ഡല്‍ഹിയിലും മുംബൈയിലും കനത്ത മഴയെത്തുടര്‍ന്ന് നിരവധിയിടങ്ങളില്‍ വെള്ളം കയറുകയും നാശനഷ്ടങ്ങള്‍ റിപ്പോര്‍ട്ടു ചെയ്യുകയും ചെയ്തു. റോഡില്‍ വെള്ളം കയറിയതോടെ ഡല്‍ഹിയില്‍ വിവിധയിടങ്ങളില്‍ ഗതാഗതം തടസ്സപ്പെട്ടു. തലസ്ഥാനത്ത് ഇന്ന് യെലോ അലര്‍ട്ട് പ്രഖ്യാപിച്ചിട്ടുണ്ട്. കനത്ത മഴ നോയിഡ, ഗാസിയാബാദ്, ഗുരുഗ്രാം എന്നിവിടങ്ങളിലും നാശം വിതച്ചു.

നോയിഡയില്‍ സ്‌കൂളുകള്‍ക്ക് അവധിയാണ്. യമുനയിലെ ജലനിരപ്പ് അപകടരേഖയ്ക്ക് മുകളിലാണ്.കഴിഞ്ഞ ദിവസങ്ങളില്‍ പെയ്ത മഴയില്‍ മുംബൈയിലും നിരവധി നാശനഷ്ടങ്ങളുണ്ടായി.

ചൊവ്വാഴ്ച രാത്രി മരം കടപുഴകി ബസിനു മുകളില്‍ വീണെങ്കിലും ആളപായമില്ല. മഹാരാഷ്ട്രയിലെ റായ്ഗഡ്, പുണെ, സത്താറ, രത്‌നഗിരി ജില്ലകളില്‍ കേന്ദ്ര കാലാവസ്ഥാ വകുപ്പ് റെഡ് അലര്‍ട്ട് പ്രഖ്യാപിച്ചു. മുംബൈ, പാല്‍ഘര്‍, താനെ എന്നിവിടങ്ങളില്‍ ഓറഞ്ച് അലര്‍ട്ട് പ്രഖ്യാപിച്ചു.