കോണ്‍ഗ്രസ് ദേശീയ വക്താവ് രാജീവ് ത്യാഗി (50) ഹൃദയാഘാതത്തെ തുടര്‍ന്ന് അന്തരിച്ചു. വൈകീട്ട് ഗാസിയാബാദിലെ വീട്ടിലായിരുന്നു അന്ത്യം.

ബുധനാഴ്ച വൈകീട്ട് അഞ്ചിന് ആജ് തക് ടിവിയില്‍ നടന്ന ചര്‍ച്ചയില്‍ കോണ്‍ഗ്രസിനെ പ്രതിനിധാനം ചെയ്ത് സംസാരിച്ചിരുന്നു. തുടര്‍ന്ന് വീട്ടില്‍ കുഴഞ്ഞുവീഴുകയായിരുന്നു. യുപി ഗാസിയാബാദിലെ വസതിയില്‍ നിന്ന് സമീപമുള്ള യശോദ ആശുപത്രിയിലെത്തിച്ചെങ്കിലും മരണം സംഭവിച്ചിരുന്നു. ആജ് തക് ടിവി ചര്‍ച്ചയെ കുറിച്ചാണ് അദ്ദേഹം അവസാനമായി ട്വീറ്റ് ചെയ്തത്.

'രാജീവ് ത്യാഗിയുടെ അകാല വേര്‍പാടില്‍ ഞങ്ങള്‍ അതീവ ദു:ഖം രേഖപ്പെടുത്തുന്നു. കരുത്തനായ പാര്‍ട്ടി പ്രവര്‍ത്തകനായ അദ്ദേഹം യഥാര്‍ഥ രാജ്യസ്‌നേഹികൂടിയായിരുന്നു. ഈയവസരത്തില്‍ അദ്ദേഹത്തിന്റെ കുടുംബത്തിലും കൂട്ടുകാരിലും ഞങ്ങളുടെ പ്രാര്‍ഥനയുണ്ടാവും'-കോണ്‍ഗ്രസ് ട്വീറ്റ് ചെയ്തു.

കഴിഞ്ഞ ഒക്ടോബറിലാണ് ത്യാഗിയെ പാര്‍ട്ടിയുടെ വക്താവായി പ്രിയങ്കഗാന്ധി ഉത്തര്‍പ്രദേശില്‍ ചുമതലപ്പെടുത്തിയത്. കോണ്‍ഗ്രസില്‍ വിവിധ ഭാരവാഹിത്വം ത്യാഗി വഹിച്ചിട്ടുണ്ട്. യുപിയില്‍ കോണ്‍ഗ്രസ് മാധ്യമ വിഭാഗത്തിന്റെ ചുമതലയും വഹിച്ചിരുന്നു. പാര്‍ട്ടി നേതാക്കള്‍ അദ്ദേഹത്തിന്റെ മരണത്തില്‍ അനുശോചനം അറിയിച്ചു.