ജയലളിത മുഖ്യമന്ത്രിയായി ചുമതലയേറ്റു, ചടങ്ങില് സാക്ഷ്യം വഹിക്കാന് വന് താരനിര, ആഘോഷത്തിമിര്പ്പില് തമിഴ്ജനത
ജെ.ജയലളിത തമിഴ്നാട് മുഖ്യമന്ത്രിയായി വീണ്ടും ചുമതലയേറ്റു. ഇത് അഞ്ചാം തവണയാണ് ജയലളിത മുഖ്യമന്ത്രി സ്ഥാനത്തെത്തുന്നത്. മദ്രാസ് യൂണിവേഴ്സിറ്റി സെന്റിനറി ഓഡിറ്റോറിയത്തില് നടന്ന ചടങ്ങില് ഗവര്ണര് കെ.റോസയ്യ ജയലളിതയ്ക്ക് സത്യവാചകം ചൊല്ലിക്കൊടുത്തു. ഒ.പനീര്ശെല്വം മന്ത്രിസഭയിലെ രണ്ടു മന്ത്രിമാര് ഒഴികെ എല്ലാവരും വീണ്ടും സത്യപ്രതിജ്ഞ ചെയ്തു അധികാരമേറ്റിട്ടുണ്ട്. പനീര് ശെല്വം മന്ത്രിസഭയില് വകുപ്പുകളൊന്നും ലഭിക്കാതിരുന്ന പി. ചെന്തൂര് പാണ്ഡ്യന്, ആഗ്രികള്ച്ചര് എഞ്ചിനീയറിംഗ് വകുപ്പിലെ അസിസ്റ്റന്റ് എക്സിക്യൂട്ടീവ് എഞ്ചിനിയര് ആത്മഹത്യ ചെയ്തതിനെത്തുടര്ന്ന് അറസ്റ്റിലായ മുന്മന്ത്രി കൃഷ്ണമൂര്ത്തി എന്നിവര് പുതിയ മന്ത്രിസഭയിലില്ല.
ചടങ്ങിന് സാക്ഷ്യം വഹിക്കാന് വന് താരനിരയും അണിനിരന്നിരുന്നു. സൂപ്പര് സ്റ്റാര് രജനികാന്ത്, ശരത്കുമാര്, കാര്ത്തി, പ്രഭു, വിക്രം, സംഗീത സംവിധായകന് ഇളയരാജ, ഐസിസി അധ്യക്ഷന് എന്.ശ്രീനിവാസന് തുടങ്ങി നിരവധി പ്രമുഖര് ചടങ്ങില് പങ്കെടുത്തു. ആയിരക്കണക്കിന് അണ്ണാ ഡിഎംകെ പ്രവര്ത്തകരും ചടങ്ങുകള്ക്ക് സാക്ഷ്യം വഹിച്ചു. നേരത്തെ ജയലളിത വരുന്ന വഴിയില് നൂറുകണക്കിന് പ്രവര്ത്തകരാണ് പിന്തുണയുമായി ഉണ്ടായിരുന്നത്. സത്യപ്രതിജ്ഞയോട് അനുബന്ധിച്ച് ചെന്നൈയില് വന് സുരക്ഷയും ഒരുക്കിയിരുന്നു.
ജയലളിത മുഖ്യമന്ത്രിയായിരുന്ന 2011-14 കാലഘട്ടത്തിലെ വിശ്വസ്തരില് പലരെയും പുതിയ മന്ത്രിസഭയില് ഉള്പ്പെടുത്തിയിട്ടുണ്ട്. ഒ. പനീര്ശെല്വം ധനകാര്യമന്ത്രിയായും നാഥം ആര്. വിശ്വനാഥന് വൈദ്യുതി മന്ത്രിയായും ആര്. വൈത്തിലിംഗം ഭവനമന്ത്രിയായും തുടരും. ആഭ്യന്തരം, പൊതുഭരണം എന്നീ വകുപ്പുകള് ജയലളിതതന്നെ കൈകാര്യം ചെയ്യും. അനധികൃത സ്വത്തു സമ്പാദനക്കേസില് ശിക്ഷിക്കപ്പെട്ടതോടെയാണ് ജയലളിതയ്ക്ക് നേരത്തെ മുഖ്യമന്ത്രി പദം നഷ്ടമായത്. പിന്നീട് കര്ണാടക ഹൈക്കോടതി ശിക്ഷ റദ്ദാക്കിയതോടെ ജയലളിത വീണ്ടു ഭരണതലപ്പത്തേയ്ക്ക് വരികയായിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
