ആത്മനിര്‍ഭര്‍ യജ്ഞത്തിന്റെ ഭാഗമായി 101 പ്രതിരോധ ഉപകരണങ്ങളുടെ ഇറക്കുമതിക്ക് കേന്ദ്ര സര്‍ക്കാര്‍ നിരോധനമേര്‍പ്പെടുത്തും. പ്രതിരോധ നിര്‍മാണ മേഖലയില്‍ സ്വയംപര്യാപ്തത കൈവരിക്കാന്‍ ലക്ഷ്യമിട്ടാണ് നീക്കം. ഈ വര്‍ഷം മുതല്‍ 2024 വരെ പല ഘട്ടങ്ങളിലായാവും നിരോധനം നടപ്പാക്കുക.

പ്രതിരോധ മേഖലയിലെ ആഭ്യന്തര ഉല്‍പാദകര്‍ക്ക് ഇതുവഴി അടുത്ത 7 വര്‍ഷത്തിനകം 4 ലക്ഷം കോടി രൂപയുടെ പദ്ധതികള്‍ ലഭിക്കുമെന്ന് കേന്ദ്ര പ്രതിരോധ മന്ത്രി രാജ്‌നാഥ് സിങ് പറഞ്ഞു.

ചരക്കുവിമാനങ്ങള്‍, മുങ്ങിക്കപ്പലുകള്‍, ഹെലികോപ്റ്ററുകള്‍, പീരങ്കികള്‍, സായുധ വാഹനങ്ങള്‍, വിവിധ തരം മിസൈലുകള്‍, യന്ത്രത്തോക്കുകള്‍, റഡാര്‍ സംവിധാനങ്ങള്‍ തുടങ്ങിയവയുടെ ഇറക്കുമതിയാണ് നിരോധിക്കുന്നത്.

2015 - 2020 കാലയളവില്‍ 3.5 ലക്ഷം കോടി രൂപയുടെ പദ്ധതികള്‍ കര, നാവിക, വ്യോമ സേനകള്‍ ആഭ്യന്തര ഉല്‍പാദകര്‍ക്ക് ലഭ്യമാക്കിയതായി രാജ്‌നാഥ് വ്യക്തമാക്കി. 5000 കോടി രൂപയ്ക്ക് 200 സായുധ വാഹനങ്ങള്‍ വാങ്ങാന്‍ കരസേനയ്ക്ക് പദ്ധതിയുണ്ട്. 42,000 കോടി രൂപയ്ക്ക് 6 മുങ്ങിക്കപ്പലുകള്‍ വാങ്ങുന്നതിനുള്ള പദ്ധതി നാവികസേനയുടെ പരിഗണനയിലുണ്ട്.

അടുത്തിടെ കേന്ദ്ര പ്രതിരോധ മന്ത്രാലയം പ്രതിരോധ മേഖലയില്‍ സ്വയംപര്യാപ്തത കൈവരിക്കാന്‍ ലക്ഷ്യമിട്ടുള്ള വ്യവസ്ഥകളുള്‍പ്പെടുത്തി പ്രതിരോധ സംഭരണ ചട്ടത്തിന്റെ (ഡിഎപി - 2020) രണ്ടാം കരടിന് രൂപം നല്‍കിയിരുന്നു.

പൊതു, സ്വകാര്യ മേഖലകളില്‍ ഇന്ത്യയില്‍ നിര്‍മിക്കുന്ന ആയുധങ്ങള്‍, പ്രതിരോധ സാമഗ്രികള്‍ എന്നിവയുടെ അതേ വിഭാഗത്തിലുള്ള ഉല്‍പന്നങ്ങളുടെ ഇറക്കുമതി നിരോധിക്കണമെന്നു ചട്ടം വ്യവസ്ഥ ചെയ്യുന്നു. പകരം വിദേശ സാങ്കേതികവിദ്യാ ഉപയോഗിച്ച് പ്രതിരോധ ഉല്‍പന്നങ്ങള്‍ ഇന്ത്യയില്‍ നിര്‍മിക്കുന്നത് പ്രോത്സാഹിപ്പിക്കും.