2021 സീസണിലെ ലോകത്തിലെ ഏറ്റവും ഉയരം കൂടിയ എവറസ്റ്റ് കൊടുമുടി കീഴടക്കിയെന്ന നേട്ടവുമായി ഇന്ത്യക്കാരി. അരുണാചല്‍ സ്വദേശി താഷി യാങ്ഗോമാണ് ഈ നേട്ടത്തിന് അർഹമാക്കിയിരിക്കുന്നത്.

അരുണാചല്‍ പ്രദേശിലെ ദിരങ് നാഷണല്‍ ഇന്‍സ്റ്റിറ്റ്യൂട്ട് ഒാഫ് മൗന്‍റൈനീറിങ് ആന്‍ഡ് അലൈഡ് സ്പോര്‍ട്സിലാണ് (നിമാസ്) താഷി പരിശീലനം പൂര്‍ത്തിയാക്കിയിരിക്കുന്നത്. കേന്ദ്ര യുവജനകാര്യ മന്ത്രി കിരണ്‍ റിജിജുവാണ് സന്തോഷ വാര്‍ത്ത ട്വിറ്ററിലൂടെ പുറം ലോകത്തെ അറിയിച്ചത്.

നിമാസിലെ നിരന്തര പരിശീലനമാണ് താഷിയെ കരുത്തയായ പര്‍വതാരോഹകയായി മാറ്റിയതെന്ന് അരുണാചല്‍ മുഖ്യമന്ത്രി പേമ ഖണ്ഡു അറിയിച്ചു.

മേയ് 11നാണ് 8,849 മീറ്റര്‍ ഉയരം താഷി കീഴടക്കിയത്. നിമാസില്‍ നിന്നും പരിശീലനം പൂര്‍ത്തിയാക്കി എവറസ്റ്റ് കീഴടക്കിയ ഒമ്ബതാമത്തെ പര്‍വതാരോഹകയാണ് 37കാരിയായ താഷി യാങ്ഗോം.

അരുണാചല്‍ പ്രദേശിലെ പശ്ചിമ കമെങ് ജില്ലയില്‍ 52 ഏക്കര്‍ സ്ഥലത്ത് വ്യാപിച്ചു കിടക്കുന്ന സ്ഥാപനമാണ് നിമാസ്. ഭൂമി, വായു, അക്വാ മേഖലകളിലെ രാജ്യത്തെ ആദ്യത്തെ സാഹസിക സ്ഥാപനമാണ്. പര്‍വത രക്ഷാപ്രവര്‍ത്തനം, പര്‍വതാരോഹണം, സാഹസിക വിനോദങ്ങള്‍ എന്നിവയില്‍ പ്രത്യേക പരിശീലനം നൽകിയിരിക്കുന്നത്.

കോവിഡ് വ്യാപനത്തെ തുടര്‍ന്ന് കഴിഞ്ഞ വര്‍ഷം എവറസ്റ്റ് പര്‍വതാരോഹണം റദ്ദാക്കിയിരുന്നു. ഈ വര്‍ഷം 400 പേര്‍ക്ക് പര്യവേഷണ പെര്‍മിറ്റ് നൽകിയിരുന്നത്.