തൊഴിലാളികള്‍ക്ക് കുറഞ്ഞ കൂലി 10,000 രൂപയെങ്കിലുമാക്കി നിജപ്പെടുത്താന്‍ നീക്കവുമായി കേന്ദ്ര സര്‍ക്കാര്‍. കേന്ദ്ര തൊഴില്‍ മന്ത്രാലയമാണ് തൊഴിലാളികള്‍ക്കു കുറഞ്ഞ കൂലി ഉറപ്പുവരുത്താനുള്ള നടപടികളുമായി മുന്നോട്ടു പോകുന്നത്.

പാര്‍ലമെന്റിന്റെ ശീതകാല സമ്മേളനത്തില്‍ നിയമം കൊണ്ടുവരാനാണ് കേന്ദ്ര തൊഴില്‍ മന്ത്രാലയം നീക്കം നടത്തുന്നത്. കേന്ദ്രം ഈ നിയമം നടപ്പാക്കിയാല്‍ സംസ്ഥാന സര്‍ക്കാരുകളും ഈ പാത പിന്തുടരേണ്ടി വരും. കുറഞ്ഞ വേതനം നടപ്പാക്കാന്‍ സംസ്ഥാനങ്ങളും നിര്‍ബന്ധിതരാകും.

അങ്ങനെ വന്നാല്‍, ലക്ഷക്കണക്കിന് തൊഴിലാളികള്‍ക്ക് ഇതിന്റെ പ്രയോജനം ലഭിക്കും. നിയമത്തില്‍ പ്രധാന വ്യവസ്ഥയായി കൊണ്ടുവരുന്നത് പതിനായിരം രൂപയെങ്കിലും കുറഞ്ഞ വേതനമാക്കണം എന്നതാണ്. സംസ്ഥാന സര്‍ക്കാരുകളാണ് കുറഞ്ഞവേതനം തീരുമാനിക്കേണ്ടതെങ്കിലും ദേശീയ തലത്തില്‍ നിയമം നടപ്പാക്കുന്നതോടെ കുറഞ്ഞവേതനം സംബന്ധിച്ച പ്രത്യേക ചട്ടങ്ങള്‍ സംസ്ഥാനങ്ങള്‍ പാലിക്കേണ്ടിവരും.

 ഇക്കാര്യങ്ങളില്‍ സംസ്ഥാനങ്ങള്‍ക്കു പ്രത്യേക നിര്‍ദേശങ്ങള്‍ നല്‍കുമെന്നു കേന്ദ്ര തൊഴില്‍ മന്ത്രി ബന്ദാരു ദത്താത്രേയ അറിയിച്ചു. ദേശീയതലത്തില്‍ കുറഞ്ഞവേതന നിയമത്തിന്റെ അടിസ്ഥാനത്തിലാകണം സംസ്ഥാന സര്‍ക്കാരുകള്‍ കുറഞ്ഞശമ്പളം നടപ്പാക്കേണ്ടത്. രണ്ടുമാസത്തിനുള്ളില്‍ ദേശീയതലത്തില്‍ കുറഞ്ഞ വേതനം പ്രഖ്യാപിക്കും. എന്നാല്‍ കുറഞ്ഞ വേതനം 15,000 രൂപയാക്കണം എന്നതാണ് തൊഴിലാളി സംഘടനകളുടെ ആവശ്യമെന്നും കേന്ദ്രമന്ത്രി പറഞ്ഞു.

 അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha