സോഷ്യൽമീഡിയയിലൂടെ പരിചയപ്പെട്ടശേഷം പീഡനത്തിനിരയാകുന്ന നിരവധി കേസുകൾ ദിനം പ്രതി റിപ്പോർട്ട് ചെയ്യാറുണ്ട്. ഇപ്പോളിതാ, ഡൽഹിയിൽ ഡേറ്റിങ് ആപ്പിലൂടെ പരിചയപ്പെട്ടയാൾ മയക്കുമരുന്ന് നൽകി ലൈംഗികമായി പീഡിപ്പിച്ചെന്ന പരാതിയുമായി യുവതിയ രംഗത്ത്.

മുംബൈ വർളിയിലെ പഞ്ചനക്ഷത്ര ഹോട്ടലിൽ വെച്ചാണ് പീഡനത്തിനിരയായതെന്ന് പെൺകുട്ടി പറഞ്ഞു. പരാതിയിൽ പോലീസ് കേസെടുത്ത് അന്വേഷണം ഊർജ്ജിതമാക്കിയിരിക്കുകയാണ്.

കഴിഞ്ഞ തിങ്കളാഴ്ചയാണ് സംഭവമുണ്ടായതെന്ന് യുവതി പറഞ്ഞു. ഡേറ്റിങ് ആപ്പിലൂടെയാണ് പ്രതിയെ പരിചയപ്പെട്ടത്. ഒരു മാസത്തിലേറെയായി ചാറ്റ് ചെയ്തിരുന്നു. തൻ്റെ ജന്മദിനമാണെന്ന് അറിഞ്ഞതോടെ ഹോട്ടലിൽ എത്തണമെന്നും പാർട്ടി നൽകുമെന്നും ഇയാൾ അറിയിച്ചു. ചാറ്റിലൂടെയുള്ള സംഭാഷണത്തിൽ സംശയമൊന്നും തോന്നാതിരുന്നതിനാൽ ക്ഷണം സ്വീകരിച്ച് വര്‍ളിയിലെ പഞ്ചനക്ഷത്ര ഹോട്ടലിൽ എത്തുകയായിരുന്നു.

ഹോട്ടലിലെ സ്യൂട്ട് റൂമിലാണ് പാർട്ടി സംഘടിപ്പിച്ചിരുന്നത്. പാർട്ടിക്കിടെ മയക്കുമരുന്ന് കലർത്തിയ ഒരു ഗ്ലാസ് വൈൻ കുടിക്കാൻ നൽകി. ബോധം നഷ്ടമായതോടെ ബലാത്സംഗം ചെയ്യുകയായിരുന്നു എന്നുമാണ് പോലീസിൽ നൽകിയ പരാതിയിൽ യുവതി വ്യക്തമാക്കുന്നത്. വീട്ടിലെത്തിയതോടെ പീഡന വിവരം മാതാപിതാക്കളെ അറിയിച്ചു. ചികിത്സ തേടിയതിന് പിന്നാലെ യുവതിയും കുടുംബവും പോലീസിൽ പരാതി നൽകുകയായിരുന്നു.

യുവതി നഗരത്തിലെ ഒരു ആശുപത്രിയിൽ ചികിത്സയിൽ തുടരുകയാണ്. ഇവർ കേസെടുത്ത് അന്വേഷണം ആരംഭിച്ചതായും പ്രതിയെ വൈകാതെ പിടികൂടുമെന്നും പോലീസ് പറഞ്ഞു. പ്രതികൾക്കെതിരെ ഐപിസി 328, 376 വകുപ്പുകൾ പ്രകാരം കേസ് രജിസ്റ്റർ ചെയ്തിട്ടുണ്ടെന്നും പോലീസ് വ്യക്തമാക്കി.