മധ്യപ്രദേശിലെ സഞ്ജയ് ഗാന്ധി സര്‍ക്കാര്‍ ആശുപത്രിയില്‍ ചികിത്സയിലിരിക്കേ മരണമടഞ്ഞ 22-കാരന്റെ കുടുംബത്തിന് വിട്ടുകൊടുത്തത് 65-കാരന്റെ മൃതദേഹം. മൃതദേഹം മാറിപ്പോയെന്ന് തിരിച്ചറിഞ്ഞ കുടുംബാംഗങ്ങള്‍ മോര്‍ച്ചറിയില്‍ നിന്നും അത് ഏറ്റുവാങ്ങാന്‍ തയ്യാറായില്ല.

അതേസമയം, യുവാവിന്റെ മൃതദേഹം പ്രദേശിക ഭരണകൂടം സംസ്‌കരിച്ചുവെന്ന് പിതാവ് രാം വിശാല്‍ കുഷ്വാഹ ജില്ലാ മെഡിക്കല്‍ ഹെല്‍ത്ത് ഓഫീസര്‍ക്ക് നല്‍കിയ പരാതിയില്‍ പറയുന്നു. ആരോഗ്യ വകുപ്പിന്റെ അന്വേഷണത്തില്‍ ഡോക്ടര്‍ക്ക് വീഴ്ചപറ്റിയെന്ന് കണ്ടെത്തിയതോടെ മെഡിക്കല്‍ കോളജിലെ അസി.പ്രൊഫസര്‍ കൂടിയായ ഡോക്ടര്‍ രാകേഷ് പട്ടേലിനെ സസ്പെന്റു ചെയ്തു. സംഭവം നടന്ന സഞ്ജയ് ഗാന്ധി ആശുപത്രിയില്‍ ചുമതല വഹിച്ചിരുന്നതും ഈ ഡോക്ടര്‍ ആയിരുന്നു.

യുവാവിനെ കടുത്ത ശരീര വേദനയെ തുടര്‍ന്ന് ആദ്യം മൗഗഞ്ചിലുള്ള ഒരു ആശുപത്രിയിലാണ് ചികിത്സിച്ചത്. കൊവിഡ് ലക്ഷണമാണെന്ന സംശയത്തെ തുടര്‍ന്ന് ഓഗസ്റ്റ് മൂന്നിന് സഞ്ജയ് ഗാന്ധി ആശുപത്രിയിലേക്ക് മാറ്റി. എന്നാല്‍ പിന്നീട് മകനെ കുറിച്ച് ഒരു വിവരവും കുടുംബത്തിന് ലഭിച്ചിരുന്നില്ല.

മകനെ കുറിച്ചുള്ള വിവരം തിരക്കി നാലു ദിവസത്തിനു ശേഷം പിതാവ് ആശുപത്രിയില്‍ എത്തി. എന്നാല്‍ മകന്‍ മരിച്ചുപോയെന്നും മോര്‍ച്ചറിയില്‍ എത്തി മൃതദേഹം തിരിച്ചറിയണമെന്നും ഓഗസ്റ്റ് 9-ന് ഡോക്ടര്‍മാര്‍ അറിയിച്ചു.

യുവാവിന്റെ മൃതദേഹത്തിനു പകരം തിരിച്ചറിയാന്‍ കൊണ്ടുവന്നത് ഒരു വൃദ്ധന്റെ മൃതദേഹം ആയിരുന്നു. കൊവിഡ് ബാധിച്ചാണ് മകന്‍ മരിച്ചതെന്ന് ആശുപത്രി അധികൃതര്‍ പറയുന്നുണ്ടെങ്കിലും കൊവിഡ് പരിശോധനയുടെ ഫലമൊന്നും ലഭിച്ചിട്ടില്ലെന്ന് പിതാവ് പറഞ്ഞു. ഡോക്ടറുടെ അനാസ്ഥ ചൂണ്ടിക്കാട്ടി പോലീസ് സൂപ്രണ്ടിനും കമ്മീഷണര്‍ക്കും കുടുംബം പരാതി നല്‍കി.

മകന്റെ മൃതദേഹം കൊവിഡ് ബാധിച്ച് മരിച്ചവര്‍ക്കൊപ്പം പഞ്ചായത്ത് അധികൃതര്‍ ദഹിപ്പിച്ചുവെന്ന് പിതാവ് ആരോപിക്കുന്നു. മരണകാരണം എന്താണെന്ന് പോലും വ്യക്തമല്ല. യുവാവിന്റെ മൃതദേഹം ദഹിപ്പിച്ചതായി മെഡിക്കല്‍ ഓഫീസറും വ്യക്തമാക്കുന്നുണ്ട്. എന്നാല്‍ ഭസ്മമോ മറ്റ് അവശിഷ്ടങ്ങളോ കൈമാറിയില്ലെന്ന് പിതാവ് പറഞ്ഞു.