ആത്മീയ യാത്രയിൽ എത്തിച്ചേർന്ന വിദേശ വനിതയെ കയറിപിടിച്ച സ്വയം പ്രഖ്യാപിത സ്വാമിയെ പഞ്ഞിക്കിട്ട് യുവതി. തമിഴ്നാട്ടിലെ തിരുവണ്ണാമലയിലാണ് സംഭവം നടന്നത്. പീഡിപ്പിക്കാൻ ശ്രമിച്ച യുവാവിനെ ആയോധന കലയിൽ അതിവിദഗ്ധയായ യുവതി മര്‍ദിച്ചവശനാക്കിയിരുന്നു. ശേഷം സംഭവസ്ഥലത്ത് എത്തിച്ചേർന്ന പൊലീസിന് കൈമാറി.

സംഭവത്തെ കുറിച്ച് തിരുവണ്ണാമലൈ പൊലീസ് പറയുന്നത് ഇപ്രകാരമാണ്. തീർത്ഥാടന കേന്ദ്രങ്ങൾ സന്ദർശിക്കുന്നതിന് ഭാഗമായാണ് അമേരിക്കൻ പൗരയായ മുപ്പതുകാരി കഴിഞ്ഞ മാർച്ചിൽ ക്ഷേത്ര നഗരിയിൽ എത്തിച്ചേർന്നത്. എന്നാൽ കൊറോണ വ്യാപനം മൂലം ലോക്ഡൗൺ വന്നതോടെ നാട്ടിലേക്കുള്ള യുവതിയുടെ മടക്കം മുടങ്ങി. ആത്മീയതയിൽ അതീവ താല്പര്യമുള്ള യുവതി രമണ മഹർഷിയുടെ ആശ്രമത്തിനും അരുണാചല ക്ഷേത്രത്തിനും സമീപം വീട് വാടകയ്ക്ക് എടുത്തു തനിച്ചു താമസിക്കുകയായിരുന്നു.

ഇതേതുടർന്ന് കഴിഞ്ഞ ദിവസം വീടിനു പുറത്തു നിൽകുമ്പോൾ കഷായ വസ്ത്രങ്ങളും നിറയെ രുദ്രാക്ഷ മാലകളും അണിഞ്ഞ യുവാവ് യുവതിയെ ആക്രമിക്കുകയുണ്ടായി. വാടക വീടിനുളിലേക്കു വലിച്ചിഴച്ചു കൊണ്ടുപോയി പീഡിപ്പിക്കാൻ ആയിരുന്നു യുവാവിന്റെ ശ്രമം എന്നാണ് വെളിപ്പെടുത്തൽ. എന്നാൽ പെട്ടെന്നുണ്ടായ ആഘാതം മാറിയ യുവതി അതിക്രമം ചെറുക്കുകയായിരുന്നു. ആയോധന കലയിൽ വിദഗ്ധയായ യുവതിയുടെ പ്രത്യാക്രമണത്തിൽ യുവാവിന് സാരമായി പരുക്കേൽക്കുകയും ചെയ്തു. എഴുന്നേൽക്കാൻ പോലും കഴിയാതെ ആയ യുവാവിനെ പൊലീസിനെയും നാട്ടുകാരെയും വിളിച്ചുവരുത്തി കൈമാറുകയാണ് ചെയ്തത്.

അതേസമയം സ്വാമിയാണന്ന് സ്വയം പ്രഖ്യാപിച്ചു ക്ഷേത്രത്തിനു സമീപം കഴിയുന്ന നാമക്കൽ സ്വദേശി മണികണ്ഠൻ എന്നയാളാണ് പിടിയിലായതെന്ന് പൊലീസ് വ്യക്തമാക്കുകയുണ്ടായി. സ്ത്രീത്വത്തെ അപമാനിക്കൽ, അതിക്രമിച്ചു കയറൽ, ആക്രമിച്ചു പരുക്കേൽപ്പിക്കൽ തുടങ്ങിയ വകുപ്പുകൾ പ്രകാരം കേസെടുത്ത പൊലീസ് വിശദമായ അന്വേഷണം തുടങ്ങിയിരിക്കുകയാണ്.