മലയാളിയായ വ്യോമസേനാ വിംഗ് കമാന്‍ഡര്‍ വിശാഖ് നായര്‍ ഉള്‍പ്പെടെ ഒന്‍പതു പേര്‍ക്ക് സമാധാനകാലത്തെ ഏറ്റവും ഉയര്‍ന്ന സൈനിക ബഹുമതിയായ ശൗര്യചക്ര
മലയാളിയായ വ്യോമസേനാ വിംഗ് കമാന്‍ഡര്‍ വിശാഖ് നായര്‍ ഉള്‍പ്പെടെ ഒന്‍പതു പേര്‍ക്ക് സമാധാനകാലത്തെ ഏറ്റവും ഉയര്‍ന്ന സൈനിക ബഹുമതിയായ ശൗര്യചക്ര. ജമ്മു കശ്മീരില്‍ ഭീകരരോട് ഏറ്റുമുട്ടി വീരമൃത്യു വരിച്ച ഹെഡ് കോണ്‍സ്റ്റബിള്‍ അബ്ദുല്‍ റഷീദ് ഖലാസിന് മരണാനന്തര ബഹുമതിയായി കീര്‍ത്തിചക്രയും ലഭിക്കും. സ്വാതന്ത്ര്യ ദിനാഘോഷങ്ങളോട് അനുബന്ധിച്ചു രാഷ്ട്രപതി രാംനാഥ് കോവിന്ദ് അംഗീകരിച്ച സേനാ മെഡലുകളാണ് ഇന്നലെ പ്രഖ്യാപിച്ചത്. കരസേനയില്‍ നിന്ന് 3 പേര്‍ക്ക് ശൗര്യ ചക്ര പുരസ്‌കാരങ്ങളുണ്ട്. ലഫ്. കേണല്‍ കൃഷ്ണന്‍ സിങ് റാവത്ത് (പാരഷൂട്ട് റെജിമെന്റ് ഒന്നാം ബറ്റാലിയന്‍), മേജര്‍ അനില്‍ അര്‍സ് (മറാഠാ ലൈറ്റ് ഇന്‍ഫന്‍ട്രി നാലാം ബറ്റാലിയന്‍), ഹവില്‍ദാര്‍ അലോക് കുമാര്‍ ദുബെ (രാഷ്ട്രീയ റൈഫിള്‍സ് 44ാം ബറ്റാലിയന്‍) എന്നിവര്‍ക്കാണ് കരസേനയില്‍ നിന്ന് ശൗര്യചക്ര ലഭിച്ചത്.
ജമ്മു കശ്മീര്‍ പൊലീസിലെ ഡിഐജി അമിത് കുമാര്‍, മാവോയിസ്റ്റുകളുമായുള്ള ഏറ്റുമുട്ടലില്‍ വീരമൃത്യു വരിച്ച സിഐഎസ്എഫിലെ മഹാവീര്‍ പ്രസാദ് ഗോദാര, എറണ്ണ നായക, മഹേന്ദ്ര കുമാര്‍ പാസ്വാന്‍, സതിഷ് ഖുഷ്‌വാഹ എന്നിവര്‍ക്കും ശൗര്യചക്ര പുരസ്‌കാരമുണ്ട്. വ്യോമസേനയിലെ സ്‌ക്വാഡ്രണ്‍ ലീഡര്‍ അരുണ്‍ ബിക്ക് ധീരതയ്ക്കുള്ള വായുസേനാ മെഡലും നാവിക സേനാ കമാന്‍ഡര്‍ ധനുഷ് മേനോന് ധീരതയ്ക്കുള്ള നാവികസേനാ മെഡലും ലഭിച്ചു. രാഷ്ട്രീയ റൈഫിള്‍സ് മൂന്നാം ബറ്റാലിയന്‍ ഹവില്‍ദാര്‍ രജീഷ് കുമാര്‍ ധീരതയ്ക്കുള്ള സേനാ മെഡലിന് അര്‍ഹനായി.
ഇതുള്‍പ്പെടെ കര, വ്യോമ, നാവിക സേനാവിഭാഗങ്ങളിലും അര്‍ധസൈനിക വിഭാഗങ്ങളിലുമായി ഒരു കീര്‍ത്തിചക്ര, ഒന്‍പത് ശൗര്യചക്ര, അഞ്ച് ബാര്‍ ടു സേനാ മെഡല്‍, 60 സേനാ മെഡല്‍, നാല് നാവികസേനാ മെഡല്‍, അഞ്ച് വായുസേനാ മെഡല്‍ എന്നിങ്ങനെ സ്വാതന്ത്ര്യ ദിനാഘോഷത്തിന്റെ ഭാഗമായി 84 പേര്‍ക്കാണ് ധീരതയ്ക്കുള്ള രാഷ്ട്രപതിയുടെ സേനാ മെഡല്‍ ലഭിച്ചത്.
"
https://www.facebook.com/Malayalivartha
