രാജ്യത്തെ വിദ്യാഭ്യാസ സ്ഥാപനങ്ങള് സെപ്റ്റംബര് ഒന്നു മുതല് തുറന്നേക്കുമെന്ന് സൂചന
ലോക് ഡൗണിനെ തുടർന്ന് അടച്ചിട്ട രാജ്യത്തെ വിദ്യാഭ്യാസ സ്ഥാപനങ്ങള് സെപ്റ്റംബര് ഒന്നു മുതല് തുറന്നേക്കുമെന്ന് സൂചന. സ്കൂളുകള് തുറക്കുന്നത് സംബന്ധിച്ച മാര്ഗരേഖ ഓഗസ്റ്റ് അവസാനം കേന്ദ്ര സര്ക്കാര് പുറത്തിറക്കും. സെപ്റ്റംബര് ഒന്നിനും നവംബര് 14 നും ഇടയില് ഘട്ടം ഘട്ടമായി സ്കൂളുകള് തുറക്കാനാണ് തീരുമാനം. എന്നാല് കോവിഡ് വ്യാപന സാധ്യതകള് കൂടി കണക്കിലെടുത്ത് സ്കൂളുകള് എപ്പോള് തുറക്കണം എന്ന് തീരുമാനിക്കാന് ഉള്ള അധികാരം സംസ്ഥാനങ്ങള്ക്ക് നല്കുമെന്നാണ് റിപ്പോർട്ട്.
സ്കൂളുകള് തുറക്കുന്നത് സംബന്ധിച്ച കേന്ദ്ര മാനവ വിഭവശേഷി മന്ത്രാലയത്തിന്റെ നിര്ദേശം കഴിഞ്ഞ ദിവസം കേന്ദ്ര ആരോഗ്യമന്ത്രി ഹര്ഷ് വര്ധന്റെ അധ്യക്ഷതയില് ചേര്ന്ന വിവിധ കേന്ദ്ര മന്ത്രാലയങ്ങളുടെ സെക്രട്ടറിമാര് അടങ്ങുന്ന സമിതി ചര്ച്ച ചെയ്തിരുന്നു. കോവിഡിന് ശേഷം വിദ്യാലയങ്ങള് വിജയകരമായി തുറന്ന് പ്രവര്ത്തിപ്പിച്ച സ്വിറ്റ്സര്ലാന്ഡ് മാതൃകയാകും ഇന്ത്യയിലും പ്രാവർത്തികമാക്കുക. സ്കൂളില് ഓരോ തലത്തിലും നാല് ഡിവിഷനുകള് ഉണ്ടെങ്കില് രണ്ട് ഡിവിഷന് ഒരു സമയവും, മറ്റ് രണ്ട് ഡിവിഷന് മറ്റൊരു സമയവും ആകും ക്ലാസുകള് ഉണ്ടായിരിക്കുക.
ക്ലാസുകളില് കുട്ടികളെ സാമൂഹിക അകലം പാലിച്ച് ആയിരിക്കും ഇരുത്തുന്നത്. ആദ്യ പതിനഞ്ച് ദിവസം സ്കൂളുകളിലെ 10,11,12 ക്ലാസുകൾ പ്രവര്ത്തിക്കാന് അനുവദിക്കും. തുടര്ന്ന് 6 മുതല് 9 വരെയുള്ള ക്ലാസുകളുടെ പ്രവര്ത്തനം ആരംഭിക്കും. പ്രൈമറി, പ്രീ പ്രൈമറി ക്ലാസുകള് ഉടന് തുറക്കില്ല.
രണ്ട് കുട്ടികള് തമ്മില് ആറടി അകലത്തില് മാത്രമേ ഇരിക്കാന് അനുവദിക്കാന് ഇടയുള്ളു. മോര്ണിങ് അസംബ്ലി, സ്പോര്ട്സ് പീരീഡ്, കായിക മത്സരങ്ങള് എന്നിവ ആദ്യഘട്ടത്തില് അനുവദിച്ചേക്കില്ല. സ്കൂളുകളില് ഷിഫ്റ്റ് ഏര്പ്പെടുത്തും. രാവിലെ 8 മുതല് 11 വരെയും, 12 മുതല് മൂന്ന് വരെയും ആകും ഷിഫ്റ്റ്. ഇടവേള ആയി ലഭിക്കുന്ന ഒരു മണിക്കൂര് സ്കൂള് സാനിറ്റൈസ് ചെയ്യാന് അനുവദിക്കും. അധ്യാപക, അനധ്യാപക ജീവനക്കാരില് 33 ശതമാനം മാത്രമാകും ഒരു സമയം സ്കൂളില് അനുവദിക്കുക.
കോവിഡ് വ്യാപനം കുറഞ്ഞ സംസ്ഥാനങ്ങള് സ്കൂളുകള് തുറക്കാന് അനുവദിക്കണമെന്ന് കേന്ദ്ര സര്ക്കാരിനോട് അഭ്യര്ഥിച്ചിരുന്നു. സെപ്റ്റംബര് മുതല് വിദ്യാഭ്യാസ സ്ഥാപനങ്ങള് തുറക്കാന് അനുവദിക്കണം എന്നാണ് കേരളം മുന്നോട്ട് വച്ചിരുന്ന ആവശ്യം. ഈ ആവശ്യങ്ങള് എല്ലാം കണക്കിലെടുത്ത് ആണ് അണ്ലോക് 4 മുതല് വിദ്യാഭ്യാസ സ്ഥാപനങ്ങള് തുറക്കാന് കേന്ദ്ര സര്ക്കാര് അനുമതി നല്കാന് തീരുമാനിച്ചിരിക്കുന്നത്.
https://www.facebook.com/Malayalivartha