യോഗ പരിശീലനത്തിനിടെ ഉറങ്ങി പോയാല്‍ എന്ത് ചെയ്യും. ഇന്നലെ യോഗാ പരിശീലനത്തിനിടെ കേന്ദ്ര റെയില്‍വെ മന്ത്രി സുരേഷ് പ്രഭുവാണ് യോഗയ്ക്കിടെ ഉറങ്ങിപോയത്. ശവാസനം പരിശീലിച്ച കേന്ദ്രമന്ത്രി ക്ഷീണിച്ച് ഉറങ്ങി പോവുകയായിരുന്നു. സംസ്ഥാനത്ത് യോഗ ദിനാചരണത്തിന് നേതൃത്വം നല്‍കിയത് സുരേഷ് പ്രഭുവായിരുന്നു. ഹൈബി ഈഡന്‍ എംഎല്‍എയും ബിജെപി ജനറല്‍ സെക്രട്ടറി എ എന്‍ രാധാകൃഷ്ണനുമുള്‍പ്പെടെയുള്ളവര്‍ കേന്ദ്രമന്ത്രിക്കൊപ്പം യോഗയില്‍ പങ്കെടുത്തിരുന്നു.
എല്ലാവരെയും ഞെട്ടിച്ചായിരുന്നു മന്ത്രിയുടെ ഉറക്കം. കടവന്ത്ര രാജീവ് ഗാന്ധി ഇന്‍ഡോര്‍ സ്‌റ്റേഡിയത്തില്‍ നെഹ്‌റു യുവകേന്ദ്രയുടെ നേതൃത്വത്തില്‍ നടന്ന യോഗാദിന സംഗമത്തിലാണ് ഇത്തരമൊരു അപൂര്‍വ്വം സംഭവം ഉണ്ടായത്. കൂടെ ഉണ്ടായിരുന്നവര്‍ പോലും ഒന്ന് ഞെട്ടിപ്പോയി. യോഗപരിശീലിപ്പിച്ച സുദക്ഷണ തമ്പി പറഞ്ഞതനുസരിച്ച് ബാക്കിയെല്ലാവരും ശവാസനം പൂര്‍ത്തിയാക്കി എഴുന്നേറ്റു.
എന്നാല്‍ മന്ത്രിമാത്രം എഴുന്നേറ്റില്ല. ശവാസനത്തിനിടെ ഉറക്കത്തിലേക്കു വഴുതിപ്പോകുകയായിരുന്നു മന്ത്രി. ഹൈബിയും രാധാകൃഷ്ണനുമുള്‍പ്പെടെ സമീപത്തുണ്ടായിരുന്നവരൊക്കെ കേന്ദ്രമന്ത്രിയെ വിളിച്ചുണര്‍ത്താന്‍ ആദ്യമൊക്കെ മടിച്ചു. ഒടുവില്‍ പരിശീലകന്‍ തന്നെ അടുത്തെത്തി മന്ത്രിയെ വിളിച്ചുണര്‍ത്തുകയായിരുന്നു. സര്‍വാംഗങ്ങള്‍ക്കും വിശ്രമം നല്‍കിയുള്ള നീണ്ടു നിവര്‍ന്നുള്ള കിടപ്പാണ് അടിസ്ഥാന യോഗമുറയായ ശവാസനം. ഈ മുറ പരിശീലിക്കുമ്പോള്‍ ഉറങ്ങാന്‍ പാടില്ലെന്നാണ് വാസ്തവം. ഏതായാലും യോഗ പരിശീലനത്തിനിടെ ഇത്തരത്തിലൊരു സംഭവം അറിഞ്ഞ് ഞെട്ടിയിരിക്കുകയാണ് പലരും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha