ആഗസ്റ്റ് 15 ന് വാക്‌സിന്‍ വരുമെന്നാണ് ആദ്യം പറഞ്ഞത്. പിന്നീട് ഡിസംബറില്‍ പ്രതീക്ഷിക്കാമെന്നും പറഞ്ഞു. ഇതാ ഇപ്പോള്‍ പറയുന്നു വാക്‌സിന്‍ അടുത്ത കാലത്തൊന്നും ലഭിക്കില്ലെന്ന്. കോവിഡ് പ്രതിസന്ധിയില്‍ നട്ടം തിരിയുന്ന ജനങ്ങളുടെ നെഞ്ചില്‍ കത്തി കുത്തിയിറക്കുന്ന കത്താണ് ആരോഗ്യ വിദഗ്ധര്‍ ഇപ്പോള്‍ പ്രധാനമന്ത്രി നരേന്ദ്ര മോദിക്ക് അയച്ചരിക്കുന്നത്. കത്തില്‍ ആരോഗ്യ വിദഗ്ധര്‍ കോവിഡ് വാക്‌സിന്റെയും നിലവിലെ രാജ്യത്തിന്റെ കോവിഡ് വ്യാപനത്തിന്റെയും യഥാര്‍ത്ഥ ചിത്രം വ്യക്തമാക്കുന്നത്. കോവിഡ് വാക്‌സിന്‍ ഉടനൊന്നും ലഭിക്കില്ലെന്ന് ആരോഗ്യവിദഗ്ധരുടെ മുന്നറിയിപ്പ് നല്‍കി. കോവിഡിനെതിരെ ഫലപ്രദമായ വാക്‌സിന്‍ സമീപഭാവിയില്‍ പ്രതീക്ഷിക്കേണ്ടതില്ല എന്ന് എയിംസിലെയും ഐസിഎംആര്‍ നാഷണല്‍ ടാസ്‌ക് ഫോഴ്‌സിലേയും വിദഗ്ധര്‍ അഭിപ്രായപ്പെട്ടു. ഒരു കോണില്‍ മാത്രമാണ് ഈ മഹാമാരി എന്ന ചിന്ത ഒഴിവാക്കണമെന്നും ഡോക്ടര്‍മാര്‍ അടക്കമുളള വിദഗ്ധര്‍ മുന്നറിയിപ്പ് നല്‍കി. പ്രധാനമന്ത്രിക്ക് അയച്ച സംയുക്ത കത്തിലാണ് ഇക്കാര്യങ്ങള്‍ ചൂണ്ടിക്കാണിക്കുന്നത്.

ഇന്ത്യന്‍ പബ്ലിക് ഹെല്‍ത്ത് അസോസിയേഷന്‍, ഇന്ത്യന്‍ അസോസിയേഷന്‍ ഓഫ് പ്രിവന്റീവ് ആന്റ് സോഷ്യല്‍ മെഡിസിന്‍, ഇന്ത്യന്‍ അസോസിയേഷന്‍ ഓഫ് എപ്പിഡമോളജിസ്റ്റ് എന്നി വിദഗ്ധര്‍ അടങ്ങിയ സംഘടനകളാണ് നിവേദനം നല്‍കിയത്. മോശം സാഹചര്യം നേരിടാനുളള തയ്യാറെടുപ്പുകള്‍ നടത്തണമെന്നും നിവേദനത്തില്‍ ആവശ്യപ്പെട്ടു. നിലവില്‍ മഹാമാരിയെ നിയന്ത്രണവിധേയമാക്കുന്നതില്‍ വാക്‌സിനുകള്‍ക്ക് പ്രത്യേക പങ്കില്ല. വാക്‌സിന്‍ ലഭ്യമായാല്‍ ആരോഗ്യപ്രവര്‍ത്തകര്‍, കൂടുതല്‍ അപകടസാധ്യതയുളളവര്‍ എന്നിവര്‍ക്കാണ് ആദ്യം മുന്‍ഗണന നല്‍കുകയെന്നും വിദഗ്ധര്‍ അഭിപ്രായപ്പെട്ടു.

ഫലപ്രദമായ വാക്‌സിന്‍ സമീപ ഭാവിയില്‍ ലഭ്യമാകില്ല. വാക്‌സിന്‍ ലഭ്യമായാല്‍ തന്നെ ഇത് ഫലപ്രദമാണോ എന്ന് പരിശോധിക്കേണ്ടതുണ്ട്. ലോകാരോഗ്യസംഘടനയുടെ നിര്‍ദേശങ്ങള്‍ അനുസരിച്ചുളള നടപടികളാണ് പാലിക്കുക. നിലവില്‍ പൊതുജനാരോഗ്യ രംഗത്തെ പ്രശ്‌നങ്ങള്‍ പരിഹരിക്കുകയാണ് വേണ്ടത്. ആരോഗ്യരംഗത്ത് അസമത്വം വര്‍ധിച്ചുവരികയാണ്. ഇതിന് പരിഹാരം കാണാന്‍ ശക്തമായ ഇടപെടല്‍ ആവശ്യമാണെന്നും വിദഗ്ധര്‍ മുന്നറിയിപ്പ് നല്‍കുന്നു. ഓക്‌സ്‌ഫോര്‍ഡിന്റെ വാക്‌സിന്‍ ഡിസംബറില്‍ ഇന്ത്യയില്‍ നിര്‍മാണം ആരംഭിക്കുകയാണെങ്കില്‍ അതില്‍ മാത്രമാണ് വാക്‌സിന്റെ കാര്യത്തില്‍ ഇനിയുള്ള പ്രതീക്ഷ.

അതെ സമയം രാജ്യത്ത് കോവിഡ് രോഗമുക്തി നിരക്ക് ഉയരുന്നുണ്ട്. കോവിഡ് രോഗമുക്തി നേടി ആശുപത്രി വിട്ടവരുടെ തോത് 77 ശതമാനമായെന്ന് കേന്ദ്ര ആരോഗ്യമന്ത്രാലയം വ്യക്തമാക്കി. ഇതിലും പ്രതീക്ഷ ആരോഗ്യ മേഖല പ്രകടിപ്പിക്കുന്നുണ്ട്. 24 മണിക്കൂറിനിടെ 65,081 പേരാണ് രോഗമുക്തി നേടി ആശുപത്രി വിട്ടത്. ഇതോടെ ആകെ കോവിഡ് മുക്തര്‍ 28,39,882 ആയി ഉയര്‍ന്നു. ജൂലൈ ഒന്നുമുതല്‍ ഒരാഴ്ച വരെയുളള കാലയളവില്‍ രോഗമുക്തി നേടിയവര്‍ ശരാശരി 15,000 ആയിരുന്നു. എന്നാല്‍ കഴിഞ്ഞയാഴ്ച ഇത് 62,000 ആയി ഉയര്‍ന്നതായും സര്‍ക്കാര്‍ കണക്കുകള്‍ ചൂണ്ടിക്കാണിക്കുന്നു. ഘട്ടംഘട്ടമായാണ് രോഗമുക്തി നേടുന്നവരുടെ എണ്ണം ഉയര്‍ന്നത്.

പ്രതിദിനം രോഗം സ്ഥിരീകരിക്കുന്നവര്‍ക്ക് ഒപ്പം രോഗമുക്തി നേടുന്നവരുടെ എണ്ണവും വര്‍ധിക്കുന്നത് പ്രതീക്ഷ നല്‍കുന്നുണ്ട്. നിലവില്‍ ചികിത്സയില്‍ ഉളളവരുടെ 3.61 മടങ്ങാണ് രോഗമുക്തി നേടിയവരെന്നും ആരോഗ്യമന്ത്രാലത്തിന്റെ കണക്കുകള്‍ വ്യക്തമാക്കുന്നു. 24 മണിക്കൂറിനിടെ 69,921 പേര്‍ക്കാണ് രോഗം സ്ഥിരീകരിച്ചത്. ഇതോടെ ചികിത്സയിലുളളവരുടെ എണ്ണം 7,85,996 ആയി ഉയര്‍ന്നിട്ടുണ്ട്. ഇതുവരെ 36,91,167 പേര്‍ക്കാണ് രോഗം സ്ഥിരീകരിച്ചത്. മരണസംഖ്യ 65,288 ആയി ഉയര്‍ന്നതായും സര്‍ക്കാര്‍ കണക്കുകള്‍ വ്യക്തമാക്കുന്നു.