നാളെ മോട്ടോര് വാഹന പണിമുടക്ക്, ഇന്ന് അര്ധരാത്രി മുതല് വ്യാഴാഴ്ച്ച അര്ധരാത്രിവരെ പണിമുടക്ക് നടക്കും, കെ.എസ്.ആര്.ടി.സി. ജീവനക്കാരും പണിമുടക്കില് പങ്കെടുക്കും
രാജ്യത്തെ മോട്ടോര് വാഹന തൊഴിലാളികള് ഇന്ന് അര്ധരാത്രി മുതല് 24 മണിക്കൂര് പണിമുടക്കും. സി.ഐ.ടി.യു, എ.ഐ.ടി.യു.സി, ഐ.എന്.ടി.യു.സി, ബി.എം.എസ്, എച്ച്.എം.എസ്, യു.ടി.യു.സി, എസ്.ടി.യു, എ.ഐ.സി.സി.ടി.യു, എന്.എല്.ഒ, എല്.പി.എഫ്, ടി.യു.സി.ഐ, ജെ.ടി.യു.സി, കെ.ടി.യു.സി തുടങ്ങി ഗതാഗത മേഖലയില് പ്രവര്ത്തിക്കുന്ന മുഴുവന് ദേശീയ സംസ്ഥാന ട്രേഡ് യൂണിയനുകളും സമരത്തില് പങ്കെടുക്കും. റോഡ് ഗതാഗത സുരക്ഷാബില് നടപ്പാക്കരുതെന്ന് ആവശ്യപ്പെട്ടാണ് കേന്ദ്ര ട്രേഡ് യൂണിയന് സംഘടനകളുടെ നേതൃത്വത്തില് നടക്കുന്ന മോട്ടോര് വാഹന പണിമുടക്ക് നടക്കുന്നത്.ഇന്ന് അര്ധരാത്രി മുതല് വ്യാഴാഴ്ച അര്ധരാത്രിവരെയാണ് പണിമുടക്ക് നടക്കുക. പണിമുടക്കില് കെഎസ്ആര്ടിസി ജീവനക്കാരും പങ്കെടുക്കും.
കേരളം നാളെ പൂര്ണമായി നിശ്ചലമാകും. ദേശീയ പണിമുടക്കില് കൊച്ചി തുറമുഖത്തെ ചരക്കു നീക്കം നിലയ്ക്കും. ഫലത്തില് പണിമുടക്ക് ബന്ദിന്റെ പ്രതീതിയുണ്ടാക്കും. 24 മണിക്കൂര് നീണ്ടുനില്ക്കുന്ന പണിമുടക്കില് നിന്നും പാല്, പത്രം, ആശുപത്രി, വിവാഹം എന്നിവയെ ഒഴിവാക്കിയിട്ടുണ്ട്. റോഡ് ഗതാഗത സുരക്ഷാബില് നിയമമായാല് നിലവിലുള്ള ഓട്ടോറിക്ഷകള്, ടാക്സികള്, ചരക്ക് കടത്ത് വാഹനങ്ങള്, സ്യകാര്യ ബസുകള്, സ്റ്റേറ്റ് ട്രാന്സ്പോര്ട്ട് ബസുകള് ഡ്രൈവിങ് സ്കൂളുകള്, ഓട്ടോ കണ്സള്ട്ടന്സികള്, ഓട്ടോമൊബൈല് വര്ക്ക് ഷോപ്പുകള് എന്നിവ ഇല്ലാതാകും. ഇതിന്റെ ഫലമായി യാത്രാകൂലി, ചരക്ക് കടത്ത് കൂലി, നിത്യോപയോഗ സാധനങ്ങളുടെ വില എന്നിവ വര്ധിക്കുമെന്നും വ്യക്തമാക്കി. ഈ സാഹചര്യത്തിലാണ് ദേശവ്യാപക പ്രതിഷേധം. സ്വകാര്യ വാഹനങ്ങളെ തടയില്ലെന്നും സമരസമിതി അറിയിച്ചു.
മോട്ടോര് വാഹന പണിമുടക്കിനെ തുടര്ന്നു വിവിധ സര്വകലാശാലകള് നാളെ നടത്താനിരുന്ന പരീക്ഷകള് മാറ്റിവച്ചു. എംജി സര്വകലാശാല വിദേശ, ദേശീയ ഓഫ്ക്യാംപസ് ഉള്പ്പെടെ എല്ലായിടത്തും എല്ലാ പരീക്ഷകളും മാറ്റി. പുതിയ തീയതി പിന്നീട് പ്രഖ്യാപിക്കും. ആരോഗ്യ സര്വകലാശാല മൂന്നാംവര്ഷ ബിഎച്ച്എംഎസ് ബിരുദ റഗുലര്, സപ്ലിമെന്ററി; ഫൈനല് ബിഎച്ച്എംഎസ് ബിരുദ, റഗുലര് പരീക്ഷകള് മെയ് രണ്ടിലേക്കു മാറ്റി. ഒന്നാംവര്ഷ ബിഫാം(എസ്) പ്രാക്ടിക്കല് പരീക്ഷ (ഫാര്മസ്യൂട്ടിക്കല് കെമിസ്ട്രി) മെയ് ആറിലേക്കു മാറ്റി. കാലടി സംസ്കൃത സര്വകലാശാല ബിഎഫ്എ, ബിഎ പരീക്ഷകള് മെയ് രണ്ടിലേക്കും കണ്ണൂര് സര്വകലാശാല എല്എല്ബി ഒഴികെയുള്ള എല്ലാ പരീക്ഷകളും മെയ് പന്ത്രണ്ടിലേക്കും എല്എല്ബി പരീക്ഷ മെയ് രണ്ടിലേക്കും മാറ്റി. പൊതുവിദ്യാഭ്യാസ വകുപ്പു നടത്തുന്ന ഡിഎഡ് രണ്ടാം സെമസ്റ്റര് പരീക്ഷയും ടിടിസി പരീക്ഷയും മെയ് ഏഴിലേക്കു മാറ്റി. എന്നാല് കാര്ഷിക സര്വകലാശാല പരീക്ഷകളില് മാറ്റമില്ല.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
