എന്റെ മകനൊരു ഭര്ത്താവിനെ വേണം
പത്മ അയ്യര് എന്ന മുംബൈയിലെ അമ്മയും മകനു വേണ്ടി ഒരു കല്യാണ പരസ്യം ചെയ്തു സാധാരണ പരസ്യത്തില് നിന്നും കുറച്ച് വ്യത്യസ്തമാണെന്നു മാത്രം, ആ പരസ്യമിപ്പോള് ചരിത്രമായിരിക്കുകയാണ്. മാത്രവുമല്ല, ഏതാനും ഇഞ്ച് സ്ഥലത്ത് ഒതുങ്ങിയ ആ പരസ്യം ഇന്ത്യയൊട്ടുക്ക് പുതിയ ചര്ച്ചയ്ക്കും തുടക്കമിട്ടു കഴിഞ്ഞു.
പരസ്യം ഇങ്ങനെയാണ്: \'നല്ല ജോലിയുള്ള, മൃഗസ്നേഹിയായ, വെജിറ്റേറിയനായ വരനെ തേടുന്നു. എന്റെ മകനു വേണ്ടിയാണ്. അവന് ഒരു എന്ജിഒയില് ജോലി ചെയ്യുന്നു. വരന്റെ ജാതി പ്രശ്നമല്ല, അയ്യരാണെങ്കില് സന്തോഷം. മകന്റെ ഉയരം അഞ്ചടി 11 ഇഞ്ച്, വയസ്സ് 36.\' പരസ്യം വായിച്ചവര് ആദ്യമൊന്നു ഞെട്ടി. വല്ല അക്ഷരപ്പിശകും പറ്റിയതാണെന്നാണു പലരും കരുതിയത്. എന്നാല് പരസ്യം തൊട്ടുപിറകെ വാര്ത്തയായതോടെ ഉറപ്പായി, സംഗതി സത്യമാണ്. പത്മയുടെ മകന് ഹരിഷ് അയ്യര്ക്കു വേണ്ടിയായിരുന്നു മാട്രിമോണിയലിലൂടെ വരനെ തേടിയത്. സ്വവര്ഗാനുരാഗികളുടെ അവകാശത്തിനു വേണ്ടി പ്രവര്ത്തിക്കുന്ന സംഘടനയിലെ അംഗം കൂടിയാണ് ഹരിഷ്.
മകന് അല്ലെങ്കില് മകള് സ്വവര്ഗാനുരാഗിയാണ് എന്ന കാരണത്താല് ഒട്ടേറെ മാതാപിതാക്കള് ഇന്ത്യയില് സങ്കടപ്പെടുന്നുണ്ടെന്നു പറയുന്നു പത്മ. അവര്ക്കെല്ലാം തന്റെ ഈ നീക്കം പ്രചോദനമാകുമെന്നാണ് കരുതുന്നത്. ഇതിനോടകം പരസ്യത്തിനു മറുപടിയായി ആറ് പ്രൊപ്പോസലുകള് വന്നു എന്നതുതന്നെ ഇതിന് ഉദാഹരണമായി അവര് ചൂണ്ടിക്കാട്ടുന്നു.എന്നാല് പത്രത്തില് ഇത്തരമൊരു പരസ്യം നല്കുക അത്ര എളുപ്പമായിരുന്നില്ല എന്നും അവര് പറയുന്നു. ഇന്ത്യയില് സ്വര്വര്ഗ വിവാഹം നിയമവിധേയമല്ല. അതിനാല്ത്തന്നെ നിയമപ്രശ്നം പറഞ്ഞായിരുന്നു പലരും പരസ്യം തള്ളിയത്. എന്നാല് സ്വവര്ഗ വിവാഹം ഇന്ത്യയില് നിയമവിരുദ്ധമല്ലെന്നു പറയുന്നു ഹരിഷ്. സ്വവര്ഗ വിവാഹത്തിന് നിയമസാധുത ഉണ്ടാകില്ല എന്നതുമാത്രമാണു പ്രശ്നം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
