റെയില്വേ ടൈംടേബിള് പരിഷ്കരണം: കേരളത്തിലെ 9 പാസഞ്ചര് ട്രെയിനുകള് എക്സ്പ്രസുകളാക്കി മാറ്റും
റെയില്വേ ടൈംടേബിള് പരിഷ്കരണത്തിന്റെ ഭാഗമായി 200 കിലോമീറ്ററില് കൂടുതല് സഞ്ചരിക്കുന്ന പാസഞ്ചര് ട്രെയിനുകള് എക്സ്പ്രസുകളാക്കി മാറ്റും. കേരളത്തിലോടുന്ന 9 പാസഞ്ചര് ട്രെയിനുകളാണ് എക്സ്പ്രസുകളാകുന്നത്. നാഗര്കോവില്- കോട്ടയം, കോയമ്പത്തൂര്-മംഗളൂരു, കോട്ടയം-നിലമ്പൂര്, പുനലൂര്-ഗുരുവായൂര്,തൃശൂര്-കണ്ണൂര്, കണ്ണൂര്-കോയമ്പത്തൂര്, മംഗളൂരു-കോഴിക്കോട്, മധുര-പുനലൂര്, പാലക്കാട് ടൗണ്-തിരുച്ചിറപ്പള്ളി പാസഞ്ചര് എന്നിവയാണ് പട്ടികയിലുള്ളത്.
200 കിലോമീറ്ററില് കൂടുതല് സഞ്ചരിക്കുന്ന ട്രെയിനുകളുടെ ഹാള്ട്ട് സ്റ്റേഷനുകളിലെ സ്റ്റോപ്പുകളാണ് കേരളത്തില് പിന്വലിക്കുന്ന സ്റ്റോപ്പുകളില് ഏറെയും. യാത്രക്കാര് കുറവുളള 5 ജോഡി പാസഞ്ചര് ട്രെയിനുകളും റദ്ദാക്കും. 56387/88 എറണാകുളം- കായംകുളം, 56043/44 തൃശൂര്-ഗുരുവായൂര്, 66315/16 എറണാകുളം-കായംകുളം മെമു, 56333/34 പുനലൂര്-കൊല്ലം പാസഞ്ചര്, 56377/78 ആലപ്പുഴ-കായംകുളം എന്നിവയാണു റദ്ദാക്കുക. പാലക്കാട്-തിരുച്ചെന്തൂര് പാസഞ്ചര് മധുര വരെയാക്കി ചുരുക്കി. പാലക്കാടിനും പൊളളാച്ചിക്കുമിടയില് പാസഞ്ചറായും പൊളളാച്ചിക്കും മധുരയ്ക്കുമിടയില് എക്സ്പ്രസുമായി സര്വീസ് നടത്തും.
എക്സ്പ്രസ് ട്രെയിനുകളുടെ സ്റ്റോപ്പുകള് കേരളത്തില് കാര്യമായി കുറച്ചിട്ടില്ല. മയ്യനാട്, ഡിവൈന് നഗര് സ്റ്റോപ്പുകളാണു പ്രധാനമായും ഒഴിവാക്കിയത്. ചെന്നൈ എഗ്മൂര്-കൊല്ലം എക്സ്പ്രസിന്റെ ഇടമണ്,തെന്മല സ്റ്റോപ്പുകളും തിരുനെല്വേലി-പാലക്കാട് പാലരുവിയുടെ ന്യൂ ആര്യന്കാവ്, തെന്മല സ്റ്റോപ്പുകളും പിന്വലിക്കും. 56375 ഗുരുവായൂര്- എറണാകുളം പാസഞ്ചര് എറണാകുളം-തൃശൂര്, തൃശൂര്-ഗുരുവായൂര് എന്നിങ്ങനെ രണ്ടാക്കും.
റെയില്വേ, ടൈംടേബിള് ഉടച്ചു വാര്ക്കുന്നത് മുംബൈ ഐഐടിയുടെ പഠനത്തിന്റെ അടിസ്ഥാനത്തിലാണ്. എല്ലാ വര്ഷവും സ്റ്റോപ്പുകളും സര്വീസുകളും പുനപരിശോധിച്ചു നഷ്ടത്തിലായവ ഒഴിവാക്കും. ലാഭമായാലും നഷ്ടമായാലും സര്വീസുകള് മാറ്റമില്ലാതെ തുടരുന്ന സ്ഥിതിയാണ് ഇപ്പോഴുളളത്. യാത്രക്കാരുടെ എണ്ണം ഇടയ്ക്കു എടുക്കാറുണ്ടെങ്കിലും യാത്രക്കാര് കുറവുളള സ്റ്റേഷനുകളിലെ സ്റ്റോപ്പുകള് പിന്വലിക്കാനുളള സോണുകളുടെ ശുപാര്ശ രാഷ്ട്രീയ എതിര്പ്പുകള് മൂലം നടപ്പാക്കാറില്ല.
5 ട്രെയിനുകളില് കോച്ചുകളുടെ എണ്ണം കൂടും. ലിങ്ക് ട്രെയിനുകള് ഒഴിവാക്കുന്നതിനാല് ആണിത്. എറണാകുളം-കാരയ്ക്കല്, ചെന്നൈ എഗ്മൂര്-ഗുരുവായൂര്, കന്യാകുമാരി- കത്ര ഹിമസാഗര് എക്സ്പ്രസ്, കൊച്ചുവേളി-ഡറാഡൂണ്, ധന്ബാദ്-ആലപ്പുഴ എന്നിവയിലെ കോച്ചുകളുടെ എണ്ണമാണു കൂടുക. 2 മുതല് 4 വരെ കോച്ചുകള് ആദ്യഘട്ടത്തില് കൂട്ടും. യാത്രക്കാര് കുറവായതിനാല് മംഗളൂരു-കത്ര നവയുഗ് എക്സ്പ്രസ് റദ്ദാക്കും. എറണാകുളം-ടാറ്റ പുതിയ സര്വീസ് ആരംഭിക്കും.
ലിങ്ക് ട്രെയിനുകള്ക്കായി പ്രധാന ജംക്ഷനുകളില് കോച്ചുകള് യോജിപ്പിക്കുന്നതും വേര്പ്പെടുത്തുന്നതും മൂലമുണ്ടാകുന്ന സമയ നഷ്ടവും സുരക്ഷാ പ്രശ്നങ്ങളും ഒഴിവാക്കാനാണു അവ പൂര്ണമായും റെയില്വേ ഒഴിവാക്കുന്നത്. ട്രെയിനുകള് കൃത്യസമയം പാലിക്കാനും ഇതു സഹായിക്കുമെന്നു ദക്ഷിണ റെയില്വേ അധികൃതര് പറഞ്ഞു.
ന്യൂഡല്ഹി-തിരുവനന്തപുരം കേരള എക്സ്പ്രസിന്റെ സമയമാറ്റവും പരിഗണനയിലുണ്ട്. കേരളത്തിലേക്കു ഡല്ഹിയില് നിന്നു വൈകുന്നേരം പ്രതിദിന ട്രെയിനില്ലെന്ന പരാതി പരിഹരിക്കാന് കേരള രാത്രിയില് പുറപ്പെടുന്ന രീതിയില് പുനക്രമീകരിക്കാനാണു ശ്രമം. രാജധാനി, മംഗള, കേരള ഉള്പ്പെടെയുളള പ്രധാന ട്രെയിനുകള് ഇപ്പോള് രാവിലെ 9-നും 12-നും ഇടയിലാണ് ഡല്ഹിയില് നിന്നു പുറപ്പെടുന്നത്. ഡല്ഹിയില് വിവിധ ആവശ്യങ്ങള്ക്കായി എത്തുന്നവര്ക്കു ജോലി തീര്ത്ത് വൈകിട്ടു നാട്ടിലേക്കു മടങ്ങാന് സൗകര്യപ്രദമായ ട്രെയിനില്ലാത്തതിനാല് ഒരു ദിവസം കൂടി ഹോട്ടലുകളില് തങ്ങേണ്ടി വരുന്നുണ്ട്. രാജധാനി ഉള്പ്പെടെ കൊങ്കണ് വഴിയുളള ഡല്ഹി ട്രെയിനുകള് 6 മണിക്കൂറോളം സമയം ലാഭിക്കും.
https://www.facebook.com/Malayalivartha