24-ാം തീയതി നടത്തുന്ന രാജ്യസഭാ തിരഞ്ഞടുപ്പിന് പ്രത്യേക പ്രോട്ടോക്കോള്
നിയമസഭാ ജീവനക്കാരില് ചിലര്ക്ക് കോവിഡ് സ്ഥിരീകരിച്ച സാഹചര്യത്തില് 24ന് നടത്തുന്ന വോട്ടെടുപ്പിന് നിയമസഭാ സെക്രട്ടേറിയറ്റും ആരോഗ്യ വകുപ്പും ചേര്ന്ന് പ്രത്യേക പ്രോട്ടോക്കോള് തയാറാക്കി. പത്രികാ സമര്പ്പണത്തിനുള്ള അവസാന ദിവസം ഇന്നാണ്.
രാജ്യസഭാ തിരഞ്ഞെടുപ്പില് വോട്ടു ചെയ്യാന് കണ്ടെയ്ന്മെന്റ് സോണുകളില് നിന്നെത്തുന്ന എംഎല്എമാര്ക്ക് പ്രത്യേക മുറിയില് പോളിങ് ബൂത്ത് സജ്ജീകരിക്കും. കണ്ടെയ്ന്മെന്റ് സോണുകളില് നിന്നെത്തുന്ന എംഎല്എമാര് വോട്ടെടുപ്പിന്റെ അവസാന മണിക്കൂറുകളില് മാത്രം വോട്ടു ചെയ്യാന് എത്തുന്നതു നന്നായിരിക്കുമെന്ന് അഭ്യര്ഥിച്ചിട്ടുണ്ടെന്നു വരാണാധികാരി കൂടിയായ നിയമസഭാ സെക്രട്ടറി എസ്.വി. ഉണ്ണികൃഷ്ണന് നായര് അറിയിച്ചു. ഏതെങ്കിലും എംഎല്എമാര് ആശുപത്രിയിലാണെങ്കില് അവര്ക്ക് തപാല് വോട്ടും ലഭ്യമാക്കും.
5 പേരെ മാത്രമേ പത്രികാ സമര്പ്പണത്തിനെത്തുന്ന സ്ഥാനാര്ഥിക്കൊപ്പം നിയമസഭാ സെക്രട്ടറിയുടെ മുറിയില് പ്രവേശിപ്പിക്കൂ. മീഡിയാ റൂമില് മാധ്യമ പ്രവര്ത്തകരുമായി സംസാരിക്കാന് സൗകര്യമൊരുക്കും. അവിടെ കോവിഡ് പ്രോട്ടോക്കോള് പാലിച്ചായിരിക്കും ഇരിപ്പിടങ്ങള്. പത്രികാ സമര്പ്പണത്തിന്റെ ചിത്രങ്ങളും വിഡിയോയും പിആര്ഡി വഴി മാധ്യമങ്ങള്ക്കു ലഭ്യമാക്കും.
ആന്റിജന് പരിശോധനാ സൗകര്യമുള്ള മൊബൈല് യൂണിറ്റ് ആരോഗ്യ വകുപ്പ് ലഭ്യമാക്കും. വോട്ടു ചെയ്യാനെത്തുന്ന എംഎല്എമാര്ക്കു സാനിറ്റൈസര് നല്കാന് പിപിഇ കിറ്റ് ധരിച്ച ജീവനക്കാരെ നിയോഗിക്കും.
https://www.facebook.com/Malayalivartha
