രാജ്യസഭാ തെരഞ്ഞെടുപ്പില് ഇടതുസ്ഥാനാര്ഥി എം.വി. ശ്രേയാംസ്കുമാറിന് ജയം
ഇടതുസ്ഥാനാര്ഥി എം.വി. ശ്രേയാംസ്കുമാറിന് രാജ്യസഭാ തെരഞ്ഞെടുപ്പില് ജയം. ലോക്താന്ത്രിക് ജനതാദള് സംസ്ഥാന അധ്യക്ഷനായ ശ്രേയാംസ്കുമാര് 88 വോട്ട് നേടി. എതിര് സ്ഥാനാര്ഥി ലാല് വര്ഗീസ് കല്പകവാടിക്ക് ലഭിച്ചത് 41 വോട്ട്. ഒരു വോട്ട് അസാധു.
ശ്രേയാംസ്കുമാറിന്റെ പിതാവായ എം.പി. വീരേന്ദ്രകുമാര് അന്തരിച്ചതിനെത്തുടര്ന്ന് ഒഴിവ് വന്ന രാജ്യസഭ സീറ്റിലേക്കാണ് ഉപതെരഞ്ഞെടുപ്പ് നടന്നത്. മുഖ്യ തെരഞ്ഞെടുപ്പ് ഓഫീസര് ടിക്കാ റാം മീണ നിരീക്ഷകനായിരുന്നു. കേരള കോണ്ഗ്രസ് ജോസ് വിഭാഗം പ്രതിനിധികളായ റോഷി അഗസ്റ്റിനും എന്. ജയരാജും വോട്ടെടുപ്പില്നിന്ന് വിട്ടുനിന്നു.
രാവിലെ ഒന്പതിന് ആരംഭിച്ച വോട്ടെടുപ്പില് കെ. ദാസന് എം.എല്.എ. ആദ്യം വോട്ട് ചെയ്തു. ജോസ് കെ. മാണി പക്ഷത്തെ രണ്ട് എം.എല്.എമാര് വോട്ട് രേഖപ്പെടുത്താതെ മാറിനിന്നത് യു.ഡി.എഫിന് ക്ഷീണമായി. ജോസഫ് പക്ഷം വിപ്പ് പാലിച്ചില്ലെങ്കില് ശക്തമായ നടപടി എടുക്കുമെന്ന മുന്നറിയിപ്പും ജോസ് വിഭാഗം നല്കിയിരുന്നു.
കല്പ്പറ്റ നിയോജകമണ്ഡലത്തില്നിന്ന് 2006-ലും 2011-ലും നിയമസഭാംഗമായി തെരഞ്ഞെടുക്കപ്പെട്ട ശ്രേയാംസ്കുമാര് മികച്ച സാമാജികനായിരുന്നു. മാതൃഭൂമി മാനേജിങ് ഡയറക്ടറാണ്.
ഇന്ത്യന് ന്യൂസ് പേപ്പര് സൊസൈറ്റി കേരള റീജണല് സമിതി ചെയര്മാന്, ന്യൂസ് ബ്രോഡ്കാസ്റ്റേഴ്സ് അസോസിയേഷന് വൈസ് പ്രസിഡന്റ്, കേരള ടെലിവിഷന് ഫെഡറേഷന് പ്രസിഡന്റ്, ഇന്റര്നാഷണല് അഡ്വര്ടൈസിങ് അസോസിയേഷന് ആഗോള ഗ്ലോബല് വൈസ് പ്രസിഡന്റ് എന്നീ പദവികള് വഹിക്കുന്നുണ്ട്. ഭാര്യ: കവിത. മക്കള്: മയൂര, ദേവിക, ഗായത്രി, ഋഷഭ്.
https://www.facebook.com/Malayalivartha
