രാജ്യത്ത് ആയുധങ്ങളുടെ ഇറക്കുമതി നിരോധിച്ചു; നിരോധിച്ചത് 101 ഇനത്തിലുള്ള ആയുധങ്ങള്; പ്രതിരോധ മേഖലയിലെ ആത്മനിര്ഭര് ഭാരത്; സുപ്രധാന തീരുമാനം ഇങ്ങനെ
പ്രതിരോധ മേഖലയിലും ആത്മനിര്ഭര് ഭാരത് ഉദ്യോമത്തിന് ശക്തി പകരുന്നു. രാജ്യത്തിന് ആവശ്യമായ ആയുധങ്ങള് രാജ്യത്തിന് അകത്തു തന്നെ ഉല്പാദിപ്പാക്കാനൊരുങ്ങി കേന്ദ്ര സര്ക്കാര്. ഇതിന്റെ ഭാഗമായി 101 ആയുധങ്ങളുടെ ഇറക്കുമതിക്ക് നിരോധനം കൊണ്ടുവരുമെന്ന് പ്രതിരോധ മന്ത്രി രാജ്നാഥ് സിങ് അറിയിച്ചു. രാജ്യത്തെ സ്വയം പര്യാപ്തമാക്കുന്നതിനുള്ള മികച്ച ചുവടുവെപ്പാണിതെന്ന് അദ്ദേഹം പറഞ്ഞു. പ്രതിരോധ മേഖലയില് വേണ്ട വന്ആയുധങ്ങള് ഉള്പ്പടെയുള്ളവ രാജ്യത്ത് തന്നെ നിര്മിക്കുമെന്ന് പ്രതിരോധ മന്ത്രി രാജ്നാഥ് സിങ് പറഞ്ഞു.
ആയുധങ്ങള് തദ്ദേശീയമായി നിര്മിക്കാന് ഇന്ത്യയിലെ പ്രതിരോധ വ്യവസായ സ്ഥാപനങ്ങള്ക്ക് വലിയ അവസരമാണ് ഇതോടെ കൈവന്നിരിക്കുന്നത്. 2024 ലോടെ മുഴുന് ആയുധങ്ങളും ഇന്ത്യയില് തന്നെ ഉല്പാദിപ്പിക്കാനാണ് ശ്രമം. നിരോധിക്കുന്ന പ്രതിരോധ ഉത്പന്നങ്ങളില് ലഘുവായ ഉപകരണങ്ങള് മാത്രമല്ല ആധുനിക ആയുധങ്ങളും ഉള്പ്പെടും. ആര്ട്ടില്ലറി ഗണ്ണുകള്, അസോള്ട്ട് റൈഫിളുകള്, സോണാര് സിസ്റ്റം, വിമാനങ്ങള്, റഡാറുകള്, ചരക്ക് വിമാനങ്ങള്, ലഘു യുദ്ധ ഹെലികോപ്റ്ററുകള്, കവചിത വാഹനങ്ങള് തുടങ്ങിയ ആധുനിക ഉപകരണങ്ങള് തദ്ദേശീയമായി നിര്മിക്കുമെന്നും സൈനിക ഉപകരണങ്ങളും ഡിആര്ഡിഒ സ്വന്തമായി വികസിപ്പിക്കുന്നതോടെ പ്രതിരോധ വ്യവസായം ശക്തിപ്പെടുമെന്നും പ്രതിരോധമന്ത്രി പറഞ്ഞു.
കരസേനയ്ക്കും വ്യോമസേനയ്ക്കും വേണ്ടി 2015 മുതല് 2020 വരെ 1,30,000 കോടി രൂപയാണ് രാജ്യം ചെലവിടുന്നത്. നാവികസേനയ്ക്കായി 1,40,000 കോടിയും ഇതേ സമയത്ത് ചെലവിടേണ്ടതായി വന്നു. മൂന്നുസേനകള്ക്കുമായി ഇത്തരത്തില് 260 പദ്ധതികളിലായി 3.5 ലക്ഷം കോടി രൂപയാണ് ചെലവിടേണ്ടി വരുന്നത്. അടുത്ത ആറുമുതല് ഏഴ് വര്ഷങ്ങള്ക്കുളില് ഇതിനായി ആഭ്യന്തര വിപണിയില് 4 ലക്ഷം കോടിരൂപ ചെലവിടാനാണ് സര്ക്കാര് ഉദ്ദേശിക്കുന്നത്. 2020 മുതല് 2024 വരെയാകും പ്രതിരോധ ഇറക്കുമതി നിരോധന നയം തുടരുക. സേനകളുടെ ആവശ്യങ്ങള്ക്ക് അനുസരിച്ച് ആഭ്യന്തര പ്രതിരോധ വ്യവസായത്തെ ഉയര്ത്താനും അതുവഴി സ്വയംപര്യാപ്തത കൈവരിക്കുകയുമാണ് ലക്ഷ്യമെന്നും രാജ്നാഥ് സിങ് വ്യക്തമാക്കി.
ആറോ ഏഴോ വര്ഷത്തിനുള്ളില് നാല് ലക്ഷം കോടി രൂപയുടെ കരാര് രാജ്യത്തെ സ്ഥാപനങ്ങളുമായി ഒപ്പിടാനാണ് നീക്കം. സുപ്രധാന തീരുമാനം ഞായറാഴ്ച രാവിലെ പത്തിന് ഉണ്ടാകുമെന്ന് പ്രതിരോധ മന്ത്രാലയം വ്യക്തമാക്കിയിരുന്നു. ചൈനീസ് അതിര്ത്തി തര്ക്കവുമായി ബന്ധപ്പെട്ടായിരിക്കും ഈ തിരുമാനമെന്നാണ് പലരും കരുതിയത്. എന്നാല് ആയുധ ഇറക്കുമതിയുമായി ബന്ധപ്പെട്ട ഈ തീരുമാനമാണ് പ്രതിരോധ മന്ത്രാലയം പ്രഖ്യാപിച്ചത്.
https://www.facebook.com/Malayalivartha