റഷ്യ വികസിപ്പിച്ച വാക്‌സീന്റെ ഉപയോഗം സംബന്ധിച്ചു റഷ്യയുടെ അനുഭവം മനസ്സിലാക്കിയ ശേഷമാവും ഇന്ത്യയുടെ തുടര്‍ നടപടിയെന്നാണ് ആരോഗ്യമന്ത്രാലയം നല്‍കുന്ന സൂചന. വാക്‌സീന്‍ പരീക്ഷണം നടത്താന്‍ നേരത്തെ താല്‍പര്യം അറിയിച്ച 20 രാജ്യങ്ങളുടെ കൂട്ടത്തില്‍ ഇന്ത്യയുമുണ്ട്. സര്‍ക്കാര്‍ ഔദ്യോഗികമായി തീരുമാനമെടുത്തില്ലെങ്കിലും ഇന്ത്യയ്ക്കു മുന്നില്‍ തെളിയുന്ന വഴികളും വെല്ലുവിളികളും ഇവയാണ്:

ഈ വാക്‌സീന്‍ ഇന്ത്യയില്‍ ലഭ്യമാക്കണമെങ്കില്‍ മനുഷ്യരില്‍ നടത്തേണ്ട അവസാനവട്ട പരീക്ഷണങ്ങള്‍ നിര്‍ബന്ധമാണ്. റഷ്യ വിജയകരമായി പരീക്ഷിച്ചുവെന്ന് അവകാശപ്പെടുന്നുണ്ടെങ്കിലും വ്യത്യസ്ത വിഭാഗം ജനങ്ങളില്‍ ഇതിന്റെ ഫലപ്രാപ്തിയില്‍ മാറ്റമുണ്ടാകാം.

പരീക്ഷണഘട്ടങ്ങള്‍ ഒഴിവാക്കി വാക്‌സീന്‍ നല്‍കാന്‍ അടിയന്തരപ്രാധാന്യം ഉണ്ടെങ്കില്‍ വകുപ്പുണ്ടെങ്കിലും ഇതിന് ഇന്ത്യ മുതിരാനിടയില്ല. വികസിപ്പിച്ച രാജ്യത്തില്‍ ഇതിന്റെ പരീക്ഷണ വിജയം സംബന്ധിച്ച റിപ്പോര്‍ട്ടുകളാണ് ഇതിനു പരിഗണിക്കേണ്ടത്. ഓക്‌സ്ഫഡ് വാക്‌സീന്റെ അടക്കം കാര്യത്തില്‍ ഇന്ത്യ രണ്ടും മൂന്നും ഘട്ട ട്രയല്‍ നിര്‍ദേശിച്ചിരിക്കെ, റഷ്യന്‍ വാക്‌സീന്റെ കാര്യത്തില്‍ മാത്രം ഇളവു നല്‍കാനാവില്ല.

ഓക്‌സ്ഫഡ് വാക്‌സീന്റെ ഉല്‍പാദനത്തിന് ഇന്ത്യന്‍ കമ്പനിയായ സീറം ഇന്‍സ്‌റിറ്റിയൂട്ടുമായി കരാറുണ്ട്. എന്നാല്‍, റഷ്യന്‍ വാക്‌സീന്റെ കാര്യത്തില്‍ നിലവില്‍ കരാറുകള്‍ ഇല്ല. വാക്‌സീന്‍ ഇന്ത്യയില്‍ വൈകാന്‍ ഇതും ഇടയാക്കും.

റഷ്യയുടെ സുപുട്‌നിക് 5 -ല്‍ രോഗാണുവാഹകരായി (വെക്ടര്‍) ഉപയോഗിക്കുന്നത് ജ്വരമുണ്ടാക്കുന്ന വൈറസുകളിലൊന്നായ അഡിനോയാണ്. ഇവയുടെ ജനിതകഘടന മാറ്റി രോഗം പരത്താനുള്ള ശേഷി ഇല്ലാതാക്കിയശേഷം, കൊറോണ വൈറസിന്റെ സ്‌പൈക്ക് പ്രോട്ടീന്‍ ജീന്‍ നിക്ഷേപിക്കുകയാണ് ചെയ്യുന്നത്. ഇതു കുത്തിവയ്ക്കുന്നതോടെ കൊറോണ വൈറസ് എന്നു തെറ്റിദ്ധരിച്ച് ശരീരം പ്രതിരോധം രൂപപ്പെടുത്തും. ഇന്ത്യ തദ്ദേശീയമായി വികസിപ്പിക്കുന്ന കോവാക്‌സീനില്‍, കൊറോണ വൈറസിനെ തന്നെ നിര്‍ദോഷകാരിയാക്കി ഉപയോഗപ്പെടുന്നതാണ് രീതി.

ഓക്‌സ്ഫഡ്, ചൈനയുടെ കാന്‍സിനോ ബയോളജിക്‌സ് എന്നിവയുടെ വാക്‌സീനുകളും ഇതേ രീതിയിലാണ് തയാറാക്കുന്നത്. 21 ദിവസത്തെ ഇടവേളയിലാണു സ്പുട്‌നിക് 5 വാക്‌സീന്‍ നല്‍കുന്നത്. ഈ 2 ഡോസുകളുടെയും നിര്‍മാണത്തില്‍ ഉപയോഗപ്പെടുത്തുന്നത് 2 വ്യത്യസ്ത ഹ്യൂമന്‍ അഡിനോ വൈറസുകളാണ് (rAd26, rAD5). കൂടുതല്‍ ഫലപ്രാപ്തി നല്‍കാന്‍ ഇതു സഹായിക്കുമെന്ന് റഷ്യ അവകാശപ്പെടുന്നു.