ബാല് താക്കറെയുടെ സ്മാരകത്തിനായി പൊതുഖജനാവിലെ പണം ഉപയോഗിക്കരുതെന്ന് കോണ്ഗ്രസ്
അന്തരിച്ച ശിവസേന നേതാവ് ബാല് താക്കറെയുടെ സ്മാരകത്തിനായി പൊതുഖജനാവിലെ പണം ഉപയോഗിക്കരുതെന്ന് കോണ്ഗ്രസ്. ശിവാജി പാര്ക്കിലെ താക്കറെ സ്മാരകത്തിലെ ദീപം അണയാതെ സൂക്ഷിക്കാനുള്ള ചെലവ് എണ്ണക്കമ്പനികള് വഹിക്കുമെന്ന പെട്രോളിയം മന്ത്രി ധര്മ്മേന്ദ്ര പ്രധാന്റെ പ്രസ്താവനയ്ക്ക് മറുപടിയായാണ് കോണ്ഗ്രസ് ഇങ്ങനെ പറഞ്ഞത്.
ഇത്തരം കാര്യങ്ങള്ക്കായി പൊതുപണം ഉപയോഗിക്കരുതെന്ന് കോണ്ഗ്രസ് വക്താവ് സച്ചിന് സാവന്ത് ആവശ്യപ്പെട്ടു. പൊതുമേഖലാ കമ്പനികളില് നിന്നും താക്കറെ സ്മാരകത്തിനായി പണം ചെലവാക്കുന്നത് ശരിയല്ല. ദീപം അണയാതെ സൂക്ഷിക്കാനുള്ള ചെലവ് വഹിക്കാന് ശിവസേനയ്ക്ക് കഴിയും. എണ്ണക്കമ്പനികള് ഈ ചെലവ് വഹിക്കേണ്ട ആവശ്യമെന്താണെന്നും കോണ്ഗ്രസ് ചോദിച്ചു.
സ്മാരകത്തിലെ ദീപം അണയാതെ സൂക്ഷിക്കാന് പ്രതിമാസം ഒരു ലക്ഷത്തിലധികം രൂപ വേണ്ടിവരുമെന്നാണ് കണക്ക്. നിലവില് ഈ ചെലവ് വഹിക്കുന്നത് ബ്രിഹാണ് മുംബൈ മുനിസിപ്പല് കോര്പ്പറേഷനാണ്. ഇന്നലെ നടത്തിയ മുംബൈ സന്ദര്ശനത്തിനിടയിലാണ് ചെലവ് എണ്ണക്കമ്പനികള് വഹിക്കുമെന്ന് ധര്മ്മേന്ദ്ര പ്രധാന് വാഗ്ദാനം നല്കിയത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha