ലോക്​ഡൗണില്‍ കൂടുതല്‍ ഇളവുകളുമായി ഉത്തര്‍പ്രദേശ്​ സര്‍ക്കാര്‍. ലഖ്‌നൗ, ഗോരഖ്​പൂര്‍, മീററ്റ്, സഹ്‌റാന്‍പൂര്‍ എന്നിവ ഒഴികെയുള്ള 71 ജില്ലകളില്‍ നിന്ന്​​ ലോക്​ഡൗണ്‍ നിയന്ത്രണങ്ങള്‍ നീക്കി. 600 ല്‍ അധികം ആക്റ്റീവ് കേസുകള്‍ ഉള്ള ജില്ലകളിലാണ്​ നിയന്ത്രണങ്ങള്‍ തുടരുന്നത്​.

അതെ സമയം ശനിയും ഞായറും വാരാന്ത്യ ലോക്​ഡൗണ്‍ സംസ്ഥാനത്ത് തുടരും. നിയന്ത്രണങ്ങള്‍ തുടരുന്ന ജില്ലകളില്‍ മാറ്റം വേണമോ എന്നതിനെ കുറിച്ച്‌​ ചൊവ്വാഴ്​ച നടക്കുന്ന യോഗത്തില്‍ തീരുമാനിക്കുമെന്ന്​​ സര്‍ക്കാര്‍ വൃത്തങ്ങള്‍ പറഞ്ഞു. സംസ്ഥാനത്തെ കോവിഡ് കേസുകളുടെ എണ്ണം കുറഞ്ഞുവരികയാണ്​.

36 ജില്ലകളില്‍ കഴിഞ്ഞ 24 മണിക്കൂറിനുള്ളില്‍ കോവിഡ് കേസുകള്‍ ഒറ്റ അക്കത്തിലേക്കെത്തിയിരുന്നു. നിലവില്‍ സംസ്ഥാനത്ത് 17,900 കൊറോണ കേസുകളാണുള്ളത്. കഴിഞ്ഞ 24 മണിക്കൂറിനുള്ളില്‍ 1165 പുതിയ കേസുകള്‍ മാത്രമാണ് റിപ്പോര്‍ട്ട് ചെയ്യപ്പെട്ടിട്ടുള്ളത്. പോസിറ്റീവ് നിരക്ക് ഇപ്പോള്‍ 0.4 ശതമാനമാണ്. ഇതിനൊപ്പം 2 കോടിയിലധികം ആളുകള്‍ക്ക് വാക്​സിനേഷന്‍ നല്‍കിയതായും അധികൃതര്‍ അറിയിച്ചു.