ബി.ജെ.പിയുടെ ടൂള്‍ കിറ്റ്​ ആരോപണത്തിന്​ പിന്നാലെ പ്രതികരണവുമായി കോണ്‍ഗ്രസ്​ നേതാവ്​ രാഹുല്‍ ഗാന്ധി. 'സത്യം ഭയമില്ലാതെ തുടരും' എന്ന ഒറ്റ വാചകത്തിലൂടെയായിരുന്നു രാഹുലിന്റെ പ്രതികരണം. ടൂള്‍കിറ്റ്​ ഹാഷ്​ടാഗിനൊപ്പമായിരുന്നു രാഹുലിന്റെ ട്വീറ്റ്​.

ബി.ജെ.പി വക്താവ്​ സംപിത്​ പത്ര പങ്കുവെച്ച ടൂള്‍കിറ്റ്​ ട്വീറ്റുമായി ബന്ധ​പ്പെട്ട്​ ഡല്‍ഹി പൊലീസിന്റെ പ്രത്യേക സംഘം ട്വിറ്റര്‍ ഇന്ത്യയുടെ ഡല്‍ഹിയിലെയും ഗുരുഗ്രാമിലെയും ഒാഫിസില്‍ എത്തിയിരുന്നു. ഇതിനുപിന്നാലെയാണ്​ രാഹുലിന്റെ ട്വീറ്റ്​.

സംപിത്​ പത്ര ആരോപിച്ച കോണ്‍ഗ്രസ്​ ​ടൂള്‍ കിറ്റ്​ കേസുമായി ബന്ധപ്പെട്ട്​ ഡല്‍ഹി പൊലീസ്​ അന്വേഷണം ശക്തമാക്കിയിരുന്നു. ഇതിനെ തുടര്‍ന്ന്​ ലഡോ സാരായിലെയും ഗുരുഗ്രാമിലെയും ട്വിറ്റര്‍ ഒാഫിസിലെത്തി പൊലീസ്​ അന്വേഷണം നടത്തുകയും ചെയ്​തിരുന്നു. വിവരങ്ങള്‍ ശേഖരിക്കാന്‍ എത്തിയതെന്നായിരുന്നു വിശദീകരണം. എന്നാല്‍ ട്വിറ്റര്‍ ഇന്ത്യയുടെ ഓഫിസ്​ അടച്ചിട്ട നിലയിലായിരുന്നു.

പ്രധാനമന്ത്രി നരേ​ന്ദ്ര മോദിയെ അധിക്ഷേപിക്കാന്‍ കോണ്‍ഗ്രസ്​ ടൂള്‍ കിറ്റ്​ ഉപയോഗിച്ചുവെന്ന്​ സംപിത്​ പത്ര ട്വിറ്ററിലൂടെ ആരോപിക്കുകയായിരുന്നു. ഇതിന്റെ രേഖകളും സംപിത്​ പത്ര പങ്കുവെച്ചു. എന്നാല്‍ സംപിത്​ പത്ര ട്വിറ്ററിലൂടെ പങ്കുവെച്ച രേഖകള്‍ക്ക്​ 'മാനിപുലേറ്റഡ്​ മീഡിയ' എന്ന ടാഗ്​ ട്വിറ്റര്‍ നല്‍കിയിരുന്നു. ഇതില്‍ വിശദീരണം തേടുകയായിരുന്നു ഡല്‍ഹി പൊലീസ്​. എന്ത്​ അടിസ്​ഥാനത്തിലാണ്​ സംപിത്​ പത്ര പങ്കുവെച്ച ചിത്രം തെറ്റാണെന്ന്​ സൂചിപ്പിക്കുന്നതെന്ന്​ വിശദമാക്കണമെന്നായിരുന്നു പൊലീസി​െന്‍റ ആവശ്യം.

സംപിത പത്ര പങ്കുവെച്ച രേഖകള്‍ വ്യാജമായി ചമച്ചതാണെന്ന് ചൂണ്ടിക്കാട്ടി കോണ്‍ഗ്രസ്​ രംഗത്തെത്തിയിരുന്നു. ഇതു സംബന്ധിച്ച്‌​ പൊലീസ്​ പരാതി നല്‍കുകയും ചെയ്​തിരുന്നു.