‍കിയ വിദ്യാഭ്യാസ നയപ്രകാരമാണ് സ്‌കൂള്‍ വിദ്യാഭ്യാസം 10+2 രീതി അവംലംബിച്ചത്.

ഒന്നു മുതല്‍ 12 വരെയുള്ള ക്ലാസുകളെ വിവിധ ഘട്ടങ്ങളായി തിരിച്ച രീതിയാണ് നിലവിലെ 10+2 രീതി. 1 മുതല്‍ 5 വരെ പ്രൈമറി, 6 മുതല്‍ 8 വരെ അപ്പര്‍ പ്രൈമറി, 9, 10 ക്ലാസുകള്‍ സെക്കന്‍ഡറിയും 11, 12 ക്ലാസുകള്‍ ഹയര്‍ സെക്കന്‍ഡറി ക്ലാസുകളുമായി കണക്കാക്കുന്ന രീതിയാണിത്. പുതിയ നയത്തില്‍ ഹയര്‍ സെക്കന്‍ഡറി എന്ന വിഭാഗം ഒഴിവാക്കി 11, 12 ക്ലാസുകളെ സെക്കന്‍ഡറി വിദ്യാഭ്യാസത്തിന്റെ ഭാഗമാക്കാന്‍ ശുപാര്‍ശ ചെയ്യുന്നു. അതായത് പുതിയ വിദ്യാഭ്യാസ സമ്പ്രദായത്തില്‍ 18 വര്‍ഷം കൊണ്ട് 12 ഗ്രേഡുകളാണുണ്ടാകുക. മാത്രമല്ല അടുത്ത 15 വര്‍ഷത്തിനുള്ളില്‍ അഫിലിയേറ്റഡ് കോളേജ് സമ്പ്രദായം പൂര്‍ണ്ണമായും നിര്‍ത്തലാക്കും. മറ്റൊരു പ്രധാന തീരുമാനം എന്ന് പറയുന്നത് എംഫില്‍ നിര്‍ത്തലാക്കുന്നതാണ്.

അണ്ടര്‍ ഗ്രാജുവേറ്റ് കോഴ്സുകള്‍ മൂന്നോ നാലോ വര്‍ഷമായിരിക്കും. ഈ കോഴ്സുകളിലെ പഠനം ഇഷ്ടാനുസരണം ഇടയ്ക്ക് വച്ച് നിര്‍ത്താനും ഇടവേളയെടുക്കാനും പുതിയ നയം അനുവദിക്കുന്നുണ്ട്. അതായത് രണ്ടുവര്‍ഷം കഴിഞ്ഞ് പഠനം നിര്‍ത്തിയാല്‍ അതുവരെ പഠിച്ചതിനുള്ള സര്‍ട്ടിഫിക്കറ്റ് ലഭിക്കും. നിയമം, ആരോഗ്യം ഒഴികെയുള്ള എല്ലാ കോഴ്സുകളും ഉന്നത വിദ്യാഭ്യാസ മേഖലയില്‍ ഒരു അതോറിറ്റിയുടെ കീഴിലായിരിക്കും.

വെറും പഠനത്തെക്കാള്‍ അറിവിനാണ് ഇനി പ്രാധാന്യം കൊടുക്കുക. ബോര്‍ഡ് പരീക്ഷകള്‍ ഊന്നല്‍ നല്‍കുക അറിവിനായിരിക്കും. അധ്യാപകരുടെ വിലയിരുത്തല്‍ കൂടാതെ സഹവിദ്യാര്‍ത്ഥികളുടെ വിലയിരുത്തല്‍ കൂടി ഉള്‍പ്പെടുന്നതായിരിക്കും ഇനി മുതല്‍ റിപ്പോര്‍ട്ട് കാര്‍ഡ്. 34 വര്‍ഷമായി വിദ്യാഭ്യാസ നയത്തില്‍ മാറ്റമില്ലാതെ തുടരുകയായിരുന്നുവെന്ന് നയം പ്രഖ്യാപിച്ചുകൊണ്ട് കേന്ദ്രമന്ത്രി പ്രകാശ് ജാവഡേക്കര്‍ പറഞ്ഞു.
അതെ,ഇന്ത്യന്‍ വിദ്യാഭ്യാസ രംഗത്ത് വിപ്ലവകരമായ മാറ്റങ്ങള്‍ക്ക് തുടക്കം കുറിച്ചിരിക്കുന്നു. പുതു തലമുറയുടെ ബൗദ്ധിക ,പാഠ്യ ,പഠ്യേതര മികവുകള്‍ക്കെല്ലാം ഊന്നല്‍ നല്‍കികൊണ്ടുള്ള ഈ സമഗ്ര വിദ്യാഭ്യാസ പരിഷ്‌ക്കരണം പുതിയ വൈജ്ഞാനിക വിപ്ലവത്തിന് തുടക്കമാകുമെന്നു തന്നെ നമുക്കു പ്രതീക്ഷിക്കാം .