നവംബറിലെ ശൈത്യകാലത്താണ് ചൈനയില്‍ ആദ്യമായി കോവിഡ് റിപ്പോര്‍ട്ടെ ചെയ്ത്. എന്നാല്‍ ഇന്ത്യയില്‍ കോവിഡ് എത്തിയപ്പോള്‍ വേനല്‍കാലം ആരംഭിച്ചിരുന്നു. അതുകൊണ്ടു തന്നെ വ്യാപനം പതുക്കെയായിരുന്നു. എന്നാല്‍ വീണ്ടും ശൈത്യകാലം വരുമ്പോള്‍ ഇന്ത്യയില്‍ പലസംസ്ഥാനങ്ങളിലും കോവിഡ് വ്യാപനം വര്‍ധിക്കുന്നതാണ്. ഇത് ആശങ്ക വര്‍ധിപ്പിക്കുന്ന കണക്കാണ്. ശൈത്യകാലത്ത് കോവിഡിന്റെ രണ്ടാം വ്യാപനം തള്ളിക്കളയാനാവില്ലെന്ന് നിതി ആയോഗ് അംഗവും കോവിഡ് പ്രതിരോധ പ്രവര്‍ത്തനങ്ങള്‍ ഏകോപിപ്പിക്കുന്ന വിദഗ്ധ സമിതിയുടെ മേധാവിയുമായ വി.കെ. പോള്‍. കേരളമുള്‍പ്പെടെയുള്ള 5 സംസ്ഥാനങ്ങളിലൊഴികെ രാജ്യത്ത് എല്ലായിടത്തും 3 ആഴ്ചയായി കോവിഡ് വ്യാപനം കുറയുകയാണ്. എന്നാല്‍, ശൈത്യ മാസങ്ങളില്‍ രണ്ടാം വ്യാപനം ഉണ്ടായേക്കാം. യൂറോപ്യന്‍ രാജ്യങ്ങളില്‍ ഇങ്ങനെ സംഭവിച്ചു.

ഉത്തരേന്ത്യയില്‍ ശൈത്യകാലവും ഉത്സവ സീസണും ആരംഭിക്കാനിരിക്കെ ജനങ്ങള്‍ അതീവ ജാഗ്രത പാലിക്കണം. കോവിഡ് നിയന്ത്രണത്തില്‍ രാജ്യം കൈവരിച്ച പുരോഗതി ഒരുപക്ഷേ, വരും മാസങ്ങളില്‍ നഷ്ടമായേക്കാം. കോവിഡ് വാക്‌സീന്‍ ലഭ്യമായാല്‍ അത് രാജ്യത്ത് എല്ലാവര്‍ക്കും എത്തിക്കാനുള്ള സൗകര്യമുണ്ടെന്നും അദ്ദേഹം വ്യക്തമാക്കി. ഇതിനിടെ, ദിനപത്രത്തിലൂടെ കോവിഡ് പടരില്ലെന്നു കേന്ദ്ര ആരോഗ്യ മന്ത്രി ഡോ.ഹര്‍ഷ് വര്‍ധന്‍ ആവര്‍ത്തിച്ചു. 'വായുവിലൂടെയാണു വൈറസ് പടരുന്നത്. പത്രം വീട്ടില്‍ വരുത്തുന്നതിനെ ആരും ഭയക്കേണ്ടതില്ല.' സമൂഹമാധ്യമത്തിലൂടെ നടത്തിയ ആശയവിനിമയത്തിനിടെ സംശയങ്ങള്‍ക്കു മറുപടിയായി മന്ത്രി പറഞ്ഞു.

കോവിഡ് വന്നവര്‍ക്കു വീണ്ടും ബാധിക്കാനുള്ള സാധ്യത ഏറെയാണെന്ന് യുകെയിലെ ശാസ്ത്രജ്ഞര്‍. ചുരുങ്ങിയ സമയത്തിനുള്ളില്‍ തന്നെ അതു വീണ്ടും വരാം. ഈ സാഹചര്യത്തില്‍ വാക്‌സീന്‍ കൂടാതെ ദീര്‍ഘകാല പ്രതിരോധം സാധ്യമല്ലെന്ന് അവര്‍ ചൂണ്ടിക്കാട്ടി. രണ്ടാമതും കോവിഡ് ബാധിക്കുന്നതിന്റെ കാരണം വ്യക്തമാകാന്‍ വിശദപഠനം വേണ്ടിവരും. രണ്ടുതവണയും രണ്ടുതരം വൈറസ് ആണോ എന്നതും പഠനത്തിലൂടെയേ കണ്ടെത്താനാവൂ എന്നും അവര്‍ പറഞ്ഞു.