ഏറ്റവും കൂടുതല്‍ ശമ്പളമുള്ള വ്യക്തി ആരാണെന്ന് ചോദിച്ചാല്‍ പലരും പറയുന്ന ഒരേയൊരു ഉത്തരം പ്രധാനമന്ത്രിയുടെതായിരിക്കും. എന്നാല്‍ പ്രധാനമന്ത്രി തന്നെ കണ്ണും തള്ളിയിരിക്കുകയാണ് വെറൊരാളുടെ ശമ്പളം കേട്ടിട്ട്. ജാര്‍ഖണ്ഡില്‍ മുഖ്യമന്ത്രിയുടെ ശമ്പളം പ്രധാനമന്ത്രിയുടെതിനെക്കാളും ഇപ്പോള്‍ കൂടിയിരിക്കുകയാണ്. പ്രധാനമന്ത്രി നരേന്ദ്ര മോഡിയുടെ വാര്‍ഷിക ശമ്പളം 19.20 ലക്ഷം രൂപയാണെങ്കില്‍ ജാര്‍ഖണ്ഡില്‍ മുഖ്യമന്ത്രിക്ക് ഇനി മുതല്‍ 24.60 ലക്ഷം രൂപ ശമ്പളമായി കിട്ടും.17.22 ലക്ഷമായിരുന്നു ഇതിന് മുമ്പ് ശമ്പളം. മുഖ്യമന്ത്രി രഘുവര്‍ ദാസിന്റെ അധ്യക്ഷതയില്‍ ചേര്‍ന്ന മന്ത്രിസഭാ യോഗത്തിലാണ് ശമ്പളം പരിഷ്‌കരണം കൊണ്ട് വന്നിരിക്കുന്നത്.
ഇനി മുതല്‍ മുഖ്യമന്ത്രിക്കു മാസശമ്പളം രണ്ടുലക്ഷത്തിലേറെ രൂപയാണ്. ശമ്പളത്തിലും മറ്റാനുകൂല്യങ്ങളിലും മൂന്നിരട്ടിയിലേറെയാണു വര്‍ധനവ് ഉണ്ടായിരിക്കുന്നത്. മന്ത്രിസഭാംഗങ്ങളുടെ ശമ്പളവും ഒട്ടും മോശമല്ല. വര്‍ഷത്തില്‍ 21.60 ലക്ഷം. നിലവില്‍ ഇതു 15.30 ലക്ഷമായിരുന്നു. മന്ത്രിമാര്‍ക്കൊപ്പം തന്നെയാണ് എംഎല്‍എമാരുടെ ശമ്പളവും. വര്‍ഷത്തില്‍ 21.64 ലക്ഷം. പതിനൊന്നു ലക്ഷത്തില്‍ നിന്നാണ് ഈ വമ്പന്‍ കുതിച്ചുചാട്ടം. നിലവില്‍ മാസം 89,000 രൂപ ശമ്പളം വാങ്ങിയിരുന്ന പ്രതിപക്ഷ നേതാവിനും ചീഫ് വിപ്പിനും ഇനി മാസം ഒന്നേമുക്കാല്‍ ലക്ഷം രൂപ കിട്ടും.
ഡപ്യൂട്ടി സ്പീക്കര്‍ക്ക് ഒന്നരലക്ഷവും. ഇതുവഴി സംസ്ഥാന ഖജനാവിനു 13 കോടി രൂപ പ്രതിവര്‍ഷം അധികബാധ്യത വരും. ഇതിനു പുറമേ ജില്ലാ പഞ്ചായത്ത്, ഗ്രാമപഞ്ചായത്ത് അംഗങ്ങളുടെ ഓണറേറിയവും വര്‍ധിപ്പിക്കുകയും ചെയ്തു. മാവോയിസ്റ്റ് ആക്രമണത്തില്‍ തിരഞ്ഞെടുപ്പ് ഉദ്യോഗസ്ഥര്‍ കൊല്ലപ്പെട്ടാല്‍ ആശ്രിതര്‍ക്ക് 20 ലക്ഷം രൂപ നല്‍കും. എന്നാല്‍ കേരള മുഖ്യമന്ത്രി ഉമ്മന്‍ചാണ്ടിയ്ക്ക് മാസശമ്പളമായി കിട്ടുന്നത് വെറും 51,009 രൂപയാണ്. ജാര്‍ഖണ്ഡ് മുഖ്യമന്ത്രിക്കു മാസം രണ്ടു ലക്ഷത്തിലേറെ രൂപ ശമ്പളം കിട്ടുമ്പോള്‍ കേരളത്തില്‍ മുഖ്യമന്ത്രിയുടെ പ്രതിമാസ ശമ്പളം 51,009 രൂപ മാത്രമാണ്. മുഖ്യമന്ത്രി ഉമ്മന്‍ ചാണ്ടിക്ക് ഈ ശമ്പളം ലഭിക്കുമ്പോള്‍ ഏറ്റവും ജൂനിയറായ മന്ത്രിക്ക് ഇതില്‍ നിന്നു രണ്ടായിരത്തോളം രൂപ കുറവു വരും. മറ്റു മന്ത്രിമാരുടെ ശമ്പളം ഇതിനുള്ളില്‍ വരും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha