ആയിരം കുറ്റവാളികൾ രക്ഷപെട്ടാലും ഒരു നിരപരാധി പോലും ശിക്ഷിക്കപ്പെടരുത് എന്ന ഇന്ത്യൻ നിയമവ്യവസ്ഥയെ കാറ്റിൽ പറത്തിയ ഒരു സംഭവമാണ് യുപിയിൽ നിന്ന് നമുക്ക് കേൾക്കാൻ കഴിയുന്നത്.

ഉത്തർപ്രദേശിൽ ബലാത്സംഗക്കേസിൽ 20 വർഷം കഠിനതടവ് അനുഭവിച്ച യുവാവിനെ നിരപരാധിയാണെന്ന് കണ്ടെത്തിയിരിക്കുകയാണ്​ അലഹബാദ് ഹൈക്കോടതി. ഉത്തർപ്രദേശിലെ ലളിത്​പൂർ ജില്ലയിലെ വിഷ്ണു തിവാരിയാണ്​ ഇത്തരത്തിൽ ഒരു ക്രൂര സംഭവത്തിന് ഇരയായത്​.

1990 സെപ്​റ്റംബറിൽ അറസ്റ്റിലായ വിഷ്​ണുവിനെ 2021 ജനുവരിയിലാണ്​ നിരപരാധിയാണെന്ന് കോടതി ​വിധിക്കുന്നത്​. ലളിത്പൂർ ജില്ലയിലെ ഒരു സ്ത്രീ ജോലിക്ക്​ പോകുന്നതിനിടയിൽ ലൈംഗികമായി ആക്രമിക്കപ്പെട്ടുവെന്ന്​ ആ​രോപിച്ച്​​ നൽകിയ പരാതിയാണ്​ വിഷ്​ണുവിന്റെ ജീവിതം മാറ്റിമറിച്ചത്.

ജയിൽ നടപടി ക്രമങ്ങളെല്ലാം പൂർത്തിയായി കഴിഞ്ഞ ദിവസമാണ്​ തന്‍റെ ജീവിതത്തിൽ നിന്ന്​ യുവത്വം കവ​ർന്നെടുത്ത ജയിലിൽ​ നിന്ന്​ വിഷ്​ണു ജീവിതത്തിലേക്കുള്ള യാത്ര തുടങ്ങിയത്​.

ഈ നാല്പതാം വയസ്സിൽ ഇനി എങ്ങോട്ട് എന്ന ആശയകുഴപ്പത്തിലാണ് ഈ ചെറുപ്പക്കാരൻ. 'ബലാത്സംഗകേസിലെ പ്രതിയെന്ന്​ പൊലീസും, നീതിന്യായ വ്യവസ്ഥകളും വിധിച്ച വിഷ്​ണുവിനെ കാത്തിരിക്കാൻ പുറത്ത് ബന്ധുക്കളോ സുഹൃത്തുക്കളോ​ ആരും തന്നെ ഇല്ല.

അവന്‍റെ ജീവിതത്തിലെ എല്ലാം കഴിഞ്ഞ രണ്ടു പതിറ്റാണ്ട്​ കൊണ്ട്​ ഭരണകൂടവും നീതിന്യായ വ്യവസ്ഥകളും കവർന്നെടുത്തു. 23ാം വയസിൽ കുറ്റാരോപിതനായി കസ്റ്റഡിയിലാവുകയും മെനഞ്ഞെടുത്ത തെളിവുകളാൽ കുറ്റവാളിയായി ശിക്ഷിക്കപ്പെടുകയും ചെയ്​ത വിഷ്​ണുവിനെ 43ാം വയസിലാണ്​ പ്രതിയല്ലെന്ന്​ മനസ്സിലാക്കി കോടതി​ വെറുതെ വിടു​ന്നത്​.

20 വർഷം കൊണ്ട്​ അപരിചിതമായ ആ മതിൽക്കെട്ടിന്​ പുറത്ത്​ 'അനാഥനായ' അവനെ കാണാൻ ചില മാധ്യമ പ്രവർത്തകർ മാത്രമാണ് വന്നിരുന്നത്​. ''ഞാൻ 20 വർഷമായി ജയിലിലാണ്. ഇനി എനിക്കിവിടെ എന്താണ്​ പ്രതീക്ഷിക്കാനുള്ളത്​.

ആരോഗ്യം, കുടുംബം തുടങ്ങി എന്‍റെ എല്ലാം നഷ്​ടപ്പെട്ടിരിക്കുന്നു. ഒരു അനുജൻ മാത്രമാണ്​ ഇനി എനിക്കുള്ളു. ഞാൻ കല്യാണം കഴിച്ചിട്ടില്ല. എന്‍റെ കൈകൾ ജയിൽ അടുക്കളയിൽ രാപ്പകൽ ജോലി ചെയ്​തതിന്‍റെ പൊള്ളലുകളും നീറ്റലുകളും മാത്രമാണ് ഇപ്പോൾ എനിക്കൊപ്പമുള്ളത്​.

ജയിലധികൃതർ തന്ന 600 രൂപയുണ്ട്​, അതുമായി നാട്ടിലേക്കുള്ള ബസ്​ കയറണമെന്നാണ്​ ആഗ്രഹിക്കുന്നതെന്നും മാധ്യമപ്രവർത്തകരോട്​ വിഷ്​ണു വെളിപ്പെടുത്തി.''

സ്ത്രീയുടെ പരാതിയെ തുടർന്ന്​ ബലാത്സംഗത്തിനും അതിക്രമത്തിനും ഒപ്പം പട്ടിക ജാതി- പട്ടിക വർഗ നിയമപ്രകാരവും കേസെടുത്തിരുന്നു. അന്വേഷണ സംഘം സമർപ്പിച്ച തെളിവുകളുടെ അടിസ്ഥാനത്തിൽ മൂന്നുവർഷത്തിനു ശേഷം ലളിത്പൂർ കോടതി ബലാത്സംഗ കുറ്റത്തിന് 10 വർഷത്തെ കഠിന തടവ്​ വിഷ്​ണുവിന്​ വിധിച്ചു.

പട്ടിക ജാതി- പട്ടിക വർഗ നിയമപ്രകാരമുള്ള മറ്റ്​ ശിക്ഷകളും വിധിച്ചു. ആ വിധിയാണ്​ ഇപ്പോൾ ഹൈകോടതി തിരുത്തിയത്​. കുറ്റവിമുക്​തനാക്കിയുള്ള അലഹബാദ് ഹൈക്കോടതി വിധിയിലെ നിരീക്ഷണം ഇങ്ങനെയാണ്, ബലാത്സംഗത്തിനിരയാകുന്ന ഒരാളിൽ നടത്തുന്ന വൈദ്യശാസ്​ത്ര പരിശോധനയിൽ ചിലതെളിവുകൾ കണ്ടെത്തേണ്ടതാണ്.

പ്രതി പരാതിക്കാരിയുടെ വായ പത്ത്​ മിനു​ട്ടോളം അടച്ചുപിടിച്ചെവെന്നും, അവരെ നിലത്തേക്ക്​​ തള്ളിയിട്ടുവെന്നും പരാതിയിൽ പറയുന്നുണ്ട്​. ബലാത്സംഗത്തിന്‍റെ ലക്ഷണങ്ങളൊന്നും കണ്ടെത്തിയില്ല.

സ്​ത്രീക്ക്​ ആന്തരിക പരിക്കുകൾ ഇല്ലെന്നാണ്​ വൈദ്യപരിശോധന നടത്തിയ ഡോക്​ടർമാരുടെ റിപ്പോർട്ടിൽ പറയുന്നത്​. മൂന്ന്​ സാക്ഷികളെ ക്രോസ് വിസ്താരം നടത്തിയപ്പോഴും നിരവധി വൈരുദ്ധ്യങ്ങളുണ്ടെന്നും ​ഹൈകോടതി നിരീക്ഷിച്ചു.

തെളിവുകളും വസ്തുതകളും കണക്കിലെടുക്കുമ്പോൾ, കുറ്റാരോപിതനായി പ്രതി അന്യായമായി ശിക്ഷിക്കപ്പെട്ടുവെന്ന് ഞങ്ങൾ മനസിലാക്കുന്നു എന്നും, അതിനാൽ വിധിന്യായവും ഉത്തരവും തിരുത്തി പ്രതിയെ കുറ്റവിമുക്തനാക്കുന്നുവെന്നായിരുന്നു പുറപ്പെടുവിച്ച വിധി.