അസമിലെ പ്രളയക്കെടുതിയില്‍ 222 ഗ്രാമങ്ങള്‍ വെള്ളത്തിനടിയില്‍.... 10321.44 ഹെക്ടര്‍ കൃഷ്ഭൂമിയും പ്രളയത്തില്‍ നശിച്ചു, മണ്ണിടിച്ചിലിലും വെള്ളക്കെട്ടിലും റെയില്‍വേ പാളങ്ങളും മറ്റ് ഗതാഗത സംവിധാനങ്ങളും തകരാറില്‍, രക്ഷാപ്രവര്‍ത്തനത്തിലേര്‍പ്പെട്ട് സൈന്യവും പാരാ-മിലിട്ടറി ഫോഴ്സും, അഗ്‌നിശമന സേനാംഗങ്ങളും .

അസമില്‍ പ്രളയക്കെടുതി രൂക്ഷമാകുകയാണ്. ഏഴ് ജില്ലകളിലായി 57,000 ആളുകളെയാണ് പ്രളയം ബാധിച്ചിരിക്കുന്നത്. പ്രകൃതി ദുരന്തത്തില്‍ മൂന്ന് പേരാണ് ഇതുവരെ മരിച്ചത്. ഇതില്‍ ഒരു കുഞ്ഞും ഉള്‍പ്പെടുന്നു. മനുഷ്യരെ കൂടാതെ ജന്തുമൃഗാദികളും പ്രളയക്കെടുതികള്‍ക്ക് ഇരകളാണ്. 202 വീടുകള്‍ കനത്ത മഴയില്‍ തകര്‍ന്നുവെന്നും റിപ്പോര്‍ട്ടുകളുണ്ട്.

നിരവധി റോഡുകളും പാലങ്ങളും ജലസേചന സൗകര്യങ്ങളും പ്രളയക്കെടുതിയില്‍ തകര്‍ന്നു. ഹോജായ്, ലഖീംപൂര്‍, നാഗൗണ്‍ ജില്ലകളിലാണ് വെള്ളപ്പൊക്കം രൂക്ഷമായത്.

ദിമ ഹാസോ ജില്ലയിലെ 12 ഗ്രാമങ്ങളില്‍ ഉരുള്‍പൊട്ടലുകളുണ്ടായി. മണ്ണിടിച്ചിലിലും വെള്ളക്കെട്ടിലും റെയില്‍വേ പാളങ്ങളും മറ്റ് ഗതാഗത സംവിധാനങ്ങളും തകരാറിലായിരിക്കുകയാണ്.