ബി.എസ്.പി-യില്‍ നിന്നും പുറത്തുപോയി കോണ്‍ഗ്രസ് സര്‍ക്കാരിന്റെ ഭാഗമായ തങ്ങളുടെ പഴയ ആറ് എം.എല്‍.എമാരുടെ ലയനനടപടി താല്‍ക്കാലികമായി മരവിപ്പിക്കണമെന്ന ബി.എസ്.പിയുടെ ആവശ്യം രാജസ്ഥാന്‍ ഹൈക്കോടതി തള്ളി. കേസ് ഏകാംഗബെഞ്ചിന്റെ പരിഗണനയ്ക്കു വിട്ടു. 102 എം.എല്‍.എമാരുടെ പിന്തുണ അവകാശപ്പെടുന്ന അശോക് ഗെലോട്ട് സര്‍ക്കാരിന് താല്‍ക്കാലിക ആശ്വാസമേകുന്നതാണിത്.

200 അംഗ സഭയില്‍ കേവല ഭൂരിപക്ഷത്തിനു 101 പേരുടെ പിന്തുണ വേണമെന്നിരിക്കെ തങ്ങളുടെ കൂടെ 102 പേരുണ്ടെന്നാണ് ഗെലോട്ട് അവകാശപ്പെടുന്നത്. മുന്‍ ഉപമുഖ്യമന്ത്രി സച്ചിന്‍ പൈലറ്റും മറ്റ് 18 വിമതരുമുയര്‍ത്തിയ കലാപത്തെ നേരിടാന്‍ ഈ ആറ് എം.എല്‍.എമാരുടെ പിന്തുണ കോണ്‍ഗ്രസ് സര്‍ക്കാരിന് അനിവാര്യമാണ്.

സഭയില്‍ പതിനാലാം തീയതി വിശ്വാസവോട്ട് നടന്നേക്കും. ഈ ആറ് എം.എല്‍.എമാര്‍ കൂടെയില്ലെങ്കില്‍ ഭരണപക്ഷത്ത് ശേഷിക്കുന്നത് 96 അംഗങ്ങളാവും. മറുവശത്ത് ബി.ജെ.പിക്ക് 72 എം.എല്‍.എമാരുണ്ട്. കോണ്‍ഗ്രസ് വിമതരും മൂന്ന് സ്വതന്ത്രരും പിന്തുണച്ചാല്‍ അംഗബലം 97 ആകും. ആറുപേര്‍ക്ക് അയോഗ്യത കല്‍പ്പിച്ചാല്‍ കേവല ഭൂരിപക്ഷത്തിനുള്ള എണ്ണം 101-ല്‍ നിന്ന് 97 ആയി ചുരുങ്ങുന്നതിലാണ് ബി.ജെ.പിയുടെ പ്രതീക്ഷ.

11-ാം തീയതി ബി.എസ്.പി. എം.എല്‍.എമാരുടെ ലയനവിഷയത്തില്‍ സിംഗിള്‍ ബെഞ്ച് തീരുമാനം പറയുമെന്നാണ് കണക്കുകൂട്ടല്‍. വിധി എന്തായാലും വിശ്വാസപ്രമേയം അവതരിപ്പിക്കാനിരിക്കുന്ന 14-നു മുമ്പ് അപ്പീല്‍ നല്‍കാനാകുമെന്ന ശുഭപ്രതീക്ഷ ഭരണപക്ഷത്തുമുണ്ട്.

ബി.ജെ.പിയും ബി.എസ്.പിയും ആറ് എം.എല്‍.എമാരുടെ ലയനത്തിന് അനുമതി നല്‍കിയ സ്പീക്കറുടെ നിലപാടിനെ ചോദ്യംചെയ്ത് നേരത്തെതന്നെ കോടതിയെ സമീപിച്ചിരുന്നു. എന്നാല്‍, എം,എല്‍.എമാര്‍ സഭയില്‍ തുടരുന്നത് വിലക്കാന്‍ ഏകാംഗബെഞ്ച് തയാറായില്ല.

101 സീറ്റുകള്‍ നേടിയ കോണ്‍ഗ്രസ് പക്ഷത്തേക്ക് കഴിഞ്ഞ സെപ്റ്റംബറിലാണ് ആറ് ബി.എസ്.പി എം.എല്‍.എമാര്‍ കൂറുമാറിയത്. തിരിച്ചടിക്കാന്‍ അവസരം പാര്‍ത്തിരുന്ന ബി.എസ്.പിക്കും നേതാവ് മായാവതിക്കും വീണുകിട്ടിയ വടിയായി ഇപ്പോള്‍ സച്ചിന്‍പൈലറ്റ് കോണ്‍ഗ്രസില്‍ ഉയര്‍ത്തിയ കലാപം.