സൈനിക മെഡലുകളിലെ രണ്ടാമത്തെ ഉന്നത ബഹുമതിയായ കീര്ത്തിചക്ര മരണാനന്തര ബഹുമതിയായി അബ്ദുള് റഷീദ് ഖലാസിന്, മലയാളി ഉള്പ്പെടെ 9 പേര്ക്ക് ശൗര്യചക്ര
74-ാം സ്വാതന്ത്ര്യദിനത്തോടനുബന്ധിച്ച് രാഷ്ട്രപതി രാം നാഥ് കോവിന്ദ് പ്രഖ്യാപിച്ച സൈനിക മെഡലുകളിലെ രണ്ടാമത്തെ ഉന്നത ബഹുമതിയായ കീര്ത്തിചക്ര ജമ്മു കശ്മീര് പോലീസ് മുന് കോണ്സ്റ്റബിള് അബ്ദുള് റഷീദ് ഖലാസിന്. മരണാനന്തരമായാണ് അദ്ദേഹത്തെ ബഹുമതി നല്കി ആദരിക്കുന്നത്. സ്വാതന്ത്ര്യദിനത്തോടനുബന്ധിച്ചു പ്രഖ്യാപിച്ച സൈനിക മെഡലുകള്ക്കു മലയാളിയായ ഇന്ത്യന് വ്യോമസേന പൈലറ്റ് വിശാഖ് നായര് ഉള്പ്പെടെ 83 പേര്കൂടി ഇടംപിടിച്ചു.
യുദ്ധമുന്നണിയില് അല്ലാത്ത ധീരതയ്ക്ക് ഇന്ത്യയിലെ മൂന്നാമത്തെ വലിയ സൈനിക ബഹുമതിയായ ശൗര്യചക്രയ്ക്ക് ഒന്പതു പേര് അര്ഹരായി. വ്യോമസേനാ പൈലറ്റും മലയാളിയുമായ വിശാഖ് നായര്, ലഫ്റ്റനന്റ് കേണല് കിഷന് സിങ് റാവത്ത്, മേജര് അനില് ഉര്സ്, ഹവില്ദാര് അലോക് കുമാര് ദുബെ, ജമ്മു കശ്മീര് പോലീസ് ഡെപ്യൂട്ടി ഇന്സ്പെക്ടര് ജനറല് (ഡി.ഐ.ജി) അമിത് കുമാര്, കേന്ദ്ര വ്യവസായ സുരക്ഷാ സേന (സി.ഐ.എസ്.എഫ്) സബ് ഇന്സ്പെക്ടര് മഹാവീര് പ്രസാദ് ഗോദാര (മരണാനന്തരം), ഹെഡ് കോണ്സ്റ്റബിള് എറന്ന നായക (മരണാനന്തരം), കോണ്സ്റ്റബിള് മഹേന്ദ്ര കുമാര് പാസ്വാന് (മരണാനന്തരം), കോണ്സ്റ്റബിള് സതീഷ് പ്രസാദ് കുശ്വാഹ (മരണാനന്തരം) എന്നിവര്ക്കാണ് ശൗര്യചക്ര. അഞ്ച് ബാര് ടു സേന മെഡലുകള് (ധീരത), 60 സേന മെഡലുകള് (ധീരത), നാല് നവോ സേന മെഡലുകള് (ധീരത), അഞ്ച് വായു സേന മെഡലുകള് (ധീരത) എന്നിവയാണ് മറ്റു ബഹുമതികള്.
ഡല്ഹി പോലീസ് സ്പെഷല് സെല്ലിലെ പോലീസ് ഇന്സ്പെക്ടര് മോഹന് ചന്ദ് ശര്മ്മ ബട്ല ഹൗസില് ഭീകരരുമായുണ്ടായ ഏറ്റുമുട്ടലിനു നേതൃത്വം നല്കി വീരമൃത്യു വരിച്ചതിന് മരണാനന്തര ബഹുമതിക്ക് അര്ഹനായി. ഡല്ഹിയിലെ ബട്ല ഹൗസില് 2008 സെപ്റ്റംബര് 19-നാണ് ഭീകരരുമായി ഏറ്റുമുട്ടലുണ്ടായത്. ബട്ല ഹൗസില് അഞ്ചു ഭീകരര് ഒളിച്ചിരിക്കുന്നതായി ലഭിച്ച വിവരത്തിന്റെ അടിസ്ഥാനത്തിലാണ് മോഹന് ചന്ദ് ശര്മ്മയുടെ നേതൃത്വത്തിലുള്ള പോലീസ് സംഘം സ്ഥലത്തെത്തിയത്. ഭീകരരുമായുണ്ടായ ഏറ്റുമുട്ടലില് മോഹന് ചന്ദ് ശര്മ്മയ്ക്കു മൂന്നു തവണ വെടിയേറ്റു. ആശുപത്രിയില് പ്രവേശിപ്പിച്ചെങ്കിലും രക്ഷിക്കാനായില്ല.
ഇത്തവണത്തെ മെഡല് ഉള്പ്പെടെ മോഹന് ചന്ദ് ശര്മ്മയ്ക്ക് ഏഴാം തവണയാണ് ധീരതയ്ക്കുള്ള പുരസ്കാരം ലഭിക്കുന്നത്. 2009-ല് രാജ്യം അദ്ദേഹത്തെ അശോകചക്ര നല്കി ആദരിച്ചിരുന്നു.
ഇക്കുറി രാഷ്ട്രപതിയുടെ പ്രത്യേക അവാര്ഡിനോ വിശിഷ്ട സേവാ മെലഡലിനോ മലയാളി ഉദ്യോഗസ്ഥര് അര്ഹരായിട്ടില്ല.
https://www.facebook.com/Malayalivartha