മോഡി സര്‍ക്കാര്‍ ജനാധിപത്യത്തിന് ഭീഷണിയെന്ന് കോണ്‍ഗ്രസ് അധ്യക്ഷ സോണിയാ ഗാന്ധി. ബിഹാറില്‍ തെരഞ്ഞെടുപ്പു റാലിയില്‍ സംസാരിക്കവെയാണ് സോണിയ മോഡിക്കെതിരെ രൂക്ഷമായി പ്രതികരിച്ചത്. രാജ്യത്തെ സമാധാന അന്തരീക്ഷം തകര്‍ക്കുന്ന സമീപനമാണ് നരേന്ദ്ര മോഡി സര്‍ക്കാരില്‍ നിന്നുണ്ടാകുന്നതെന്നു കോണ്‍ഗ്രസ് അധ്യക്ഷ പറഞ്ഞു. ജനാധിപത്യ ആശയങ്ങളില്‍ നിന്നകന്ന് സ്വന്തം പ്രത്യയശാസ്ത്രം അടിച്ചേല്‍പ്പിക്കുന്ന സര്‍ക്കാര്‍ ജനാധിപത്യത്തിന് ഭീഷണിയാവുകയാണെന്നും സോണിയ പറഞ്ഞു.
വര്‍ഗീയ സംഘര്‍ഷങ്ങള്‍ സൃഷ്ടിച്ച് നിരപരാധികളെയും പണ്ഡിതരെയും കൊന്നൊടുക്കുകയാണ് സര്‍ക്കാര്‍. ബിജെപി രാജ്യത്തിന്റെ സാമൂഹികാന്തരീക്ഷം തകര്‍ക്കുകയാണ്. എഴുത്തുകാര്‍ നേരിടുന്ന പ്രതിസന്ധി ജനാധിപത്യത്തിനുനേരെയുള്ള വെല്ലുവിളിയാണെന്നും കോണ്‍ഗ്രസ് ഭരണകാലത്തെ വിമര്‍ശിച്ച നരേന്ദ്ര മോഡിക്കുള്ള മറുപടിയും തന്റെ പ്രസംഗത്തിലൂടെ സോണിയ നല്‍കി. തന്റെ പാര്‍ട്ടി രാജ്യത്തെ ജനാധിപത്യം ശക്തിപ്പെടുത്തിയെന്നും അതിനാലാണ് മോഡിക്ക് പ്രധാനമന്ത്രിയാവാന്‍ കഴിഞ്ഞതെന്നും അവര്‍ പറഞ്ഞു.
അഭ്യൂഹം പരത്തി നിരപരാധികളെ കൊന്നൊടുക്കുകയാണു കേന്ദ്രം ഭരിക്കുന്ന മോഡി സര്‍ക്കാരിന്റെ അനുയായികള്‍. അഭിപ്രായസ്വാതന്ത്ര്യം വിലക്കി പണ്ഡിതരെ ആക്രമിക്കുന്നു. സാമൂഹികൈക്യത്തിന്റെ അടിത്തറ ഇല്ലാതാക്കാനാണ് ഇതിലൂടെയൊക്കെ ശ്രമിക്കുന്നത്. ഇത് ദുഃഖകരം മാത്രമല്ല, അപമാനകരവുമാണ്. കേട്ടുകേള്‍വികളുടെ പേരില്‍ ആളുകളെ ക്രൂരമായി കൊലപ്പെടുന്നത്തുന്ന അവസ്ഥയാണ് രാജ്യത്തുള്ളത്. ജനങ്ങളുടെ പ്രശ്‌നങ്ങള്‍ വെറുതെ കേള്‍ക്കുന്നതിനല്ല, അവ പരിഹരിക്കുന്നതിനാണ് പ്രധാനമന്ത്രി ശ്രമിക്കേണ്ടത്. വര്‍ഗീയത വളര്‍ത്തിക്കൊണ്ട് ജനാധിപത്യത്തിന്റെ അടിത്തറ തകര്‍ക്കുകയാണ് ബിജെപിയെന്നും സോണിയ ഗാന്ധി ആരോപിച്ചു.
നിരവധി വാഗ്ദാനങ്ങളാണ് കര്‍ഷകര്‍ക്കും സ്ത്രീകള്‍ക്കും ചെറുപ്പക്കാര്‍ക്കും മോഡി നല്‍കിയത്. എന്നാല്‍ ഈ വാഗ്ദാനങ്ങളെല്ലാം ലംഘിക്കുന്നതിനെയും സോണിയ വിമര്‍ശിച്ചു. അറുപതുകൊല്ലം കൊണ്ട് നേതാക്കളെ ബലികൊടുത്ത് പോലും കോണ്‍ഗ്രസ് രാജ്യത്തെ വികസനവഴിയിലെത്തിച്ചു. അല്ലാതെ എല്ലാം കഴിഞ്ഞ ഒന്നരക്കൊല്ലം കൊണ്ടുണ്ടായതല്ല. കോണ്‍ഗ്രസ് രാജ്യത്തുണ്ടാക്കിയ വികസനം കാണാനാകുന്നില്ലെങ്കില്‍ അത് നിങ്ങളുടെ കുഴപ്പമാണെന്നും സോണിയ പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha