ഡല്‍ഹി മുഖ്യമന്ത്രി അരവിന്ദ് കേജ്‌രിവാള്‍ ഇപ്പോള്‍ മാധ്യമങ്ങള്‍ക്ക് മുന്നില്‍ വരാന്‍ തയാറാകുന്നില്ല. കാരണമെന്താണെന്ന് ആര്‍ക്കും പിടികിട്ടിയിട്ടില്ല. ഒരുപക്ഷെ, എ.എ.പിയില്‍ ഉണ്ടായ വിഭാഗീയതയെ കുറിച്ച് മാധ്യമങ്ങള്‍ ചോദിക്കുമെന്ന ആശങ്കയാകാം മാധ്യമങ്ങള്‍ക്ക് മുന്നില്‍ വരാതിരിക്കാനുള്ള കാരണമെന്നാണ് ആരോപണം. തന്റെ അരികിലേക്ക് മാധ്യമങ്ങളെ അടുപ്പിക്കരുതെന്ന് പോലീസിനോട് കേജ്‌രിവാള്‍ ഉത്തരവ് നല്‍കിയിട്ടുണ്ടെന്നാണ് റിപ്പോര്‍ട്ടുകള്‍.
കേന്ദ്രസര്‍ക്കാറിന്റെ ഭൂമിയേറ്റെടുക്കല്‍ ബില്ലിനെതിരെയുള്ള സമരത്തിന് മുന്നോടിയായാണ് കെജ്‌രിവാളിന്റെ ഇത്തരത്തിലൊരു നിര്‍ദേശം. മുഖ്യമന്ത്രിയുടെ ജോയിന്റ് സെക്രട്ടറിയുടെ നിര്‍ദേശമനുസരിച്ച് പൊലീസ് കണ്‍ട്രോള്‍ റൂം ഇതുസംബന്ധിച്ച് ജില്ലാ പൊലീസ് കമ്മീഷണര്‍ക്ക് ജാഗ്രതാ നിര്‍ദേശം നല്‍കിയിട്ടുണ്ട്. മാര്‍ച്ചിന് ഡല്‍ഹി പൊലീസ് ഇതുവരെ അനുമതി നല്‍കിയിട്ടുമില്ല. ജന്തര്‍ മന്തറില്‍ നിന്ന് ആരംഭിക്കുന്ന റാലി അരവിന്ദ് കെജ്‌രിവാളാണ് നയിക്കുന്നത്.
ജന്തര്‍ മന്തറില്‍ നിന്ന് പാര്‍ലമെന്റിലേക്കാണ് മാര്‍ച്ച് സംഘടിപ്പിച്ചിരിക്കുന്നത്. പാര്‍ലമെന്റ് നടക്കുന്ന സമയമായതിനാല്‍ പ്രദേശം ഇപ്പോള്‍ തന്നെ നിരോധനാജ്ഞയിലാണ്. വിലക്ക് ലംഘിക്കുന്നവര്‍ക്കെതിരെ ശക്തമായ നടപടിയെടുക്കുമെന്ന് ഡല്‍ഹി പൊലീസിലെ മുതിര്‍ന്ന ഉദ്യോഗസ്ഥര്‍ അറിയിച്ചു. സംഘര്‍ഷം ഉണ്ടാകാതിരിക്കാന്‍ പോലീസിനെ വിന്യസിച്ചിട്ടുണ്ട്. ഭൂമി ഏറ്റെടുക്കല്‍ ബില്‍ എടുത്തുകളയണമെന്ന് ആവശ്യപ്പെടുന്ന എ.എ.പി, യു.പി.എ മുന്നോട്ടുവെച്ച ബില്ലിനെ പിന്തുണയ്ക്കുന്നുമുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha