അയോധ്യയിസെ രാമക്ഷേത്രത്തിന്റെ ഭൂമി പൂജയുടെ തല്‍സമയ സംപ്രേഷണം കണ്ടത് 16 കോടിയോളം പേര്‍. ദൂരദര്‍ശനിലൂടെയാണ് ഇത്രയധികം പേര്‍ ഭൂമി പൂജ കണ്ടതെന്ന് പ്രസാര്‍ ഭാരതി അറിയിച്ചു. പ്രസാര്‍ ഭാരതി സിഇഒ ശേഖര്‍ വെമ്പതി തന്നെയാണ് ട്വിറ്ററിലൂടെ ഈ കാര്യം അറിയിച്ചത്. തല്‍സമയ സംപ്രേഷണത്തിന്റെ ആകെ കാഴ്ച സമയം 700 കോടി മിനിറ്റുകളാണെന്നാണ് ദൂരദര്‍ശന്‍ അവകാശപ്പെടുന്നത്.

ഓഗസ്റ്റ് 5ന് ബുധനാഴ്ച രാവിലെ 10:45 നും ഉച്ചകഴിഞ്ഞ് 2 നും ഇടയില്‍ രാജ്യത്തെ 200 ഓളം ടിവി ചാനലുകള്‍ ദൂരദര്‍ശന്റെ തത്സമയ കവറേജാണ് പ്രക്ഷേപണം ചെയ്തത്. ഇതാണ് കാഴ്ചക്കാരെ വര്‍ധിപ്പിച്ചതെന്ന് പ്രസാര്‍ ഭാരതി സിഇഒ ശശി ശേഖര്‍ വെമ്പതി ട്വീറ്റ് ചെയ്തു.എന്നാല്‍ പ്രസാര്‍ഭാരതിയുടെ കണക്കുകള്‍ ശരിയാണോ എന്ന നിലയില്‍ രാജ്യത്തെ ലിവിഷന്‍ നിരീക്ഷണ ഏജന്‍സി ബ്രോഡ്കാസ്റ്റ് ഓഡിയന്‍സ് റിസര്‍ച്ച് കൗണ്‍സില്‍ (ബാര്‍ക്ക്) പ്രതികരിച്ചിട്ടില്ലെന്നാണ് റിപ്പോര്‍ട്ട്. അതേ സമയം ഈ കണക്കുകള്‍ ശരിയാണെങ്കില്‍ സാധാരണ ദൂരദര്‍ശന്‍ പ്രക്ഷേപണം ചെയ്യാറുള്ള തല്‍സമയ ചടങ്ങുകളുടെ ചരിത്രത്തിലെ ഏറ്റവും വലിയ കാഴ്ചക്കാരെ കൂട്ടിയ പരിപാടിയാകും അയോധ്യ ഭൂമി പൂജ. അയോധ്യ ഭൂമിപൂജ ദിനത്തില്‍ ഡി.ഡി നാഷണലിന്റെ യുട്യൂബ് ചാനല്‍ ഒരു കോടി മിനുട്ടോളം കാഴ്ച കാണിക്കുന്നുവെന്നും പ്രസാര്‍ഭാരതി സിഇഒ പറയുന്നു. വിശദമായ ടിവി വ്യൂവര്‍ഷിപ്പ് ഡേറ്റയ്ക്കായി ഞങ്ങള്‍ കാത്തിരിക്കുകയാണ് എന്നും പ്രസാര്‍ഭാരതി സിഇഒ അറിയിച്ചു.

പ്രധാനമന്ത്രി നരേന്ദ്രമോദി ഭൂമിപൂജ നിര്‍വഹിച്ച ചടങ്ങില്‍ നിരവധി ബി.ജെ.പി, ആര്‍.എസ്.എസ് നേതാക്കളും സന്യാസിമാരുമാത്രമാണ് പങ്കെടുക്കാന്‍ അനുമതിയുണ്ടായിരുന്നത്. ദൃശ്യങ്ങള്‍ പകര്‍ത്താനും സംരക്ഷണം നടത്താനും ദുരദര്‍ശന് മാത്രമായിരുന്നു അനുമതി. കോവിഡ് വ്യാപനത്തിന്റെ പശ്ചാത്തലത്തില്‍ കടുത്ത കോവിഡ് മാനദണ്ഡങ്ങള്‍ പാലിക്കേണ്ടിരുന്നതുകൊണ്ടാണ് ഇത്തരമൊരു നടപടി സര്‍ക്കാര്‍ തീരുമാനിച്ചത്.