കാര്‍ഗിലില്‍ ഇന്ത്യന്‍ സൈന്യം പൊരുതി നേടിയ വിജയത്തിന് ഇന്ന് 24 വയസ്... കാര്‍ഗില്‍ യുദ്ധത്തില്‍ പങ്കെടുത്ത സൈനികര്‍ക്ക് പ്രധാനമന്ത്രി നരേന്ദ്രമോദിയും രാഷ്ട്രപതി ദ്രൗപതി മുര്‍മുവും ഇന്ന് രാജ്യത്തിന്റെ ആദരമര്‍പ്പിക്കും. നുഴഞ്ഞ് കയറ്റം നടത്തിയ പാകിസ്താന്‍ സൈന്യത്തെയും തീവ്രവാദികളെയുമാണ് ഓപ്പറേഷന്‍ വിജയിലൂടെ ഇന്ത്യന്‍ സൈന്യം പരാജയപ്പെടുത്തിയത്.


രാജ്യാന്തര തീവ്രവാദത്തിനും പരമാധികാര ലംഘനത്തിനും മാപ്പില്ലെന്ന് അന്താരാഷ്ട്ര വേദികളില്‍ ഇന്ത്യ നിലപാട് ആവര്‍ത്തിക്കുന്ന കാലത്താണ് ഈ വര്‍ഷത്തെ കാര്‍ഗില്‍ വിജയ് ദിവസ് രാജ്യം ആഘോഷിക്കുന്നത്.

സമുദ്ര നിരപ്പില്‍ നിന്ന് 18000 അടി ഉയരത്തിലെ യുദ്ധഭൂമിയില്‍ പട നയിച്ച് ജയിച്ച ഇന്ത്യ തിരിച്ച് പിടിച്ചത് ഭൂമി മാത്രമായിരുന്നില്ല. 1999 മെയ് അഞ്ചിന് അതിര്‍ത്തി ലംഘിച്ച് തീവ്രവാദികളെ കൂട്ടുപിടിച്ച് പാകിസ്താന്‍ സൈന്യം നടത്തിയ ആക്രമണത്തില്‍ ഇന്ത്യക്ക് നഷ്ടമായത് അഞ്ച് സൈനികരുടെ ജീവനായിരുന്നു.

ടോലോലിങ് മലനിരകളും ടൈഗര്‍ ഹില്‍സും തിരിച്ച് പിടിച്ച് ഇന്ത്യന്‍ സൈന്യം മുന്നേറ്റം തുടര്‍ന്നതോടെ ജനറല്‍ പര്‍വേസ് മുഷാറഫ് നയിച്ച പാക് സൈന്യം മുട്ടുമടക്കി. ഇന്ത്യന്‍ സൈന്യത്തിന്റെ നിശ്ചയദാര്‍ഢ്യത്തിന് മുന്നില്‍ പിടിച്ചുനില്‍ക്കാനുള്ള കരുത്തില്ലെന്ന് ബോധ്യപ്പെട്ട പാക് സൈന്യം പരാജയം സമ്മതിച്ചു.

പാക് പ്രധാന മന്ത്രി നവാസ് ശരീഫ് സൈന്യം കാര്‍ഗിലില്‍ നിന്ന് പിന്മാറുന്നതായി പ്രഖ്യാപിച്ചു. അമേരിക്ക സഹായം നിരസിച്ചതും യുദ്ധത്തിന്റെ ഉത്തരവാദിത്വം പാകിസ്താന് ആണെന്ന് ഫ്രാന്‍സ് ഉള്‍പ്പടെയുള്ള രാജ്യങ്ങള്‍ നിലപാട് സ്വീകരിച്ചതും അന്താരാഷ്ട്ര വേദികളില്‍ പാകിസ്താന് തിരിച്ചടിയായി.

എന്നാല്‍ അതിനോടകം ഇന്ത്യക്ക് നഷ്ടമായത് 527 ധീര ജവാന്മാരെയാണ്. കാര്‍ഗില്‍ ഹീറോ ക്യാപ്റ്റന്‍ വിക്രം ബത്ര ഉച്ചത്തില്‍ വിളിച്ച മുദ്രാവാക്യം 'യേ ദില്‍ മാംഗെ മോര്‍' ഇന്ത്യന്‍ സൈന്യത്തിന് മാത്രമല്ല രാജ്യത്തെ സ്‌നേഹിക്കുന്ന ഓരോ ഇന്ത്യക്കാരനും ഇന്നും ഊര്‍ജമാണ്. ല്ലാവര്‍ഷവും രാജ്യം ജൂലൈ 26ന് കാര്‍ഗില്‍ വിജയ് ദിവസ് ആഘോഷിക്കുമ്പോള്‍ വീരമൃത്യു വരിച്ച ജവാന്മാര്‍ക്ക് രാഷ്ട്രപതിയും പ്രധാന മന്ത്രിയും ആദരമര്‍പ്പിക്കും.