ഒരു യഥാർത്ഥ സൈനികൻ യുദ്ധം ചെയ്യുന്നത് തന്റെ മുന്നിലുള്ളതിനെ വെറുക്കുന്നതുകൊണ്ടല്ല, മറിച്ച് തന്റെ പിന്നിലുള്ളതിനെ സ്നേഹിക്കുന്നതിനാലാണ്'-ഗിൽബേർട്ട് കെ ചെസ്റ്റേഴ്സ്റ്റൺന്റെ വാക്കുകൾ ആണിത്. ഈ വാക്കുകൾ ഇന്ന് ഓർക്കാൻ ഒരു കാരണമുണ്ട് .

ഇന്ന് ഇന്ത്യയെ സംബന്ധിച്ച് വളരെ നിർണായകമായ ദിനമാണ്. ഇന്നാണ് കാർഗിൽ വിജയ് ദിവസ്’ !!! കാർഗിലിലേക്കു നുഴഞ്ഞുകയറിയവരെ തുരത്തി ഇന്ത്യൻ സൈന്യം നേടിയ വിജയത്തിന്റെ ഓർമ്മ ദിനം. 24–ാം കാർഗിൽ വിജയദിനം .1999ലെ ശൈത്യകാലത്തു പാക്ക് പട്ടാളം തീവ്രവാദികളുടെ സഹായത്തോടെ കാർഗിലിലെ പോസ്റ്റുകൾ പിടിച്ചടക്കി. ഇവരെ തുരത്താനായി ‘ഓപ്പറേഷൻ വിജയ്’ എന്ന പേരിൽ രണ്ടരമാസത്തോളം ഇന്ത്യ നടത്തിയ സൈനിക നടപടി . പാക്കിസ്ഥാൻ പിടിച്ചെടുത്ത പ്രദേശങ്ങളെല്ലാം തിരിച്ചുപിടിച്ചു ഇന്ത്യ.

ജൂലൈ 26ന് കാർഗിലിൽ വിജയം ഉറക്കെ പ്രഖ്യാപിച്ചു. ഈ ദിവസത്തിന്റെ ഓർമയാണു കാർഗിൽ വിജയ് ദിവസമായി ഇന്ത്യ ആചരിക്കുന്നത്.1999 മെയ് മുതൽ ജുലൈ വരെ നീണ്ടുനിന്ന യുദ്ധത്തിൽ 527 ഇന്ത്യൻ സൈനികരായിരുന്നു വീരമൃത്യു വരിച്ചത്. അയ്യായിരത്തോളം പാക് സൈനികരും തീവ്രവാദികളുമായിരുന്നു ഇന്ത്യയിലേക്ക് നുഴഞ്ഞുകയറിയത്.

അതിശൈത്യം നിറഞ്ഞ കാലാവസ്ഥയിൽ അതിർത്തിയിൽ നിന്നും ഇന്ത്യൻ സൈന്യത്തെ പിൻവലിച്ചിരുന്നു . ഈ സാഹചര്യം നോക്കിയാണ് പാക്കിസ്ഥാൻ പട്ടാളക്കാർ അതിർത്തി കടന്നെത്തിയത്‌. ഓപ്പറേഷൻ ബദർ എന്ന പേരിലായിരുന്നു പാകിസ്ഥാന്റെ അന്നത്തെ ആ നീക്കം.72 ദിവസത്തോളമായിരുന്നു യുദ്ധം നീണ്ട് നിന്നത്. കര, നാവിക, വ്യോമസേനകൾ യുദ്ധത്തിൽ പങ്കാളികളായി

527 ഇന്ത്യൻ സൈനികർക്കാണ് യുദ്ധത്തിൽ ജീവൻ നഷ്ടപ്പെട്ടത്. പാക്കിസ്ഥാന്റെ 453 സൈനികരും യുദ്ധത്തിൽ കൊല്ലപ്പെട്ടു. ഇന്ത്യയും പാക്കിസ്ഥാനും തമ്മിൽ നടന്ന അവസാന യുദ്ധമായിരുന്നു കാർഗിലിൽ നടന്നത്. ഈ വർഷം കാർഗിൽ വിജയ് ദിവസിന്റെ 24-ാം വാർഷികമാണ്. 1999 ജുലൈ 26 ന് ഇന്ത്യ യുദ്ധത്തിൽ വിജയിച്ചതായി അന്നത്തെ പ്രധാനമന്ത്രി അടൽ ബിഹാരി വാജ്പേയ് പ്രഖ്യാപിക്കുയായിരുന്നു.

കാർഗിൽ യുദ്ധത്തെ കുറിച്ച് പറയുമ്പോൾ വിസ്മരിക്കാനാകാത്ത രണ്ടു പോരാട്ടങ്ങൾ ആണ് ടോളോലിംഗ് പോരാട്ടവും, ടൈഗർ ഹിൽ യുദ്ധവും. ആദ്യത്തെ പ്രധാന പോരാട്ടമായിരുന്നു ടോളോലിംഗിൽ നടന്നത്. ടോളോലിംഗിലും സമീപ പ്രദേശങ്ങളിലുമായി നുഴഞ്ഞുകയറിയ പാക്സൈന്യത്തെ തുരത്താൻ ഇന്ത്യൻ സേനയുടെ രാജ്പുത്താന റൈഫിൾസിന്റെ രണ്ടാം ബറ്റാലിയൻ സൈന്യമായിരുന്നു യുദ്ധത്തിന് ഇറങ്ങിയത്. 

പാറക്കെട്ടുകളും ഇടുങ്ങിയ വഴികളും അസഹനീയമായ കാലാവസ്ഥയും പോരാട്ടം കൂടുതൽ പ്രതിസന്ധികൾ സൃഷ്ട്ടിച്ചു. നീണ്ട ദിവസത്തെ പ്രത്യാക്രമണത്തിനൊടുവിൽ 1999 ജൂൺ 13 ന് ടോളോലിംഗ് തിരിച്ച് പിടിച്ചതായി സൈന്യം അറിയിച്ചു. കാർഗിൽ യുദ്ധത്തിലെ മറ്റൊരു സുപ്രധാനമായ പോരാട്ടമായിരുന്നു പോയിന്റ് 5353 എന്നും ടൈഗർ ഹിൽ യുദ്ധം പാക് സൈന്യവും തീവ്രവാദികളും 5307 മീറ്റർ ഉയരത്തിലുള്ള ടൈഗർ ഹില്ലിൽ തമ്പടിച്ചു . തുടർന്ന് ഓപ്പറേഷന്‍ വിജയ് എന്ന് പേരിട്ട സൈനിക നടപടിയിലൂടെ ആഴ്ചകളോളം നീണ്ട് നിന്ന പോരാട്ടത്തിനൊടുവിൽ പാക്ക് സൈനികരെ പുറത്താക്കി ടൈഗര്‍ ഹില്‍ ഉള്‍പ്പെടെയുള്ള പോസ്റ്റുകള്‍ ഇന്ത്യ പിടിച്ചെടുത്തു . ടൈഗർ ഹിൽ തിരിച്ചുപിടിച്ചത്, കാർഗിൽ യുദ്ധത്തിലെ പ്രധാന വഴിത്തിരിവായിരുന്നു.